Kapu 72

Yezu Metinda Balongoki 70

YAI kele automne ya mvu 32 T.B., bamvula tatu ya mvimba kubanda Yezu kubakaka mbotika. Yandi ti balongoki na yandi mekatuka kuvanda na Nkinsi ya Bisasa na Yeruzalemi, mpi yau kemonana nde bau kele kaka na mfinama. Ya kyeleka, Yezu mesala kitini ya mingi ya bangonda sambanu ya kisalu na yandi yina kubikalaka na Yudea to kaka na simu ya Nzadi ya Yordani na distrike ya Perea. Teritware yai fwete kulongama mpi.

Ya kyeleka, na nima ya Paki ya mvu 30 T.B., Yezu kusalaka kiteso ya bangonda nana na Yudea sambu na kusamuna. Kansi na nima Bayuda kumekaka na kufwa yandi kuna na Paki ya mvu 31 T.B., yandi kusalaka mvula mosi ti ndambu yina kulandaka na kulongaka kaka na Galilea. Na ntangu yina, yandi kuyedisaka organizasio mosi ya nene ya bansamuni mpi ya kulongama mbotembote, kima mosi ya yandi kusalaka ve na ntwala. Ebuna ntangu yai, yandi kesala kisalu ya nsuka mpi ya mingi na Yudea.

Sambu na kusala kisalu yango, Yezu mesola balongoki 70 mpi metinda bau zole zole. Yau yina, na kimvuka bibuka ya bansamuni ya Kimfumu kele 35 sambu na kusala na teritware yango. Bau kekwenda na ntwala na konso mbanza mpi kisika yina Yezu, na ntembe ve ti bantumwa na yandi, kekana mpenza na kukwenda.

Na kisika ya kusonga balongoki yina 70 nde bau kukwenda na basinagoga, Yezu ketubila bau na kukota na banzo ya bantu, na kutendulaka nde: “Kana beno ke kota na konso nzo yina, beno tuba ntete na bantu yina nde: ‘[Ngemba kuvanda na beno, NW].’ Kana muntu ke zingaka na nzo yina kele muntu ya [ngemba, ngemba, NW] na beno kuvanda kaka mpidina. Kansi kana yandi kele muntu ya [ngemba ve, ngemba, NW] na beno kuvutuka na beno mosi.” Inki fwete kuvanda nsangu na bau? Yezu ketuba nde: “Beno tubila bo nde: ‘Kimfumu ya Nzambi me kuma penepene na beno.’ ” Na yina metala kisalu ya balongoki yina 70, mukanda mosi (Matthew Henry Commentary) ketuba nde: “Bonso Mfumu na bau, kisika yonso ya bau vandaka kuluta, bau vandaka kusamuna nzo na nzo.”

Malongi ya Yezu kepesa na balongoki yina 70 kele bonso yina ya yandi kupesaka na bantumwa 12 ntangu yandi kutindaka bau na kisalu ya kusamuna na Galilea kiteso ya mvula mosi na ntwala. Yandi kekebisa balongoki yonso 70 sambu na luteleminu ya bau takutana na yau, mpi kubongisa bau sambu na kulonga nsangu na bankwa-nzo kaka ve, kansi yandi mepesa bau mpi ngolo ya kubelula bantu ya maladi. Mpila yina, ntangu Yezu takuma na nima ya mwa bilumbu, bamingi tavanda na mpusa ya ngolo na kukutana ti Longi yina kele na balongoki ya kekuka na kusala mambu ya kuyituka ya mutindu yina.

Kisalu ya kusamuna ya balongoki 70 ti ya Yezu yina melanda kele mpenza ya ntangu fyoti. Ntama ve, bibuka yonso 35 ya bansamuni ya Kimfumu meyantika na kuvutuka na Yezu. Bau ketuba na kyese yonso nde: “Mfumu, ata bampeve ya mbi mpi vandaka kulemfukila beto ntangu beto vandaka kutubila yo na zina na nge.” Lapolo ya kisalu ya mbote ya mutindu yina kepesa mpenza Yezu kyese, sambu yandi kevutula nde: “Mono monaka Satana ke katuka na zulu, ke kwisa kubwa na ntoto bonso nzasi. Beno wa! Mono me pesaka beno kiyeka ya kuniata banioka ti bankutu.”

Yezu kezaba nde na nima ya lubutuku ya Kimfumu ya Nzambi na ntangu ya nsuka, Satana ti bampeve na yandi ya mbi fwete kukulama na zulu. Kansi, ntangu yai kukulama yai ya bampeve ya mbi ya kukonda kumonana na bantu ya mpamba kele nzikisa ya ngika ya dyambu yina takwisa. Yau yina, Yezu ketubila kubwa ya makwisa ya Satana tuka na zulu bonso dyambu mosi ya kyeleka kibeni. Mpila yina, balongoki 70 mepesama kiyeka ya kuniata banyoka ti bankutu na mutindu mosi ya kifwani. Kansi, Yezu ketuba nde: “Beno sepela ve sambu bampeve ya mbi vandaka kulemfukila beno, kansi beno sepela sambu Nzambi me sonikaka bazina na beno na zulu.”

Yezu kele na kyese mingi kibeni mpi kekembila Tata na yandi na meso ya bantu yonso sambu yandi mesadila bansadi na yandi yai ya kudikulumusa ti ngolo ya mutindu yina. Na kubalukaka na balongoki na yandi, yandi ketuba nde: “Kiese na beno bantu ke mona mambu yai! Sambu mono ke tubila beno nde baprofete mingi ti bantotila mingi, bo vandaka na nzala ya kumona mambu yai ya beno ke mona, kansi bo monaka yo ve. Bo vandaka na nzala ya kuwa mambu yai ya beno ke wa, kansi bo waka yo ve.” Luka 10:​1-24; Matayo 10:​1-42; Kusonga 12:​7-12.

▪ Na wapi Yezu kusamunaka na nsungi ya bamvula tatu ya ntete ya kisalu na yandi, mpi na inki teritware yandi melonga na bangonda na yandi sambanu ya nsuka?

▪ Na wapi Yezu metwadisa balongoki 70 sambu na kukutana ti bantu?

▪ Sambu na inki Yezu ketuba nde yandi monaka Satana kekatuka na zulu mpi kekwisa kubwa na ntoto?

▪ Na inki mutindu balongoki 70 lenda kunyata banyoka ti bankutu?