Kapu 51

Kugonda na Nkinsi Mosi ya Kilumbu ya Kubutuka

NA NIMA ya kupesa malongi na bantumwa na yandi, Yezu metinda bau zole-zole na teritware. Yau kemonana nde Piere mekwenda kumosi ti mpangi na yandi Andre, mutindu mosi mpi sambu na Yakobo ti Yoane, Filipo ti Bartelemi, Toma ti Matayo, Yakobo ti Tadeo; mpi Simoni ti Yudasi Iskariote. Bibuka zole-zole ya baevanzelizatere kesamuna nsangu ya mbote ya Kimfumu mpi kebelula na mutindu ya kimangu bisika yonso ya bau kekwenda.

Na ntangu yango yina, Yoane Mbotiki kele kaka na boloko. Ntangu yai yandi mesala kuna kiteso ya bamvula zole. Nge lenda kuyibuka nde Yoane kutubaka na meso ya bantu yonso nde yau kuvandaka mbi sambu na Erode Antipasi na kubaka Erodiade, nkento ya mbuta na yandi Filipo bonso nkento na yandi. Sambu Erode Antipasi vandaka kutuba nde yandi kelandaka Nsiku ya Moize, Yoane kutungululaka mbotembote mvukana yai ya bizumba. Yau yina, Erode kutulaka Yoane na boloko, mbala ya nkaka na bupusi ya Erodiade.

Erode Antipasi kezabaka nde Yoane kele muntu ya lunungu mpi nkutu yandi kewidikilaka yandi ti kyese. Yau yina, yandi kemona ve inki yandi lenda kusala yandi. Na ndambu ya nkaka, Erodiade keyinaka Yoane mpi kelanda na kusosa mpila ya kufwa yandi. Na nsukansuka, dibaku ya yandi vandaka kuvingila mekwisa.

Mwa ntangu fyoti na ntwala ya Paki ya mvu 32 T.B., Erode mesadisa nkinsi ya nene ya kilumbu ya kubutuka na yandi. Bantu na yandi ya nene ti bamfumu ya basoda, ye mpi bantu ya nene ya Galilea, bau yonso kele ya kuvukana sambu na nkinsi. Ntangu nkinsi kelanda, Salome, mwana-ndumba ya Erodiade yina yandi butaka ti bakala na yandi ya ntete Filipo, metindama na kati na kukina sambu na banzenza. Babakala yonso meyangalala na makinu na yandi.

Erode meyangalala mingi ti Salome. Yandi metuba nde: “Lomba mono konso kima ya nge zola. Mono ta pesa nge yo!” Yandi mezenga nkutu ndefi nde: “Konso kima yina ya nge ta lomba mono, mono ta pesa nge yo; ata ntoto yai ya mono ke yalaka, mono ta kaba yo na ndambu zole, ebuna mono ta pesa nge ndambu mosi.”

Na ntwala ya kupesa mvutu, Salome mekwenda kumona mama na yandi. Yandi meyula nde: “Nki kima mono fweti lomba?”

Dibaku yango melunga na nsukansuka! Erodiade mevutula nkatu kudyengisa mbundu nde: “Ntu ya Yoane-Batiste.”

Nswalu Salome mevutuka na Erode mpi melomba nde: “Mono zola nde nge pesa mono sesepi yai kaka ntu ya Yoane-Batiste na zulu ya dilonga.”

Erode mewa mpasi mingi na ntima. Kansi sambu banzenza na yandi kuwaka ndefi na yandi, yandi kewa nsoni na kukonda kulungisa yau, ata nkutu yau kelomba kugonda muntu ya kukonda makambu. Ebuna yandi mepesa ntuma, mpi na mbala mosi, ngondi ya ngolo mekwenda na boloko sambu na kulungisa ntuma yango. Ntama ve, yandi mevutuka ti ntu ya Yoane na zulu ya dilonga, mpi yandi mepesa yau na Salome. Ebuna, yandi menata yau na mama na yandi. Ntangu balongoki ya Yoane mewa mambu yina mesalama, bau mekwisa kukatula nitu na yandi mpi mezika yau, ye na nima bau menata nsangu yango na Yezu.

Na nima, ntangu Erode mewa nde Yezu kebelula bantu mpi kebasisa bampeve ya mbi, yandi kewa boma, na kubangaka nde Yezu kele kibeni Yoane ya mefutumuka na kati ya bafwa. Yau yina, yandi kele kibeni na mfunu ya kumona Yezu, yau kele ve sambu na kuwa malongi na yandi, kansi sambu na kuzaba kana yandi kele kibeni ti kikuma ya kubangila to ve. Matayo 10:​1-5; 11:1; 14:​1-12; Marko 6:​14-29; Luka 9:​7-9.

▪ Sambu na inki Yoane kele na boloko, mpi sambu na inki Erode kezola ve kufwa yandi?

▪ Na nsukansuka, inki mutindu Erodiade mekuka na kufwisa Yoane?

▪ Na nima ya lufwa ya Yoane, sambu na inki Erode kezola kumona Yezu?