Keti Bambangi ya Yehowa Ta Guluka Sambu Bo Ke Longaka Nzo na Nzo?

Ve. Mbala na mbala, beto ke kwendaka kulonga nzo na nzo, kansi beto ke vingilaka ve nde beto guluka sambu beto ke salaka kisalu yina. (Baefezo 2:8) Sambu na nki?

Beto baka mbandu mosi: Yindula nde muntu mosi ya ntima ya mbote me sila na kupesa dikabu mosi ya ntalu mingi na konso muntu yina ta kuma na kisika mosi ya siki-siki na kilumbu yina yandi me tula. Kana nge ke ndima kibeni nde muntu yina ta sala mambu ya yandi me tuba, keti nge ta landa bansiku yina yandi ta pesa? Ee. Ziku, nge ta songa mpi banduku na nge ti dibuta na nge mambu yina yandi ta sala, sambu bo mpi bo baka dikabu yina. Ata mpidina, nge ta baka ve dikabu yina sambu nge me landa bansiku na yandi. Kansi nge ta baka yo sambu yandi ke zola kupesa nge yo.

Kiteso mosi, Bambangi ya Yehowa ke ndimaka nde Nzambi ta pesa bantu yonso yina ke lemfukilaka yandi luzingu ya mvula na mvula yina yandi me silaka. (Baroma 6:23) Beto ke salaka bikesa sambu na kusonga bantu ya nkaka mambu yina beto ke kwikilaka mpi beto ke tulaka ntima nde bo ta baka mambote ya balusilu ya Nzambi. Kansi beto ke vingilaka ve nde beto guluka sambu beto ke kudipesaka na kisalu ya kulonga bantu. (Baroma 1:17; 3:28) Ya kieleka, ata muntu mosi ve lenda sala bikesa yo vanda ya nki mutindu sambu na kubaka lusakumunu yina ya Nzambi. Biblia ke tuba nde: “Beto gulukaka ve sambu beto salaka mambu ya mbote, kansi beto gulukaka sambu yandi wilaka beto mawa.”​—Tito 3:5, Bible na Kituba.