Monisa Zola
Kikuma Yina Ke Salaka nde Bantu Kumonisa Ve Zola
Bangindu ya mbi sambu na bantu ya nkaka ke katukaka ve nswalu. Kaka mutindu yo ke lombaka ntangu mpi bikesa sambu na kufwa mikrobe mosi buna, yo ke lombaka mpi ntangu mpi bikesa sambu na kukatula bangindu ya mbi sambu na bantu ya nkaka. Inki nge lenda sala sambu na kuvanda diaka ve ti bangindu ya mbi sambu na bantu ya nkaka?
Mambu Yina Biblia Ke Tubaka
“Beno lwata zola, sambu yo ke vukisaka beto na mutindu ya kukuka.”—BAKOLOSAI 3:14.
Verse yai ke tendula nki? Kana nge ke sala mambu ya mbote sambu na bantu ya nkaka, yo ta sala nde beno zinga mbote. Kana nge ke zola bantu mingi, nge ta bakilaka bo ve bangindu ya mbi. Kana nge ke zola bantu, nge ta mengaka bo diaka ve to nge ta monaka ve nde bo me konda mfunu.
Mambu Yina Nge Lenda Sala
Yindula mambu yina nge lenda sala sambu na kumonisa zola na bantu yina nge lenda bakila bangindu ya mbi. Yo ke lomba ve kusala mambu ya nene. Meka kusadila ngindu mosi to bangindu mingi na kati ya bangindu yai:
Kana nge ke sala ata diambu mosi ya fioti sambu na kumonisa zola, yo ta sadisa nge na kukatula bangindu ya mbi
Kana banzenza ke sosa nzo mosi buna, sadisa bo na kumona yo to kana nge me kota na kamio mosi ti munzenza, bikila yandi kisika na nge.
Sala yonso sambu na kuta ti bo masolo ya fioti-fioti ata bo ke tubaka ve ndinga na beno mbote.
Vanda ntima-nda kana bo ke sala mambu na mutindu yina nge ke bakisa ve.
Kuditula na kisika na bo kana bo ke songa nge mambu ya ke yangisa bo.