Bambangi ya Yehowa Yina Me Kotaka Boloko Sambu na Lukwikilu na Bo—Insi na Insi

Ntalu ya Bambangi ya Yehowa yina me kotaka boloko sambu na lukwikilu na bo. Ngonda ya mars 2022

Artikle 18 ya Kuwakana Yina Nsi-Ntoto ya Mvimba Me Wakanaka na Yina Me Tala Banswa ya Bantu Yina Kele Ve Basoda mpi Bantu ya Politiki ke tuba nde: “Mambu ya me tala kimpwanza ya mabanza, mambu yina kansansa ya muntu ke buyisa mpi kimpwanza na mambu ya lusambu” kele na kati ya banswa ya ntete-ntete ya konso muntu.a Kansi na bansi ya nkaka, bo ke buyisa Bambangi ya Yehowa nswa yai ya ntete yina konso muntu kele ti yo, bo ke tula bo na boloko mpi nkutu bo ke niokula bo ngolo. Bamingi na kati ya bayina bo me tulaka boloko, bo me kangaka bo kaka sambu bo vandaka kusala mambu yina lukwikilu na bo ke lombaka bo na kusala. Bankaka bo ke kotisaka bo boloko tu mingi sambu kansansa na bo ke buyisaka bo na kusala kisalu ya kisoda.