Kapu 64

Dilongi ya Ndolula

YAU kemonana nde Yezu kele kaka na kati ya Kapernaumi ti balongoki na yandi. Yandi vandaka kusolula ti bau mambu yina metala mutindu ya kubongisa makambu na kati ya bampangi, ebuna Piere meyufula nde: “Mfumu, kana mpangi na mono ke salaka mono kaka mbi, mbala ikwa mono fweti lolula yandi?” Sambu balongi ya dibundu ya Bayuda ketumaka nsola ya kundima ndolula mbala tatu, na ntembe ve, Piere kemona nde yau kele kuvanda na ntima ya mbote mpenza na kupesa ngindu ya “mbala nsambwadi?”

Kansi ngindu yonso ya kulunda ntalu ya kutanga ya mutindu yina kele mbi. Yezu mesongisa Piere nde: “Mono ketubila nge, mbala nsambwadi ve, kansi, [mbala makumi nsambwadi na nsambwadi, NW].” Yandi kele na kumonisa nde ndilu fwete kutulama ve na yina metala ntalu ya bambala yina Piere fwete kulolula mpangi na yandi.

Sambu na kutubila mingi ntuma ya balongoki ya kulolulaka, Yezu metela bau kingana mosi. Yau ketadila ntotila mosi yina kezola kusala bakonti ti bampika na yandi. Bau menatina yandi mpika mosi yina kele ti mfuka ya badenali 60000000. Yandi kele ve ata ti mpila ya kufuta yau. Ebuna, mutindu Yezu ketendula, ntotila mepesa nswa nde yandi ti nkento na yandi, mpi bana na yandi bau kuteka bau mpi mfuka yina kufutama.

Ntangu yandi mewa mpila yina, mpika yango mebwa na makulu ya mfumu na yandi mpi mebondila nde: “Pardo, wila mono mawa, mono ta futa mfuka na nge yonso.”

Yandi mewila yandi mawa, mfumu yango mekatula mpika yina mfuka ya mingi yonso. Yezu kelanda nde, kansi, nswalu na nima ya yandi mesala mutindu yina, mpika yango mekwenda mpi mekuta nkundi ya kimpika ya kele ti mfuka na yandi ya badenali 100 mpamba. Muntu yango mesimba nkundi na yandi ya mpika na mungungu mpi meyantika na kukanga yandi pema, na kutubaka nde: “Futa mfuka na mono.”

Kansi nkundi ya kimpika kele ve ti mbongo. Ebuna yandi mebwa na makulu ya mpika yina mukwa mfuka, na kubondilaka nde: “Wila mono mawa, mono ta futa mfuka na nge!” Ya kuswaswana ti mfumu na yandi, mpika yango kele ve ti kikalulu ya kulolula, mpi yandi metudisa nkundi na yandi ya kimpika na boloko.

Ee, Yezu kelanda nde, bampika ya nkaka yina kumonaka mambu yina ya kusalamaka mekwenda kutubila mfumu. Na makasi yonso, yandi mebingisa mpika. Yandi ketuba nde: “Nge kele muntu mosi ya [mbi, NW]! Nge bondilaka mono na kulanda diaka ve mfuka yina yonso ya nge zolaka kupesa mono, ebuna mono ndimaka. Nge mpi nge zolaka kuwila mpangi na nge mawa mutindu mono mosi wilaka nge mawa.” Na makasi ya mingi kibeni, mfumu mepesa mpika yango ya kukonda ntima ya kulolula na bantu ya boloko tii kuna ya yandi fwete kufuta mfuka yonso yina ya yandi kele na yau.

Na nima Yezu mesukisa nde: “Tata na mono kele na zulu ta sala beno mutindu mosi mpi, kana muntu [kelolula ve, NW] mpangi na yandi ya nkaka, na ntima yonso.”

Dilongi ya mbote ya inki mutindu yai na kulolula! Na kufwanisaka ti mfuka ya mingi ya Nzambi melolulaka beto, ata nkutu disumu yango ya mpangi Mukristu mesadila beto kuvanda inki mutindu, yau kele mpenza ya fyoti. Dyaka, Yehowa Nzambi melolulaka beto bambala mafunda. Mbala mingi, beto kezabaka nkutu ve masumu ya beto kesadilaka yandi. Yau yina, keti beto lenda ve kulolula mpangi na beto bambala fyoti, ata nkutu beto kele ti kikuma ya kyeleka ya kubokutila? Yibuka, mutindu Yezu kulongaka na Disolo ya zulu ya Ngumba, Nzambi ta “lolula beto bantu ya masumu, mutindu beto mpi me lolulaka bantu yina me salaka beto mbi.” Matayo 18:​21-35; 6:12; Kolosai 3:13.

▪ Inki mepusa ngyufula ya Piere yina metala kulolula mpangi na yandi, mpi sambu na inki yandi lenda kutadila ngindu na yandi ya kulolula muntu mbala nsambwadi nde yau kele kuvanda na ntima ya mbote?

▪ Inki mutindu mvutu ya ntotila kupesaka na mpika ntangu ya yandi kubondilaka yandi kele ya kuswaswana ti nsadilu ya mpika kaka yina mosi ntangu nkundi na yandi kebondila yandi?

▪ Inki dilongi beto kebaka na kingana ya Yezu?