Na Mongo ya Olive

TALA Yezu awa na Ngumba ya Olive. Bantumwa iya kele na lweka na yandi: Bampangi zole André na Pierre, mpi bampangi zole yankaka Jacques na Jean. Yina beto kemona ntama kele tempelo ya Nzambi na Yerusaleme.

Yau meluta bilumbu zole ya Yezu mekota na Yerusaleme na zulu ya mpunda. Yau kumaka kilumbu ya Kizole. Kilumbu yina, Yezu kwendaka na tempelo na menemene kibeni. Banganga-Nzambi sosaka na kukanga yandi kansi bau waka boma ya bantu yina vandaka kuzola yandi.

Yezu tubaka na bau nde: ‘Beno kele banyoka, bana ya banyoka!’ Na nima yandi tubilaka bambuta yina ya mabundu nde Nzambi tapesa bau ndola sambu na mambu ya mbi ya bau vandaka kusala. Na nima Yezu kwendaka na Ngumba Olive. Kele kisika yina bantumwa yai iya yantikaka na kuyula yandi bangyufula. Beno zaba nki mambu bau yulaka Yezu?

Bau yulaka yandi mambu takwisa na ntwala. Bau vandaka kuzaba nde Yezu tamanisa mambi yonso ya kele na ntoto. Kansi, bau kezola kuzaba inki ntangu yau tasalama? Inki ntangu Yezu tavutuka sambu na kuyala bonso Ntotila?

Yezu zabaka nde balongoki na yandi tamona yandi ve ntangu yandi tavutuka. Sambu yandi tavanda na zulu, na yau bau tamona yandi ve. Yau yina, Yezu tubilaka bantumwa na yandi mambu yina tabwa na ntoto ntangu yandi tavutuka mpi tayala bonso Ntotila na zulu. Inki mambu yina?

Na kulandaka mbikudulu ya Yezu, bamvita ya ngolo tavanda, bimbefo, nzala, mambi takuma mingi, mpi kunikana ya ntoto. Yezu tubaka mpi nde bantu tasamuna nsangu ya mbote ya Kimfumu ya Nzambi na ntoto ya mvimba. Keti beto kemona mambu yai na ntangu na beto? Inga! Na yau, yai kele kidimbu yina kemonisa nde Yezu keyala na zulu. Yandi tasukinina ve na kumanisa mambi na nsi-ntoto.