Kapu 14

Balongoki ya Ntete ya Yezu

NA NIMA ya bilumbu 40 na ntoto makanga, Yezu mevutuka na Yoane, yina kubotikaka yandi. Ntangu yandi kepusana, na ntembe ve, Yoane kesonga yandi diboko mpi ketubila bayina kele pana nde: “Tala Mwana-dimeme ya Nzambi, yina ke katulaka masumu ya bantu yonso! Yandi yai muntu ya mono vandaka kuzabisa beno ntangu mono tubaka nde: ‘Muntu mosi ke kwisa na nima na mono, yandi me luta mono, sambu yandi vandaka kuzinga ntangu mono vandaka me butuka ntete ve.’ ” Ata Yoane kele mbuta ya Yezu, Yoane kezaba nde Yezu zingaka na ntwala na yandi bonso muntu ya kimpeve na zulu.

Kansi, mwa bamposo na ntwala, ntangu Yezu kwisaka kubaka mbotika, yau kemonana nde Yoane zabaka kibeni ve nde Yezu kuvandaka muntu ya fwete kukuma Mesia. Yoane kendima nde: “Mono zabaka ve kana yandi ta vanda nani, kansi mono kwisaka kubotika bantu na masa sambu na kusonga bantu ya Israele kana yandi kele nani.”

Yoane kelanda na kutendula na bawi na yandi mambu ya kubwaka ntangu Yezu kubakaka mbotika nde: “Mono monaka Mpeve Santu ke katuka na zulu, [yau] ke kwisa kukulumuka bonso pizio, ebuna [yau] kwisa kuvanda na zulu ya ntu ya Yezu. Mono zabaka yandi ntete ve kana yandi kele nani, kansi Nzambi yina tindaka mono na kubotika bantu na masa yandi tubilaka mono nde: ‘Nge ta mona mpeve-santu ke kwisa kukulumuka, [yau, NW] ta kwisa kuvanda na zulu ya ntu ya muntu mosi; yandi yina muntu ta botikaka bantu na [m]peve.’ . . . Mono monaka mambu yina, mono mpi kezabisa beno nde yandi kele Mwana-Nzambi.”

Na kilumbu ya kulanda Yoane kele ya kutelama ti balongoki na yandi zole. Dyaka, ntangu Yezu kepusana, Yandi ketuba nde: “Tala Mwana-dimeme ya Nzambi!” Ntangu bau mewa mpila yina, balongoki yai zole ya Yoane mbotiki melanda Yezu. Mosi na kati na bau kele Andre, mpi yina ya nkaka kele yandi kibeni muntu ya kusonikaka mambu yai, zina na yandi kuvandaka mpi Yoane. Na kutadila bansangu ya beto kele na yau, Yoane yai kele mpi kisoni ya Yezu, yandi kemonana bonso mwana ya mpangi ya Maria ya nkento, Salome.

Ntangu yandi mebaluka mpi memona Andre ti Yoane kelanda yandi, Yezu meyufula nde: “Beno ke sosa nki?”

Bau meyufula nde: “Rabi, nge ke zingilaka wapi?”

Yezu mevutula nde: “Beno kwisa, beno ta mona.”

Yai kele penepene na ntangu ya iya na nima ya midi, mpi Andre ti Yoane mebikala ti Yezu na kitini ya kilumbu yina kubikalaka. Na nima Andre kele na kyese kibeni na mpila nde yandi mekwenda nswalu na kubinga mpangi na yandi, yina bau kebingaka Piere. Yandi metubila yandi nde: “Beto me mona Mesia.” Mpi yandi menata Piere na Yezu. Yau kemonana nde na ntangu yango yina, Yoane mekwenda kusosa mpangi na yandi ya bakala Yakobo mpi menata yandi na Yezu; kansi, mutindu yau kele kikalulu na yandi, Yoane ketubila ve dyambu yai ya ketadila yandi mosi na Evanzile na yandi.

Na kilumbu ya kulanda, Yezu memona Filipo, muntu ya Betsaida, mbanza ya kisina ya Andre ti Piere. Yandi mebingisa yandi nde: “Kwisa landa mono.”

Na nima, Filipo memona Natanaele, yina bau kebingaka mpi Bartelemi, mpi yandi metubila yandi nde: “Beto me mona muntu yina ya Moize sonikaka na mikanda ya Bansiku sambu na yandi, muntu yina ya baprofete mpi vandaka kutuba. Yandi kele Yesu, mwana ya Yozefi ya bwala Nazareti.” Natanaele kedyengisa mbundu. Yandi meyufula nde: “Keti mambu ya mbote lenda katuka na Nazareti?”

Filipo mebinga nswalunswalu nde: “Kwisa kutala.” Ntangu bau mekwisa na Yezu, Yezu metubila Natanaele nde: “Tala muntu ya kieleka mpenza ya Israele. Mambu ya luvunu kele ve na yandi.”

Natanaele meyufula nde: “Nki mutindu nge me zabila mono?”

Yezu mevutula nde: “Ntangu Filipo me binga nge ntete ve, mono monaka nge me vanda na nsi ya nti ya bafige.”

Natanaele meyituka. Yandi ketuba nde: “Longi, nge kele Mwana-Nzambi! Nge kele ntotila na Israele!”

Yezu meyufula nde: “Keti nge me ndima mono kaka sambu mono me tubila nge nde mono monaka nge na nsi ya nti yina? Nge ta mona mambu ya nkaka ya kuyituka me luta yai.” Na nima yandi kesila nde: “Mono ke tubila beno mambu ya kieleka: Beno ta mona zulu ya kukanguka, bawanzio ya Nzambi ke tombuka ti ke kwisa kukulumuka na Mwana-muntu!”

Ntama mingi ve na nima ya mambu yai, kumosi ti balongoki na yandi ya mpa ya yandi mebaka, bau mekatuka na Muwanda ya Yordani mpi bau mekwenda na Galilea. Yoane 1:​29-51.

▪ Banani kele balongoki ya ntete ya Yezu?

▪ Inki mutindu Piere, mbala ya nkaka ti Yakobo, bau mesonga bau na Yezu?

▪ Inki mendimisa Natanaele nde Yezu kele Mwana-Nzambi?