Kapu 8

Bau Metina Muntu ya Nku

YOZEFI metedimisa maria sambu na kuzabisa yandi nsangu ya nswalu mpenza. Wanzyo ya Yehowa mekatuka kumonana na yandi, na kutubaka nde: “Telama, baka mwana ti mama na yandi, beno tina na nsi ya Ezipte, ebuna beno vanda kuna tii kuna ya mono ta tubila nge na kukatuka. Sambu Erode ta sosa mwana sambu na kufwa yandi.”

Nswalu, bau yonso tatu metina. Ntangu melunga kibeni, sambu Erode mebakisa nde bandwenga kukusaka yandi mpi bau mekwendaka na insi na bau. Yibuka nde, yau lombamaka nde bau vutuka sambu na kutubila yandi kana bau monaka Yezu. Erode kele na makasi. Ebuna sambu na kusosa kufwa Yezu, yandi mepesa nswa sambu bau kufwa bana ya babakala yonso na Betelemi mpi na distriki na yau, kubanda na bayina kele na bamvula zole kita. Yandi metula ntalu ya bamvula yina na kutadilaka nsangu ya yandi kubakaka na ntwala na bandwenga yina kukatukaka na ndambu ya Esti.

Kugondama ya bana-ndwelo ya babakala yonso kele dyambu mosi ya mpasi na kumona! Basoda ya Erode kekota na konso nzo na kingolongolo. Mpi ntangu bau kekuta mwana-ndwelo ya bakala, bau fwete kubotula yandi na maboko ya mama na yandi. Beto kezaba ve bana-ndwelo ikwa bau kufwaka, kansi bidilu ya mingi ti mabokuta ya bamama kelungisa mbikudulu mosi na kati ya Biblia yina kupesamaka na nzila ya mbikudi ya Yehowa, Yeremia.

Na ntangu yina, Yozefi ti dibuta na yandi mekuma mbotembote na Ezipte, mpi ntangu yai bau kezinga kuna. Kansi na mpimpa mosi, wanzio ya Yehowa mekwisa dyaka kumonana na Yozefi na ndosi. Wanzyo ketuba nde: “Telama, baka mwana ti mama na yandi, ebuna beno vutuka na nsi ya Israele, sambu bayina zolaka kufwa mwana, bo me fwaka.” Ebuna, sambu na ndungisa ya mbikudulu ya nkaka ya Biblia yina ketuba nde Mwana ya Nzambi tabingama na Ezipte, dibuta mevutuka na insi na bau.

Yau kemonana bonso nde Yozefi kele na ngindu ya kutunga na Yudea, kisika bau vandaka kuzinga na mbanza ya Betelemi na ntwala bau kutina na Ezipte. Kansi yandi mewa nde mwana ya Erode ya bakala Arkelausi keyala na Yudea, mpi na ndosi ya nkaka Yehowa mekebisa yandi sambu na kigonsa. Ebuna Yozefi ti dibuta na yandi mesala nzyetolo na ndambu ya Nordi mpi bau mevanda na mbanza ya Nazareti na Galilea. Yezu meyedila awa na kimvuka ya bantu yai, ntama ti luzingu ya mavula ya lusambu ya Bayuda. Matayo 2:​13-23; Yeremia 31:15; Ozea 11:1.

▪ Ntangu bandwenga mevutuka ve, inki kima ya mpasi Mfumu Erode mesala, kansi inki mutindu Yezu metaninama?

▪ Ntangu bau mekatuka na Ezipte, sambu na inki Yozefi mevanda dyaka ve na Betelemi?

▪ Inki bambikudulu ya Biblia melungana na nsungi yai?