Kapu 18

Yoane Mekita, Yezu Memata

NA NIMA ya Paki na printemps ya mvu 30 T.B., Yezu ti balongoki na yandi mekatuka na Yeruzalemi. Ata mpila yina, bau mevutuka ve na banzo na bau na Galilea kansi bau mekwenda na nsi ya Yudea, kuna bau kebotika bantu. Yoane Mbotiki vandaka kusala kisalu ya mutindu mosi kiteso ya mvula mosi melunga ntangu yai, mpi yandi kele kaka ti balongoki ya kevukana ti yandi.

Na kutuba ya mbote, Yezu yandi mosi kebotika ve, kansi balongoki na yandi kesala yau na lutwadisu na yandi. Mbotika na bau kele na ntendula mosi bonso yina ya Yoane kusalaka, yau kele kidimbu ya mbalula ya ntima ya Bayuda sambu na kusumuka na bau na ngwakana ya Nsiku ya Nzambi. Kansi, na nima ya lufutumuku na yandi, Yezu metuma balongoki na yandi na kupesa mbotika yina kele ti ntendula ya kuswaswana. Bubu yai, mbotika ya Bukristu kele kidimbu ya kudipesa ya muntu yandi mosi sambu na kusadila Yehowa Nzambi.

Kansi, na luyantiku yai ya kisalu ya Yezu, bau zole, Yoane ti yandi, ata bau kesala ya kugambula, bau kelonga mpi kebotika bantu yina kebalula ntima. Kansi balongoki ya Yoane kewa kimpala mpi kebokutila yandi sambu na Yezu nde: “Longi . . . yandi ke botika bantu ntangu yai, bantu yonso mpi ke kwenda na yandi.”

Na kisika ya kuwa kimpala, Yoane keyangalala sambu na ndungunu ya Yezu ye mpi kezola nde balongoki na yandi kuyangalala. Yandi meyibuka bau nde: “Beno mosi kele batemwe na mambu yai ya mono tubaka nde: ‘Mono kele Mesia ve, kansi Nzambi me tindaka mono na ntwala ya Mesia.’ ” Ebuna yandi mesadila kingana ya kitoko nde: “Mwana-nkento yina ke kwela, yandi kele ya mwana-bakala yina ke kwela yandi. Nduku ya mwana-bakala kele ya kuyilama; yandi ke vingila yandi. Ebuna yandi ke na kiese kana yandi me wa ndinga ya mwana-bakala yina. Mono ke na kiese ya mutindu yina; ntangu yai kiese na mono kele ya kulunga.”

Yoane, bonso nduku ya bakala yina kekwela, kuwaka kyese kiteso mosi bangonda sambanu na ntwala ntangu yandi songaka balongoki na yandi na Yezu. Ndambu na kati na bau kukumaka bamambere ya makwisa ya kalasa ya nkento ya zulu ya Kristu, kalasa yina tatungama ti Bakristu ya kupakulama na mpeve. Yoane kezola nde balongoki na yandi ya sesepi kulanda Yezu, sambu lukanu na yandi kele ya kubongisa nzila sambu na lunungu ya kisalu ya Yezu yina tabuta mbuma. Bonso Yoane Mbotiki ketendula nde: “Muntu yina fwete kumata, kansi mono fwete kukita.” (NW)

Yoane, longoki ya mpa ya Yezu, yina vandaka mpi ntete longoki ya Yoane Mbotiki, kesonika na nima mambu ya metala kisina ya Yezu mpi mfunu ya kisalu na Yandi na luguluku ya bantu, na kutubaka nde: “Muntu yina katukaka na zulu, yandi me luta bantu yonso. . . . Tata ke zolaka Mwana na yandi; yandi me pesaka kiyeka yonso na maboko na yandi. Konso muntu yina me ndima Mwana yina na ntima na yandi, yandi ke na moyo ya mvula na mvula; kansi konso muntu ke lemvukilaka Mwana yina ve, yandi ta baka moyo ve kansi Nzambi ta wilaka yandi makasi.”

Ntama mingi ve na nima ya Yoane Mbotiki metubila kukita ya kisalu na yandi, Ntotila Erode mekanga yandi. Erode mebakaka Erodiade, nkento ya mpangi na yandi Filipo, bonso nkento na yandi, mpi ntangu Yoane memonisa bisalu na yandi ya mbi na meso ya bantu yonso, Erode metula yandi na boloko. Ntangu Yezu mewa kukangama ya Yoane, yandi mekatuka na Yudea ti balongoki na yandi sambu na kwenda na Galilea. Yoane 3:22–4:3; Bisalu 19:4; Matayo 28:19; 2 Korinto 11:2; Marko 1:14; 6:​17-20.

▪ Inki kele ntendula ya mbotika ya kusalamaka na lutwadisu ya Yezu na ntwala ya lufutumuku na yandi? Mpi na nima ya lufutumuku na yandi?

▪ Inki mutindu Yoane memonisa nde mabokuta ya balongoki na yandi kele ya mpamba?

▪ Sambu na inki Yoane metulama na boloko?