Kapu 1

Bansangu Mekatuka na Zulu

YA KYELEKA, Biblia yonso kele nsangu ya mekatuka na zulu, yina Tata na beto ya zulu mepesaka sambu na ndongolo na beto. Kansi, kiteso ya bambula 2000 meluta, bansangu zole ya sipesiali kupesamaka na wanzyo yina “ke telamaka na meso ya Nzambi.” Zina na yandi Gabriele. Beto tala mambu yai zole ya mfunu ya yandi kwisaka kutadila ntoto.

Beto kele na mvu 3 N.T.B. Na bangumba ya Galilea, mbala ya nkaka ntama mingi ve ti Yeruzalemi, kezingaka nganga-Nzambi mosi ya Yehowa zina na yandi Zakaria. Yandi ti nkento na yandi Elisabeti, bau mekuma minunu. Mpi bau kele ti bana ve. Yai kele mbala ya Zakaria ya kusala kisalu ya kinganga-Nzambi na tempelo ya Nzambi na Yeruzalemi. Na kintulumukina, Gabriele mekwisa kumonana na diboko ya kibakala ya mesa ya kimenga ya ndumbu.

Zakaria mewa boma ya mingi mpenza. Kansi Gabriele melembika boma na yandi, na kutubaka nde: “Zakaria, kuwa boma ve, sambu Nzambi me ndima mambu ya nge me lomba. Nkento na nge Elisabeti ta butila nge mwana ya bakala. Nge ta pesa yandi zina: Yoane.” Gabriele melanda na kutuba nde: Yandi “ta vanda muntu ya nene na meso ya Mfumu Nzambi” mpi yandi ta “yidikila [Yehowa, NW] bantu ya kuyilama.”

Kansi, Zakaria lenda ve kundima yau. Yau kemonana mpenza nde yau lenda kusalama ve nde yandi ti Elisabeti kukuka kubuta mwana na bamvula na bau. Ebuna Gabriele metubila yandi nde: “Mutindu nge me kwikila yo ve, nge ta kuma baba tii na kilumbu yina ya mambu yai ta bwa.”

Na ntangu yina, bantu na nganda kekudiyufula sambu na inki Zakaria mekinga mingi na kati ya tempelo. Na nsukansuka, ntangu yandi mebasika, yandi kekuka ve kutuba kansi yandi kekuka kaka kusala bidimbu ti maboko na yandi, ebuna bau mebakisa nde yandi memona kima mosi ya kuluta ngolo ya bantu.

Ntangu Zakaria memanisa nsungi ya kisalu na yandi na tempelo, yandi mevutuka na nzo na yandi. Na nima ya mwa ntangu, yau mesalama mpenza​—⁠Elisabeti mekuma na divumu! Ntangu yandi kevingila kubutuka ya mwana na yandi, Elisabeti mebumbana na nzo na yandi ntama ti bantu bangonda tanu.

Na nima, Gabriele mekwisa kumonana dyaka. Mpi na nani yandi ketuba? Yau kele na mwana-ndumba mosi ya mekwelaka ntete ve zina na yandi Maria ya mbanza ya Nazareti. Inki nsangu yandi kepesa ntangu yai? Widikila! Gabriele ketubila Maria nde: “Nzambi me tala nge na disu ya mbote. Nge ta baka divumu; nge ta buta mwana ya bakala; nge ta pesa yandi zina: Yezu.” Gabriele keyika nde: “Yandi ta vanda muntu ya nene. Zina na yandi ta vanda Mwana ya [Muntu ya Kuluta Kuzanguka; . . . mpi yandi tayala mvula na mvula bonso ntotila na nzo ya Yakobi, NW]; kimfumu na yandi ta suka ve.”

Beto lenda kundima nde Gabriele kekudiwa nde yandi mebaka dibaku ya mbote na kupesa bansangu yai. Mpi ntangu beto tatanga mambu ya kuluta mingi na yina metala Yoane ti Yezu, beto tamona pwelele mpenza sambu na inki bansangu yai ya mekatuka na zulu kele mfunu mingi. 2 Timoteo 3:16; Luka 1:5-33.

▪ Tanga bansangu ya mfunu zole ya mepesama yina mekatuka na zulu?

▪ Nani kepesa bansangu yango, mpi na banani yau mepesama?

▪ Sambu na inki bansangu yango kele mpasi mingi na kukwikila?