Ntangu Me Telama

BENO tala Josué. Yandi ketuba nde: ‘Ntangu, telama!’ Mpi ntangu metelama. Yau kele kisika mosi na zulu kilumbu ya mvimba. Jéhovah muntu mesala kimpa yina! Kansi sambu na nki Josué kezola nde ntangu kufula kaka na kungenga?

Ntangu bantu ya Ngiboni kumonaka nde bantotila tanu yina beto metubila ntete mekwisa kunwanisa bau, bau tindaka ndinga na Josué sambu na kusadisa bau. Muntu yina bau tindaka tubaka nde: ‘Kwisa nswalu kusadisa beto!’ Gulusa beto, sambu bantotila yonso yina kevandaka na bangumba mekwisa kunwanisa bansadi na nge.’

Josué na basoda na yandi kukwendaka. Bau tambulaka mpimpa ya mvimba. Ntangu bau kumaka na Ngiboni, basoda ya bantotila yina kuwaka boma mingi mpi bau tinaka. Ebuna Jéhovah nokisilaka bau mvula ya matadi ya nene. Bantu yina kufwaka na matadi kuvandaka mingi kuluta bantu yina basoda ya Israele kufwaka na mbele.

Josué monaka nde ntangu vandaka kukulumuka nswalu. Mpimpa zolaka kubwa mpi kana yau kubwa, basoda mingi ya bantotila yina tanu zolaka kutina. Yau yina, Josué sambilaka Jéhovah mpi tubaka nde: ‘Ntangu, telama!’ Ntangu fulaka kaka na kupesa nsemo mpi basoda ya Israele kunungaka na mbote yonso.

Bantotila yankaka ya mbi yina vandaka kuyina bantu ya Nzambi kuvandaka na Kana. Yau lombaka bamvula kiteso ya sambanu sambu na Josué mpi basoda na yandi sambu na kununga bantotila 31 ya insi yina. Na nima na yau, Josué kabisaka ntoto ya Kana na makanda ya Israele yina vandaka na yau ve.

Bamvula mingi kulutaka, mpi nsukansuka Josué kufwaka na bamvula 110. Na bamvula yonso ya Josué ti banduku na yandi kuzingaka, bantu vandaka kulemfuka na Jéhovah. Na nima ya lufwa na bau, bana ya Israele yantikaka na kukuma mbi, mpi mambu ya mbi yantikaka kubwila bau. Yau kele na ntangu yina bau vandaka mpenza na mfunu ya lusadisu ya Nzambi.