Bamvutu na Bangiufula na Beno

◼ Inki Ntangu Nsamuni Lenda Zenga Kulonguka Biblia ti Longoki?

Kana longoki ya Biblia ke yela diaka ve na kimpeve, yo lenda lomba nde nge zenga kulonguka ti yandi na mayele yonso. (Mat. 10:11) Tadila bangiufula yai: Keti yandi ke zitisaka kilumbu yina beno me wakanaka sambu na kulonguka? Keti yandi ke kudibongisaka na ntwala? Keti yandi ke kwisaka na balukutakanu ya dibundu? Keti yandi ke zabisaka bantu ya nkaka mambu yina yandi ke longukaka? Keti yandi ke salaka bansoba na kuwakana ti minsiku ya Biblia? Ya kieleka, nge fwete tadila mvula mpi mayele na yandi mpi kuzaba nde bantu yonso ke yelaka ve na kimpeve kiteso mosi. Diaka, kana nge zenga kulonguka ti yandi, bikila yandi dibaku ya kulonguka diaka na bilumbu ke kwisa.​—1 Tim. 2:4.