Kapu 9
Luzingu ya Bumwana ya Yezu na Dibuta
NTANGU Yezu ke na kuyela na Nazareti, yau kele mbanza ya fyoti, ya kukonda mfunu. Yau kele na insi ya miwanda na ndambu ya mebingama Galilea, Ntama ve ti muwanda ya kitoko ya Yezrile.
Ntangu Yezu, ngatu melungisa bamvula kiteso ya zole, Maria ti Yozefi mekatuka ti yandi na Ezipte sambu na kunata yandi awa, na ntembe ve, yandi kele mwana kaka mosi ya Maria. Kansi sambu na ntangu mingi ve. Na nima ya mwa ntangu, Yakobo, Yozefi, Simoni, ti Yuda mebutuka, ye Maria ti Yozefi kubutaka mpi bana ya bankento. Na ntembe ve, ntalu ya kuluta fyoti ya baleke ya Yezu ya babakala ti ya bankento kele kiteso ya sambanu.
Yezu kele mpi ti bampangi yankaka. Beto meyita kuzaba kisoni na yandi ya mbuta Yoane, yina kezingaka na bakilometere mwa mingi na Yudea. Kansi muntu ya kezingaka penepene na Galilea kele Salome, yina na ntembe ve kele mpangi ya Maria ya nkento. Salome bau mekwelaka yandi na Zebede, ebuna bana na bau ya babakala zole, Yakobo ti Yoane, lenda kuvanda bisoni ya Yezu. Beto kezaba ve kana na ntangu yandi keyela, Yezu kelutisaka ntangu mingi ti bana yai ya babakala, kansi na nima bau mekuma bankundi na yandi ya ngolo.
Yozefi fwete kusala ngolo sambu na kudisa dibuta na yandi ya kekuma nene. Yandi kele nketi ya nti. Yozefi mesansa Yezu bonso mwana na yandi mosi, yau yina Yezu kebingama “mwana ya sharpantie.” Yozefi melongaka mpi Yezu na kuvanda nketi ya nti, mpi yandi melonguka yau mbote. Yau yina bantu ketubila Yezu na nima nde: “Yandi kele sharpantie.”
Luzingu ya dibuta ya Yozefi kele ya kutungama na lusambu ya Yehowa Nzambi. Na kulandaka Nsiku ya Nzambi, Yozefi ti Maria kepesaka bana na bau malongi ya kimpeve ‘ntangu bau kele ya kuvanda na nzo na bau, ntangu bau ketambula na nzila, ntangu bau kekwenda kulala, mpi ntangu bau ketelama.’ Sinagoga mosi kele na Nazareti, mpi beto lenda kundima nde Yozefi mpi kekwendaka mbala na mbala kumosi ti dibuta na yandi na kusambila kuna. Kansi, na ntembe ve, bau keyangalala mingi sambu na banzyetolo ya mbala na mbala ya kukwenda na tempelo ya Yehowa na Yeruzalemi. Matayo 13:55, 56; 27:56; Marko 15:40; 6:3; Kulonga 6:6-9, NW.
▪ Ntalu ya kuluta fyoti ya baleke ya Yezu ya babakala ti ya bakento kele ikwa, mpi tanga bazina ya ndambu na kati na bau?
▪ Tanga bisoni tatu ya Yezu yina mezabanaka mbote?
▪ Inki kisalu ya kinsuni Yezu melonguka, mpi sambu na inki?
▪ Inki malongi ya mfunu Yozefi kepesaka na dibuta na yandi?