Kapu 44

Yandi Melembika Mupepe ya Boma

KILUMBU ya Yezu mevanda ya kufuluka na bisalu ya mingi, na kati na yau, kulonga bibuka na lweka ya masa mpi na nima kutendudila balongoki na yandi bingana na kingenga. Ntangu nkokila melunga, yandi ketuba nde: “Beto sabukeno na simu.”

Na zulu ya Nzadi ya Galilea, na lweka ya masa, kele ti kisika mosi ya bau kebingaka Dekapoli, ngogo ya kekatuka na Kigreki deʹka, disongidila “kumi,” mpi poʹlis, disongidila “mbanza.” Bambanza ya Dekapoli kele mavula ya kutoma ya Greki, na ntembe ve Bayuda mingi mpi kezingaka pana. Kansi kisalu ya Yezu na ndambu yango kele fyoti kibeni. Ata nkutu na mbala yai, mutindu beto tamona yau na nima, bau mekandikila yandi na kubikala bantangu mingi.

Ntangu Yezu melomba nde bau kusabuka na simu ya nkaka, balongoki mebaka yandi na bwatu. Kansi, kukwenda na bau mezabana. Nswalu, bantu ya nkaka mepusa babwatu na bau sambu na kukwenda ti bau. Yau kele ntama mingi ve na kusabuka. Ya kyeleka, Nzadi ya Galilea kele mpenza dizanga ya nene ya kiteso ya bakilometere 20 na nda mpi kiteso ya bakilometere 12 na nene.

Beto kebakisa nde Yezu kele ya kulemba. Na yau, ntama ve na nima ya kukatuka na lweka ya masa, yandi melala na nima ya bwatu, metula ntu na yandi na zulu ya kibombi, mpi melala mpongi ya ngolo. Mingi na kati ya bantumwa kesabulaka mbote mpenza, bau melobaka mingi na Nzadi ya Galilea. Ebuna bau mebaka mukumba ya kusabula bwatu.

Kansi yau kele nzyetolo ya petepete ve. Sambu tiya kele ya ngolo na zulu ya kiziba, kiteso ya kuluta bametere 200 na zulu ya nivo ya nzadi, mpi sambu madidi kele kibeni mingi na bangumba yina kele mfinama, mupepe ya ngolo kebula bantangu ya nkaka mpi menata kitembo ya ngolo na kintulumukina na zulu ya dizanga. Yau yina mesalama ntangu yai. Ntama ve, kitembo meyantika kubula na bwatu mpi kenikisa yau ye kesosa kukota na kati ya bwatu, na mpila nde yau mefinama na kubaluka. Kansi Yezu kelanda na kulala!

Basabudi ya ngikana kesala ngolo sambu na kutedimisa bwatu. Ntembe kele ve nde bau meyitaka kusala ngolo sambu na kununga bitembo ya nkaka. Kansi, ntangu yai bau mesuka mayele. Na kubangaka sambu na luzingu na bau, bau metedimisa Yezu. Bau meboka nde: ‘Longi beto ke zola kufwa si; nge ke mona ata mpasi ve? Gulusa beto, beto ke zola kufwa!’

Ntangu yandi metelama, Yezu metuma mupepe ti nzadi nde: “Bika makelele! Vanda pima!” Na mbala mosi mupepe mesuka mpi nzadi mekuma nye. Na kubalukaka na balongoki na yandi, yandi meyufula nde: ‘Sambu na nki beno ke wa boma? Keti beno ke ntete na lukwikilu ve?’

Ntangu bau mewa mpila yina, boma ya ngolo mesimba balongoki. Bau meyantika na kuyulana bau na bau nde: ‘Muntu yai nki mutindu yandi kele? Ata mupepe ti masa mpi ke wila yandi!’

Ngolo ya inki mutindu Yezu kemonisa! Kundimisama ya inki mutindu na kuzaba nde Ntotila na beto kele ti ngolo na zulu ya bima ya lugangu mpi nde ntangu dikebi na yandi ya ngolo tatulama na zulu ya ntoto na beto na ntangu ya luyalu ya Kimfumu na yandi, bantu yonso tavanda na lutaninu ya bankuba ya ngolo yina kekatukaka na lugangu!

Mwa ntangu fyoti na nima ya kumana ya mupepe ya ngolo, Yezu ti balongoki na yandi mekuma na lweka ya masa na ndambu ya esti nkatu kigonsa. Mbala ya nkaka, babwatu yina ya nkaka kutaninamaka na mupepe yina ya ngolo mpi bau kuvutukaka na bwala na lutaninu. Marko 4:35–5:1; Matayo 8:​18, 23-27; Luka 8:​22-26.

▪ Dekapoli kele inki, mpi yau kele na wapi?

▪ Inki mambu lenda kunata mupepe ya ngolo na Nzadi ya Galilea?

▪ Ntangu bau memona nde mayele na bau mesuka, inki balongoki mesala?