Kapu 53

Mpusa ya Mfumu ya Kuluta Bantu

NTANGU Yezu medisa mafunda ya bantu na mutindu mosi ya kimangu, bantu keyituka. Bau ketuba nde: “Ya kieleka, muntu yai kele Profete yina ya beto ke waka nde yandi ta kwisa awa na nsi-ntoto.” Bau kesukisa ve kaka nde Yezu fwete kuvanda mbikudi yango yina ya kuluta Moize na nene, kansi mpi nde yandi tavanda mfumu mosi ya kuluta mbote kibeni. Yau yina, bau kesosa kukanga yandi sambu na kukumisa yandi ntotila.

Kansi, Yezu mebakisa mambu ya bantu kezola kusala. Na yau, yandi mekatuka nswalu sambu na kubuya nde bau kunata yandi na kingolongolo. Yandi mepanza bantu mpi metuma balongoki na yandi na kukota na bwatu na bau mpi na kuvutuka na ndambu ya Kapernaumi. Na nima, yandi mekwenda na ngumba sambu na kusamba. Na mpimpa yina, yandi kele kuna kaka yandi mosi.

Ntangu fyoti na ntwala ntongo kutana, Yezu metala tuka na kisika ya kuzanguka yina yandi kele mpi memona nde masa ya kitembo kenikisa nzadi sambu na mupepe ya ngolo. Na nsemo ya ngonda yina kele kibeni ya mumvimba, sambu Paki mefinama, Yezu memona bwatu ti balongoki na yandi kesala ngolo sambu na kutedimisa bwatu na kitembo. Bantu kesabula kibeni ti ngolo na bau yonso.

Na ntangu yandi memona mambu yai, Yezu mekulumuka na ngumba mpi meyantika kutambula na zulu ya kitembo na kwendaka kisika bwatu kele. Ntangu Yezu mekuma kisika ya bwatu kele, bwatu mesala kiteso ya bakilometere tanu to sambanu. Kansi, yandi melanda na kukwenda bonso nde yandi keluta. Ntangu balongoki memona yandi, bau meboka nde: “Yau kele mbona-meso!” (NW)

Yezu kevutula na nsyamisa yonso nde: “Yai mono. Beno vanda na boma ve.”

Kansi Piere ketuba nde: “Mfumu, kana yina kele nge, tubila mono mono mpi kwisa na zulu ya masa tii pana ya nge kele.”

Yezu mevutula nde: “Kwisa!”

Ebuna, Piere mebasika na bwatu, metambula na zulu ya masa na kukwenda na Yezu. Kansi, na kutalaka kitembo, Piere mewa boma, mpi ntangu yandi meyantika kudinda, yandi meboka nde: “Mfumu, gulusa mono!”

Na mbala mosi, na kutandulaka diboko na yandi, Yezu mesimba yandi, na kutubaka nde: “Nge muntu ya lukwikilu ya fioti, sambu na nki nge vandaka na ntima zole?”

Na nima ya Piere ti Yezu mekota dyaka na kati ya bwatu, mupepe memana, mpi balongoki keyituka. Kansi, keti bau fwete kuyituka? Kana bau kubakisaka “ntendula ya mampa” (NW) na kundimaka kimangu ya nene ya Yezu kusalaka mwa bantangu na ntwala ntangu yandi kudisaka mafunda ya bantu kaka ti mampa tanu mpi bambisi ya masa zole ya fyoti, ebuna yau zolaka kuyitukisa bau kibeni ve na mpila yandi lendaka kutambula na zulu ya masa mpi kulembika mupepe. Ata mpila yina, ntangu yai, balongoki mekumisa Yezu mpi ketuba nde: “Ya kieleka, nge kele Mwana-Nzambi.”

Mwa ntangu fyoti na nima, bau mekuma na Genezareti, plene ya kitoko mpi ya mbutu, yina kele penepene na Kapernaumi. Kuna bau mekanga bwatu. Kansi ntangu bau mebasika na bwatu, bantu mezaba Yezu, mpi bau mekwenda na nzyunga ya insi, na kusosa bantu ya maladi. Ntangu bau kenata bau na zulu ya bambeto na bau mpi kesimba kaka nsongi ya lele na yandi ya zulu, bau kebeluka kimakulu.

Na ntangu yina, bantu ya kumonaka na meso na bau mafuku ya bantu ya Yezu kudisaka na mutindu mosi ya kimangu mesengumuna nde Yezu mekatuka. Yau yina, ntangu babwatu ya fyoti ya kukatukaka na Tiberiade mekuma, bau mekota na kati ya babwatu yango mpi bau mekwenda na Kapernaumi sambu na kusosa Yezu. Ntangu bau memona yandi, bau meyufula nde: “Longi, nki ntangu nge kwisaka kukuma awa?” Yezu menganina bau, mutindu beto tamona yau. Yoane 6:​14-25; Matayo 14:​22-36; Marko 6:​45-56.

▪ Na nima ya Yezu medisa bantu na mutindu mosi ya kimangu, inki bantu kezola kusala yandi?

▪ Inki Yezu memona tuka na ngumba yina ya yandi kubumbanaka, mpi inki yandi mesala na nima?

▪ Sambu na inki balongoki fwete kuyituka kibeni ve sambu na mambu yai?

▪ Inki mesalama na nima ya bau mekuma na lweka ya masa?