Kapu 24

Sambu na Inki Yezu Kwisaka na Ntoto

KILUMBU ya Yezu ti balongoki na yandi iya na Kapernaumi mevanda ti bisalu mingi, bau memanisa ti bantu ya Kapernaumi yina kunatilaka bau bantu na bau yonso ya maladi sambu bau kubelula bau na nkokila. Ntangu ya kuvanda yandi mosi kuvandaka ve.

Awa beto mekuma na sukasuka ya kilumbu ya kulanda. Mudidi kele kaka, Yezu metelama mpi mebasika na nganda yandi mosi. Yandi mekwenda na kisika ya kugambuka kuna yandi lenda kusamba Tata na yandi na kingenga. Kansi, kingenga ya Yezu mekinga ve sambu ntangu Piere ti bayina ya nkaka memona nde yandi kele ve, bau mekwenda kusosa yandi.

Ntangu bau memona Yezu, Piere metuba nde: “Bantu yonso ke sosa nge.” Bantu ya Kapernaumi kezola Yezu kubikala ti bau. Bau keyangalala mpenza sambu na mambu yina ya yandi mesadila bau! Kansi, keti Yezu kwisaka na ntoto ntetentete sambu na kusala bimangu ya kubelula bantu mutindu yina? Inki yandi ketuba sambu na yau?

Na kutadila disolo mosi ya Biblia, Yezu mevutudila balongoki na yandi nde: “Beto kwenda na kisika ya nkaka na babwala yai kele awa penepene, sambu mono kwenda kulonga mpi kuna. Sambu yo kele mambu ya mono kwisilaka.” Ata bantu kebondila Yezu na kubikala, yandi ketubila bau nde: “Mono fweti zabisa Nsangu ya Mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.”

Ee, Yezu kwisaka na ntoto ntetentete sambu na kusamuna Kimfumu ya Nzambi, yina tanungisa zina ya Tata na yandi mpi tamanisa kimakulu bampasi yonso ya bantu. Kansi, na kupesa nzikisa nde Nzambi muntu kutindaka yandi, Yezu kebelula na mutindu mosi ya kimangu. Mutindu mosi, bamvunkama na ntwala, Moize kusalaka bimangu sambu na kumonisa nde yandi vandaka nsadi ya Nzambi.

Sesepi yai, ntangu Yezu mekatuka na Kapernaumi sambu na kwenda kulonga na bambanza ya nkaka, balongoki na yandi iya mekwenda ti yandi. Bau yonso iya kele: Piere ti mpangi na yandi Andre, mpi Yoane ti mpangi na yandi Yakobo. Nge tayibuka nde kaka na mposo yina ya meluta, bau bingisamaka sambu na kuvanda bankundi ya kisalu ya ntete ya Yezu sambu na kutambulaka ti yandi.

Nzyetolo ya kulonga ya Yezu na Galilea ti balongoki na yandi menunga mbote mpenza! Ee, nsangu ya kisalu na yandi mepanzana nkutu tii na Siria. Bibuka ya nene ya kukatukaka na Galilea, Yudea, mpi na simu ya nkaka ya Nzadi ya Yordani kelanda Yezu ti balongoki na yandi. Marko 1:​35-39; Luka 4:​42, 43; Matayo 4:​23-25; Kubasika 4:​1-9, 30, 31.

▪ Inki mambu mesalama na sukasuka na nima ya kilumbu ya kisalu ya mingi ya Yezu na Kapernaumi?

▪ Sambu na inki Yezu kutindamaka na zulu ya ntoto, mpi bimangu na yandi kele ti inki lukanu?

▪ Banani kekwenda ti Yezu na nzyetolo na yandi ya kusamuna ya Galilea, mpi inki mbutu Bisalu ya Yezu mebuta?