Mukanda ya me Katuka na Nto-Kimvuka

Bampangi ya Luzolo:

Beto kele na kiese mingi ya kusonikila beno na luyantiku ya mvula yai ya mfunu! Na nsuka ya mvu 2014, mvu-nkama mosi ta lunga banda Yezu Kristu, Ntotila ya beto ke zolaka mingi, yantikaka kuyala na kati ya bambeni na yandi.​—Nk. 110:1, 2.

Na lukutakanu ya nsuka ya mvula ya Watch Tower Bible and Tract Society of Pennsylvania yina salamaka na luyantiku ya mvula yai ya kisalu, Komite Sambu na Mbalula ya Biblia ya Nsi-Ntoto ya Mpa basisaka mbalula ya bo me tomisa na Kingelesi ya mbote kuluta sambu bantu kusadila. Yehowa ke sadilaka bana na yandi ya me butukaka na mpeve sambu na kubasisa Mbalula ya Nsi-Ntoto ya Mpa ya kuluta mbote. (Bar. 8:15, 16) Diambu yai ke salaka nde mbalula yai kuvanda ya sipesiali, mpidina ve?

Banda bamvula mingi, Komite Sambu na Kusonika ya Nto-Kimvuka ke tulaka kisalu ya kubalula Biblia na kisika ya ntete. Bubu yai, Mbalula ya Nsi-Ntoto ya Mpa kele na mvimba to na ndambu na bandinga 121. Beto ke siamisa beno na kumonisa Yehowa nde beno ke bakaka Biblia yina beno kele na yo na mbalu. Beno tanga mpi beno yindulula yo konso kilumbu. Mpidina, beno ta kwenda pene-pene na Yehowa Nzambi, Munkwa na yo.​—Yak. 4:8.

Ntangu beto ke waka nde bampangi na beto ya babakala ti ya bankento ke kutana ti bampasi, yo ke pesaka beto mawa. Yo ke pwelele nde bantangu ya nkaka yo lenda vanda mpasi sambu bampangi yai kumona kiese ti bampangi na bo. Mu mbanda luzingu ya dibuta mosi na Azia kumaka na mpasi ntangu mama na bo kumaka paralize na kintulumukina. Ata minganga yina me longukaka mingi kukaka ve kubelula yandi. Yo kele mawa kibeni! Bubu yai, bakala na yandi ke lutisaka kilumbu ya mvimba na kukeba nkento na yandi. Bana na bo tatu yina kele Bakristu (bakala mosi mpi bankento zole) ke pesaka mbandu ya mbote mutindu bo ke sadisaka bibuti na bo na zola yonso. Dibuta yai ya mbote mpi beno yonso ya ke nunga bampasi ya mutindu na mutindu lenda vanda na kiese yina ke katukaka na kukanga ntima na bampasi. (Yak. 1:2-4) Yehowa ke ndimisa Bakristu yina bo me tulaka mafuta mpi mameme ya nkaka nde beto ta vanda na kiese kana beto ke landa na kukanga ntima na bampasi sambu yandi ta pesa beto matabisi ya luzingu ya mvula na mvula!​—Yak. 1:12.

Na mvula ya me luta, bantu yina vukanaka na Lusungiminu vandaka 19 241 252. Yo ke pesa kikesa kibeni na kumona bantu mingi ke pesa Yehowa ti Yezu Kristu lukumu mutindu bo ke vukana na lukutakanu yai ya mfunu yina bansadi ya Nzambi ke salaka konso mvula! Na nsungi ya Lusungiminu, ndinga ya ngolo ya kupesa lukumu wakanaka sambu bantu mingi vandaka bapasudi-nzila nsadisi na Marsi mpi na Aprili. Yo ke pesa mpenza kiese mingi! Keti yo pesaka nge ve kiese na kuzaba nde bantu yina ta vanda bapasudi-nzila nsadisi na viziti ya nkengi ya nziunga lenda vanda na kiese ya kulanda lukutakanu ya mvimba yina yandi ta twadisa, ata viziti na yandi ta vanda ve na ngonda ya Marsi mpi ya Aprili? Bampangi yai ya kimpeve ke bakisaka mfunu ya kusamuna na kikesa yonso mpi ya kusala bisalu ya dibundu. Kuvanda ti mambu mingi ya kusala ta sadisa beto na kukangama ngolo, kunikana ve mpi kubika ve nde bikesa yina Diabulu ke sala kulembisa lukwikilu na beto mpi kukatula beto na nzila.​—1 Bak. 15:58.

Yo ke pesa kikesa na kuzaba nde na mvula ya kisalu yina me luta, bantu 277 344 bakaka mbotika mpi ke tambula ntangu yai na nzila ya luzingu ti bampangi ya ntoto ya mvimba! (Mat. 7:13, 14) Bampangi yai ya mpa kele na mfunu ya lusadisu sambu bo kuma “ngolo na lukwikilu.” (Bakol. 2:7) Beno landa na kupesana kikesa sambu beno kanga ntima tii na nsuka. (Mat. 24:13) Biblia ke tuba nde “beno tubila bantu ya kele na mawa na mutindu ya ke lembika, beno sadisa bantu ya kele ngolo ve, beno vanda ntima-nda na bantu yonso.” (1 Bate. 5:14) Yo yina, bika nde beto yonso ‘kusamba ntangu yonso,’ mpi beto tuba nde: “Bika nde Kimfumu na nge kukwisa.”—1 Bate. 5:17; Mat. 6:10.

Beto ke lomba beno na kutanga Annuaire yai mpi beno zaba nde beto ke zolaka beno yonso bansadi ya Yehowa!

Bampangi na beno,

Nto-Kimvuka ya Bambangi ya Yehowa