Kusabuka ya Masa Yurdani

TALA bana ya Israele kesabuka Masa Yurdani! Masa na yau mekwenda na wapi? Na nsungi yai ya mvula kenokaka mingi, mpi ka mwa ntangu na ntwala, masa vandaka kuluta na ngolo yonso. Kansi, ntangu yai masa yonso meyuma mpi bana ya Israele keluta na ntoto ya kuyuma bonso na Nzadi Mungwa! Inki meluta?

Na kilumbu ya kusabuka Masa Yurdani, Josué tubaka na bana ya Israele, na kulungisa lukanu ya Jéhovah nde: ‘Banganga-Nzambi yonso kubaka sanduku ya ngwakana mpi kuluta na ntwala na beto. Ntangu bau takotisa makulu na bau na Masa ya Yurdani, masa taluta dyaka ve.’

Banganga-Nzambi bakaka sanduku, mpi bau yantikaka na kukwenda na ntwala ya bantu yonso. Ntangu bau kumaka na lweka ya Yurdani, bau kotaka mbala mosi na masa. Masa vandaka kuluta ngolo mpi nzadi vandaka mudindu. Kansi, ntangu banganga-Nzambi tulaka makulu na bau na kati, masa yantikaka na kuyuma! Yau vandaka kidimbu ya nkumbwa! Jéhovah kangisaka masa, mpi yau yumaka nswalu-nswalu!

Banganga-Nzambi yina vandaka kunata sanduku ya ngwakana kutelamaka na kati-kati ya nzadi yina vandaka ya kuyuma. Beno kemona bau na kifwanisu? Bau bikalaka pana mutindu yina tii kuna bantu yonso sabukaka Masa Yurdani!

Ntangu bantu yonso sabukaka, Josué tubaka na bantu ya kikesa 12 nde: ‘Beno kwenda na masa kisika yina banganga-Nzambi ya kenata sanduku ya ngwakana metelama. Beno baka matadi 12 mpi beno tabumbika yau na kisika ya beno talala. Na bilumbu yina takwisa, ntangu bana na beno tayula ntendula ya matadi yina, beno tasonga bau nde masa ya Yurdani yumaka na ntangu yina sanduku ya ngwakana ya Jéhovah yantikaka na kusabuka nzadi. Matadi yina tayibusa beno kidimbu yai ya nkumbwa!’ Josué tungisaka mpi matadi 12 na kisika yina banganga-Nzambi kutelamaka.

Na nsuka, Josué tubaka na banganga-Nzambi yina vandaka kunata sanduku ya ngwakana na kubasika na masa. Kaka na ntangu bau kumaka na ndambu yankaka, nzadi yantikaka dyaka kuluta.