Kapu 48

Yandi Mebikisa Nzo ya Yairusi mpi Mevutuka na Nazareti

YEZU mevanda ti kisalu mingi kilumbu yai​—⁠yandi mesala nzyetolo na masa katuka na Dekapoli, mebelula nkento yina kuvandaka ti nkubu, mpi mefutumuna mwana-nkento ya Yairusi. Kansi kilumbu memana ve. Na ntembe ve na ntangu Yezu kekatuka na nzo ya Yairusi, bifwa-meso zole kelanda na nima, na kubokaka nde: “Mwana ya Davidi, wila beto mawa!”

Na kubingaka Yezu nde “Mwana ya Davidi,” bantu yai kemonisa mpila yina lukwikilu nde Yezu kele mvingidi ya difwa ya kiti ya kimfumu ya Davidi, nde yandi kele Mesia ya kusilamaka. Kansi, Yezu kesala bonso yandi kewa ve milolu na bau ya kulomba lusadisu, ngatu sambu na kumeka lukwaminu na bau. Kansi, bantu yango keyambula ve. Bau kelanda Yezu kisika ya yandi kevandaka, mpi ntangu yandi mekota na nzo, bau melanda na kati ya nzo.

Kuna, Yezu meyufula nde: “Beno me kwikila nde mono lenda sala mambu yina?”

Bau mevutula na kundima yonso nde: “E, Mfumu!”

Ebuna, na kusimbaka meso na bau, Yezu ketuba nde: “Mambu yai yonso yo kuvanda kaka na beno bonso kele lukwikilu na beno!” Na mbala mosi bau mekuka na kumona! Kansi Yezu metuma bau na nsyamu yonso nde: “Beno keba! Beno kuzabisa mambu yai ve ata na muntu mosi!” Kansi ya kufuluka na kyese, bau mevila ntuma ya Yezu mpi metuba mambu na yandi na babwala yonso.

Kaka ntangu bantu yina mekatuka, bantu menata muntu mosi ya mpeve ya mbi mekumisaka baba na kati ya nzo. Yezu mekula mpeve ya mbi yango mpi na mbala mosi muntu yango meyantika na kutuba. Bantu keyituka sambu na bimangu yai, na kutubaka nde: “Na kati ya bantu ya Israele, beto me monaka ntete mambu ya mutindu yai ata mbala mosi ve.”

Bafarize mpi kele pana. Bau lenda ve kubuya bimangu yina, na kukonda lukwikilu sambu na ntima na bau ya mbi, bau kebefula dyaka nto ya ngolo ya Yezu, na kutubaka nde: “Mfumu ya bampeve ya mbi muntu ke pesaka yandi ngolo ya kubasisa bampeve ya mbi.”

Ntangu fyoti na nima ya mambu yai, Yezu mevutuka na bwala na bau na Nazareti, na mbala yai, yandi kele ti balongoki na yandi. Kiteso ya mvula mosi na ntwala, yandi kwendaka kutala sinagoga mpi longaka muna. Ata bantu kuyitukaka na kuwa bangogo na yandi ya kitoko na luyantiku, na nima, bau wilaka malongi na yandi makasi mpi mekaka na kufwa yandi. Ntangu yai, na nkenda yonso, Yezu kemeka na kusadisa dyaka bamfinangani na yandi ya ntama.

Ata nkutu na bisika ya nkaka bantu kefulukila Yezu, awa yau kemonana nde bau kesala mpila yina ve. Yau yina, na kilumbu ya Kisabatu, yandi mekwenda na sinagoga sambu na kulonga. Bantu mingi yina kewidikila yandi keyituka. Bau keyufula nde: “Mayele na yandi yai me katukila yandi wapi? Nki mutindu yandi ke sala mambu ya kuyituka mpidiyai? Keti yandi kele mwana ya sharpantie ve? Keti Maria kele mama na yandi ve? Keti Yakobo, Yozefi, Simoni ti Yude bo kele baleki na yandi ve? Keti bampangi na yandi yonso ya bankento kele awa na kati na beto ve? Ebuna mambu yai yonso yo ke katukila yandi wapi?”

Bau keyindula nde: ‘Yezu kele kaka muntu ya bwala bonso beto, beto monaka yandi keyela, mpi beto zaba dibuta na yandi. Inki mutindu yandi lenda kuvanda Mesia?’ Yau yina, ata banzikisa yonso kele​—⁠mayele ti bimangu na yandi ya nene​—⁠bau kebuya yandi. Sambu bau meyikanaka mingi, ata nkutu bampangi na yandi mosi metesa sakuba sambu na yandi, na kunataka Yezu na kusukisa nde: “Bo ke zitisaka profete ndambu yonso, kansi na bwala na yandi ti na dikanda na yandi ti na fami na yandi, bo ke zitisaka yandi ve.”

Ya kyeleka, Yezu keyituka sambu na kukonda ya lukwikilu na bau. Yau yina, yandi mesala ve ata kimangu mosi katula maboko ya yandi metula na zulu ya ndambu ya bambefo mpi mebelula bau. Matayo 9:​27-34; 13:​54-58; Marko 6:​1-6; Yezaya 9:⁠7.

▪ Na kubingaka Yezu nde “Mwana ya Davidi,” bifwa-meso kemonisa nde bau kekwikila na inki?

▪ Inki ntendula Bafarize kepesa sambu na bimangu ya Yezu?

▪ Sambu na inki yau kele nkenda sambu na Yezu na kuvutuka sambu na kusadisa bantu na Nazareti?

▪ Inki mutindu Yezu meyambama na Nazareti, mpi sambu na inki?