Biblia​—Keti Yo Kele Kibeni “ya Kupemama na Nzambi”?

KETI nge ke kwikilaka nde Biblia me katukaka na Nzambi? To keti nge ke yindulaka nde yo kele mukanda yina kele kaka ti bangindu ya bantu?

Bantu yina ke kudibingaka Bakristu ke tubilaka mingi diambu yai. Mu mbandu, na 2014, nsosa mosi yina bo salaka na États-Unis monisaka nde bantu mingi yina ke kudibingaka Bakristu ndimaka nde “Biblia kele ti mwa kuwakana ti Nzambi.” Kansi, muntu 1 na kati ya bantu 5 yina bo yulaka bangiufula tubaka nde sambu na yandi, Biblia kele mukanda “ya kele ti masolo ya luvunu, bamwanda-mwanda, masolo ya ntama, mpi bangindu yina bantu sonikaka.” Ntembe yai ke benda dikebi na ntendula ya kieleka ya bangogo “ya kupemama” na yina me tala Biblia.—2 Timoteo 3:16.

“YA KUPEMAMA”—YO KE TENDULA INKI?

Biblia kele ti mikanda ya fioti 66, yina bantu kiteso ya 40 sonikaka na nsungi ya bamvula kiteso ya 1 600. Kansi, kana bantu kusonikaka Biblia, inki mutindu yo lenda vanda “ya kupemama na Nzambi”? Na kutuba ya pete, bangogo “ya kupemama na Nzambi” ke tendula nde Nzambi muntu kele Nto ya bansangu yina kele na mikanda yina. Biblia ke tuba nde: “Bantu tubaka mambu yina me katuka na Nzambi mutindu mpeve santu vandaka kutwadisa bo.” (2 Piere 1:21) Na kutuba ya nkaka, Nzambi sadilaka mpeve santu, ngolo na yandi ya ke monanaka ve, sambu na kuzabisa nsangu na yandi na bantu yina sonikaka mikanda ya Biblia. Beto lenda fwanisa yo ti mfumu mosi yina ke zabisa sekretere na yandi mambu yina yandi fwete sonika na mukanda. Munkwa ya mukanda yina kele ve muntu yina ke sonika yo kansi muntu yina ke tuba mambu ya bo ke sonika.

Nzambi zabisaka bantu ya nkaka yina sonikaka Biblia nsangu na yandi na pwelele yonso na nzila ya wanzio. Bankaka monaka bambona-meso yina katukaka na Nzambi. Bantangu ya nkaka, Nzambi zabisaka nsangu na yandi na bandosi. Ata mbala mingi Nzambi pesaka bantu yina sonikaka Biblia nswa ya kusadila bangogo na bo mosi sambu na kusonika nsangu na yandi, bantangu ya nkaka yandi songaka bo bangogo ya sikisiki ya bo fwete sonika. Yo vanda yandi salaka yo nki mutindu, bantu yina sonikaka Biblia sonikaka bangindu ya Nzambi kansi ya bo mosi ve.

Inki mutindu beto lenda ndima nde Nzambi muntu pesaka bantu yina sonikaka Biblia mpeve na yandi? Beto tadila banzikisa tatu yina ke sadisa beto na kundima nde Biblia me katukaka na Nzambi.