Kapu 62

Dilongi ya Kudikulumusa

NA NIMA ya kubelula mwana-bakala yina kuvandaka ti mpeve ya mbi na kisika mosi ya kele mfinama ti Sezarea-Filipo, Yezu memona mbote na kuvutuka na Kapernaumi. Kansi, yandi kezola kuvanda yandi mosi ti balongoki na yandi na nzyetolo na mpila nde yandi lenda kubongisa bau dyaka sambu na lufwa na yandi mpi na mikumba na bau ya bau talungisa na nima. Yandi metendudila bau nde: “Bo ta pesa Mwana-muntu na maboko ya bantu, ebuna bo ta fwa yandi. Kansi na kilumbu ya tatu Nzambi ta tedimisa yandi na lufwa.”

Ata nkutu Yezu kutubaka dyambu yai na ntwala, mpi balongoki tatu kumonaka mpenza lukituku ntangu “kukwenda” na yandi kutubilamaka, balongoki na yandi kebakisa kaka ve dyambu yina. Ata nkutu mosi ve na kati na bau kemeka na kubuya nde yandi tagondama, bonso Piere kusalaka yau na ntwala, bau kewa boma na kuyufula yandi mambu mingi na yina metala dyambu yango.

Na nsukansuka, bau mekwisa na Kapernaumi yina kuvandaka bonso bwala ya Yezu kukangamaka mingi na ntangu ya kisalu na yandi. Yau kele mpi mbanza ya Piere ti bantumwa ya nkaka mingi. Kuna, bantu yina kefutisaka mpaku ya tempelo mekwisa na Piere. Ngatu sambu na kukotisa Yezu na nsadilu mosi ya kendimamaka, bau keyufula nde: “Keti longi na beno ke futaka [badrakme zole ya mpaku ya (tempelo), NW]?”

Piere mevutula nde: “E si.”

Yezu, yina kukumaka mbala ya nkaka na nzo ntangu fyoti na nima, kele na kuzaba mambu yina mesalama. Ebuna, ata nkutu na ntwala Piere kutuba mambu yango, Yezu keyufula nde: “Simoni, nki nge ke banza? Banani ke futaka mpaku na bamfumu ya nsi-ntoto? [Bana na bau, NW] to banzenza?”

Piere mevutula nde: “Banzenza.”

Yezu metuba nde: “Ebuna kana mpidina [bana] lenda futa mpaku ve.” Sambu Tata ya Yezu kele Ntotila ya luyalanganu, Muntu yina ya bau kesambilaka na tempelo, yau melombama kibeni ve nde Mwana ya Nzambi kufuta mpaku ya tempelo. Yezu ketuba nde: “Kansi beto me zola ve kupesa bantu yai mpasi na ntima. Ebuna kwenda na dizanga, losa ndobo na masa; benda mbisi ya ntete ya nge me loba. Ebuna nge ta mona kibende mosi ya [sitatere, NW], (badrakme iya) na munoko na yo. Yo me fwana na kufutila mpaku . . . sambu na mono ti nge. Baka yo, kwenda kufuta mpaku na beto na bo.”

Ntangu balongoki mevukana na nima ya kuvutuka na bau na Kapernaumi, ngatu na nzo ya Piere, bau keyufula nde: “Nani me luta nene na Kimfumu ya Nzambi?” Yezu kezaba kima ya mebasisa ngyufula na bau, na kuzabaka mambu yina vandaka kusalama na kati na bau ntangu bau vandaka kusolula na nima na yandi na kukatuka na bau na Sezarea-Filipo. Ebuna yandi keyufula nde: “Sambu na nki beno vandaka kwenda kutula ntembe na nzila?” Balongoki mewa nsoni, bau mevanda pima, sambu bau kutulaka ntembe na kati na bau sambu na kuzaba kana nani kele ya kuluta nene.

Na nima ya bamvula penepene na tatu ya malongi ya Yezu, keti yau kemonana dyambu ya ngituka nde balongoki kuvanda na ntembe ya mutindu yina? Ya kyeleka, yau kemonisa bupusi ya ngolo ya kukonda kukuka ya bantu, ti ya kisina ya mabundu na bau. Dibundu ya Bayuda kisika balongoki kusansamaka vandaka kutula mfunu mingi na bapozisio to ndonga na mambu yonso. Dyaka, mbala ya nkaka Piere, sambu na lusilu ya Yezu kupesaka yandi na kubaka “bana-fungula” ya Kimfumu, vandaka kudiwa ya kuluta nene. Yakobo ti Yoane lendaka kuvanda ti bangindu ya mutindu mosi sambu bau kubakaka lemvo ya kumona na meso na bau lukituku ya Yezu.

Ata yau kuvandaka inki mutindu, Yezu mesala nsonga mosi ya kele na bupusi sambu na kusongisa nkadilu na bau. Yandi mebinga mwana mosi, yandi metedimisa yandi na kati na bau, yandi mezyunga yandi diboko na yandi, mpi metuba nde: “Kana beno soba bikalulu ve, kana beno kituka bonso bana ve, beno ta kota ata fioti ve na Kimfumu ya Nzambi. Konso muntu yina ta kudikulumusa na kuvanda bonso mwana yai, yandi muntu me luta nene na Kimfumu ya Nzambi. Ebuna konso muntu yina ke yamba mwana bonso mwana yai na zina na mono, tuba nde yandi me yamba mono mosi.”

Mutindu ya kitoko ya kusongisa balongoki na yandi ya inki mutindu yai! Yezu mewila bau ve makasi mpi mebinga bau ve bantu ya lulendo to ya kindila to ya kuditombula. Ve, kansi yandi mepesa kingana ya malongi na yandi bonso nsongisa na kusadilaka mbandu ya bana ya fyoti, yina kevandaka na kikalulu ya kudikulumusa mpi ya kukonda lulendo mpi bayina kevandaka ve ti mabanza ya pozisio na kati na bau, na kutuba ya mbote. Na yau, Yezu kemonisa nde balongoki na yandi fwete kuyedisa bankadulu yai ya kevandaka ti bana ya kudikulumusa. Mutindu Yezu kesukisa nde: “Konso muntu yina ta kudikulumusa na kuvanda bonso mwana yai, yandi muntu me luta nene na Kimfumu ya Nzambi.” Matayo 17:​22-27; 18:​1-5; Marko 9:​30-37; Luka 9:​43-48.

▪ Na ntangu yandi mevutuka na Kapernaumi, inki malongi Yezu mevutukila, mpi inki mutindu bau meyamba yau?

▪ Sambu na inki yau melombama ve nde Yezu kufuta mpaku ya tempelo, kansi sambu na inki yandi kefuta yau?

▪ Mbala ya nkaka, inki kuvandaka na lufulu ya ntembe ya balongoki, mpi inki mutindu Yezu mesongisa bau?