Kapu 29
Yandi Kesala Bisalu ya Mbote na Kisabatu
YAI kele printemps ya mvu 31 T.B. Mwa bangonda meluta kubanda Yezu kusolulaka ti nkento mosi na dibulu ya masa na Samaria ntangu bau katukaka na Yudea sambu na kukwenda na Galilea.
Ntangu yai, na nima ya kulonga mingi na kati ya Galilea, Yezu mevutuka dyaka na Yudea, kuna yandi kelonga na basinagoga. Na kufwanisa ti dikebi ya Biblia kepesa na kisalu na yandi ya Galilea, yau ketubila mambu fyoti sambu na yina metala kisalu ya Yezu na Yudea na mbala yai mpi na ntangu ya bangonda ya yandi salaka awa na nima ya Paki ya kulutaka. Na ntembe ve, kisalu na yandi bantu mingi kuyambaka yau ve mbote na Yudea bonso yau kusalamaka na Galilea.
Nswalu, Yezu mekwenda na mbanza ya nene ya Yudea, Yeruzalemi, sambu na Paki ya mvu 31 T.B. Awa, penepene na Kyelo ya Mameme ya mbanza, kele ti kiziba mosi ya bau kebingaka Betzata, kisika bantu ya maladi mingi, bifwa meso, ti bikata kekwisaka. Bau kekwikilaka nde bantu lenda kubeluka na kukotaka na kati ya masa ya kiziba na ntangu yau kenikanaka.
Yai kele Kisabatu, mpi Yezu memona muntu mosi yina mebelaka bamvula 38 melunga na kiziba yango. Ntangu yandi mezaba bunda ya mingi ya maladi ya muntu yango, Yezu meyufula nde: “Keti nge zola kubeluka?”
Yandi mevutudila Yezu nde: “[Mfumu, NW], kana masa me nikana, mono ke na muntu ve sambu na kutula mono na masa; kana mono meka na kwenda kuna, muntu ya nkaka me kulumuka ntete na ntwala na mono.”
Yezu metubila yandi nde: “Telama, baka mbanzi na nge, tambula ka nge.” Na ntangu yandi metuba mpila yina, muntu yango mebeluka na mbala mosi, mebaka mbanzi na yandi, mpi meyantika na kutambula!
Kansi ntangu Bayuda memona muntu yango, bau metuba nde: “Bubu kele [Kisabatu, NW], Bansiku na beto ke pesa nge nswa ve na kunata mbanzi na nge.”
Muntu yango mevutudila bau nde: “Muntu yina belulaka mono songaka mono nde: ‘Baka mbanzi na nge, tambula ka nge.’ ”
Bau meyufula nde: “Nani muntu yina tubilaka nge nde: ‘Baka mbanzi na nge, tambula ka nge’?” Yezu kukatukaka sambu na kibuka, mpi muntu yina kubelukaka kuzabaka ve zina ya Yezu. Kansi, na nima, Yezu mekutana ti muntu yango na tempelo, mpi muntu yango mezaba nani yina kubelulaka yandi.
Ebuna muntu ya kubelukaka mekwenda kumona Bayuda sambu na kutubila bau nde kele Yezu muntu kubelulaka yandi. Ntangu bau mezaba yau, Bayuda mekwenda na Yezu. Sambu na inki kikuma? Sambu na kuzaba kana na nsadisa ya nani yandi kekuka na kusala mambu yai ya kuyituka? Ve. Kansi na kukanga yandi kifu sambu yandi kesala mambu yai ya mbote na Kisabatu. Ye bau meyantika nkutu na kunyokula yandi! Luka 4:44; Yoane 5:1-16.
▪ Kiteso ya bantangu ikwa meluta kubanda Yezu kukwendaka na Yudea?
▪ Sambu na inki kiziba ya bau kebingaka Betzata mezabanaka mingi?
▪ Inki kimangu Yezu mesala na kiziba, mpi inki Bayuda mesala?