Kapu 36

Lukwikilu ya Nene ya Mfumu ya Basoda

NTANGU Yezu mesala Disolo na yandi na zulu ya Ngumba, yandi melungisa kiteso ya katikati ya kisalu na yandi. Disongidila nde yandi mebikala na mvula mosi ti kiteso ya bangonda uvwa sambu na kumanisa kisalu na yandi na zulu ya ntoto.

Ntangu yai, Yezu mekota na mbanza ya Kapernaumi, na nzyunga ya yandi kubongisaka kisalu na yandi. Awa bambuta bantu ya Bayuda mefinama na yandi. Mfumu ya basoda ya minkangu ya Roma yina kele mumpani, muntu mosi ya kele Muyuda ve, muntu kutindaka bau.

Nsadi ya zolwa ya mfumu ya basoda mefinama na kufwa na maladi ya ngolo, mpi yandi kezola Yezu kubelula nsadi na yandi. Bayuda mebondila kibeni Yezu sambu na mfumu ya basoda ya Roma nde: “Muntu yai me lunga nde nge sadisa yandi. Sambu yandi ke zolaka bantu na beto, yandi mpi muntu tungilaka beto nzo ya bisambu.”

Kukonda mbefula, Yezu mekwenda ti bantu yango. Kansi, ntangu bau mefinama, mfumu ya basoda metinda banduku na yandi na kutuba nde: “Mfumu, kwisa ve, sambu mono me fwana ve na kuyamba nge na nzo na mono. Mono me mona nde mono me fwana mpi ve na kwisa kumonana na nge.”

Kudikulumusa ya inki mutindu yai sambu na mfumu ya basoda yina meyikanaka na kutuma bantu ya nkaka! Kansi mbala ya nkaka yandi keyindula mpi Yezu, sambu yandi kezaba nde bikalulu na bau kebuyisaka Muyuda na kukutana ti bantu yina kele Bayuda ve. Ata Piere kutubaka nde: “Beno mosi zaba nde yo kele nsiku nde, Muyuda lenda vukana ve na muntu yina kele Muyuda ve, yandi mpi lenda kwenda kukota na nzo na yandi ve.”

Mbala ya nkaka sambu yandi kezola ve nde Yezu kumona mpasi sambu na luvwezo ya kikalulu yai, mfumu ya basoda metinda banduku na yandi na kulomba yandi nde: “Kansi tuba kaka na munoko, ebuna mpika na mono ta beluka. Mono mpi mono ke lemfukaka na bamfumu na mono, mono ke na basoda yina fweti lemfuka na mono. Kana mono tubila soda mosi: ‘Kwenda!’ yandi fweti kwenda. Kana mono tubila soda ya nkaka: ‘Kwisa!’ yandi fweti kwisa. Kana mono tubila mpika na mono: ‘Sala mambu yai!’ yandi fweti sala yo.”

Ee, ntangu Yezu mewa mambu yai, yandi meyituka. Yandi ketuba nde: “Mono ke tubila beno mambu ya kieleka: Mono me monaka lukwikilu ya mutindu yai ntete ve ata na muntu mosi ya Israele!” Na nima ya kubelula nsadi ya mfumu ya basoda, Yezu mesadila dibaku yango sambu na kutendula inki mutindu bantu yina kele ve Bayuda tabaka balusakumunu ya Bayuda ya kukonda lukwikilu kebuya.

Yezu ketuba nde: “Mono ke tubila beno nde bantu mingi ta katuka na ndambu ya este ti na ndambu ya weste, bo ta kwisa kuvanda na mesa na Kimfumu ya Nzambi ti Abrahami ti Izaki ti Yakobi. Kansi bantu yina zolaka kuvanda na Kimfumu, Nzambi ta losa bo na nganda, na mpimpa. Na kisika yina bo ta dilaka, bo ta kangisaka memo na bo ngolo.”

“Bantu yina zolaka kuvanda na Kimfumu . . . Nzambi ta losa bo na nganda, na mpimpa,” kele Bayuda na kinsuni yina kendimaka ve dibaku ya kupesamaka ntete na bau sambu na kuvanda bantotila ti Kristu. Abrahami, Izaki, ti Yakobi kele kifwani ya ngidika ya Kimfumu ya Nzambi. Yau yina, Yezu keta inki mutindu Bantu ya Makanda tayambama sambu na kutandama na mesa ya zulu, na mpila ya kutuba, “na kati ya Kimfumu ya mazulu.” (NW) Luka 7:​1-10; Matayo 8:​5-13; Bisalu 10:⁠28.

▪ Sambu na inki Bayuda mebondila Yezu sambu na muntu ya makanda yina kele mfumu ya basoda?

▪ Inki lenda kuvanda kikuma ya mfumu ya basoda kubingisaka ve Yezu na kukota na kati ya nzo na yandi?

▪ Inki Yezu kezola kutuba na bangogo na yandi ya nsuka?