Kapu 58

Mampa ti Kifunisu

BANTU mingi kelanda Yezu na Dekapoli. Bamingi mesala nzyetolo ya nda kibeni sambu na kukuma na ndambu yai ya Bantu ya Makanda mingi kezingaka sambu na kuwidikila yandi mpi na kubeluka na maladi na bau. Bau menata bitunga ya nene, ya bau kesadilaka sambu na kunata madya ntangu bau kekwendaka na bandambu ya Bantu ya Makanda.

Kansi, na nima ya mwa ntangu, Yezu mebinga balongoki na yandi mpi metuba nde: “Mono ke mona mawa sambu na bantu yai, sambu bo kele ti mono bilumbu tatu ya mvimba; bo ke na kima ya kudia ve. Kana mono vutula bo na banzo na bo ti nzala, bo ta lemba mingi na nzila, sambu bantu ya nkaka na kati na bo me katuka ntama.”

Balongoki keyufula nde: “Awa na ntoto ya zelo na zelo, wapi beto lenda mona bima ya kudia sambu na kupesa bantu yai yonso?”

Yezu meyufula nde: “Beno ke na mampa ikwa?”

Bau mevutula nde: “Mampa nsambwadi ti ndambu ya bambisi ya fioti ya masa.”

Na kutumaka bantu na kuvanda na ntoto, Yezu mebaka mampa ti bambisi ya masa, mesamba Nzambi, mpi meyantika na kupesa yau na balongoki na yandi. Balongoki mekabisila bantu, bau yonso medya mpi mefuluka. Na nima, ntangu bau kelokuta bitini yina kubikalaka, bau mefulusa bitunga nsambwadi, ata nkutu bantu yina kudyaka yau kele kiteso ya babakala 4000 ti bankento mpi bana!

Yezu mepanza bibuka, yandi mekota na bwatu ti balongoki na yandi, mpi mesabuka na ndambu ya westi ya Nzadi ya Galilea. Awa Bafarize, mbala yai bau kele ti bamambere ya Saduse, kesosa kumeka Yezu na kulombaka yandi na kusonga kidimbu mosi ya kekatuka na zulu.

Na kuzabaka bikesa na bau sambu na kusosa kumeka yandi, Yezu kevutula nde: “Ntangu ntangu ke dinda, beno ke tubaka nde: ‘Mbasi ta vanda kilumbu ya mbote, sambu zulu me kuma mbwaki.’ Ebuna na suka-suka, beno ke tubaka nde: ‘Mvula ta noka bubu sambu zulu me kuma mbwaki ti ndombe.’ Kana beno ke tala zulu, beno lenda zaba na ntwala kana nki mutindu kilumbu yina ta vanda; kansi beno zaba ve kutendula bidimbu yina ke tadilaka bilumbu.”

Sambu na dyambu yai, Yezu mebinga bau mbandu ya mbi mpi ya bizumba mpi mekebisa bau nde, mutindu yandi kutubilaka Bafarize na ntwala, bau tabaka ve ata kidimbu mosi katula kidimbu ya Yonasi. Na kukatukaka, yandi ti balongoki na yandi mekota na kati ya bwatu, mpi mekwenda na Betsaida na ndambu ya nordi-esti ya Nzadi ya Galilea. Na nzila, balongoki mesengumuna nde bau kuvilaka na kunata mampa, sambu bau kele kaka ti dimpa mosi sambu na bau yonso.

Na kuyibukaka disolo na yandi ya yandi mekatuka kuta ti Bafarize mpi Basaduse, bantu ya Erode, Yezu kekebisa nde: “Beno keba, beno tala mbote sambu na [kifunisu, NW] ya Bafarize ti ya Erode.” Yau kemonana nde, ntangu yandi metubila kifunisu, balongoki keyindula nde Yezu ketubila kidiba na bau ya kukonda kunata mampa, yau yina bau meyantika na kutubana sambu na dyambu yango. Na ntangu yandi memona kukonda kubakisa na bau, Yezu metuba nde: “Sambu na nki beno ke tula ntembe nde mampa kele ve?”

Ntama mingi ve, Yezu kupesaka mampa sambu na mafunda ya bantu na mutindu mosi ya kimangu, na kusalaka kimangu yai ya nsuka mbala ya nkaka kaka kilumbu mosi to zole na ntwala. Bau fwete kuzaba nde yandi kekudibanza ve sambu na mampa ya kyeleka ya mekonda. Yandi keyibusa bau nde: “Beno me vila mambu yina ya mono salaka ntangu mono zengaka mampa tanu sambu na babakala yina mile tanu? Na bitini yina bikaka na ntoto beno fulusaka bitunga ikwa?”

Bau mevutula nde “bitunga kumi na zole.”

“Ntangu mono zengaka mampa nsambwadi sambu na babakala mile iya? Beno fulusaka bitunga ikwa?”

Bau kevutula nde: “Bitunga nsambwadi.”

Yezu keyufula nde: “Keti beno me bakisa ntete ve? Nki mutindu beno ke bakisa ve nde mono vandaka kutubila beno ve sambu na mampa? Kansi beno keba sambu na [kifunisu, NW] ya Bafarize ti ya Basaduse!”

Na nsukansuka, balongoki mebakisa. Kifunisu, kima mosi ya kefunisaka mpi kevimbisaka mampa, kuvandaka ngogo ya kusadilamaka sambu na kutendula mbebisa. Ebuna, ntangu yai, balongoki mebakisa nde Yezu kele na kusadila kifwani, nde yandi kekebisa bau na kutomatala sambu na “malongi ya Bafarize ti Basaduse,” yina kele ti bupusi ya kubebisa. (Beto bantu metengimisa bisono.) Marko 8:​1-21; Matayo 15:32–16:⁠12.

▪ Sambu na inki bantu kenata bitunga ya nene ya madya?

▪ Na nima ya kukatuka na Dekapoli, inki nzyetolo ya bwatu Yezu mesala?

▪ Inki kukonda kubakisa balongoki kele na yau sambu na ntubilu ya Yezu na kifunisu?

▪ Inki Yezu kezola kutuba na ntubilu “kifunisu ya Bafarize ti ya Basaduse”?