Kapu 73

Muntu ya Samaria ya Ntima ya Mbote

NGATU Yezu kele penepene na Betania, bwala mosi yina kele na bakilometere kiteso ya tatu katuka na Yeruzalemi. Muntu mosi ya mekudipesaka ngolo na Nsiku ya Moize mepusana na yandi ti ngyufula, na kuyufulaka nde: “Longi, nki mono fweti sala sambu na kubaka moyo ya mvula na mvula?”

Yezu mebakisa nde muntu yango, muntu ya Bansiku, kele na kuyufula ve kaka sambu na kuzaba, kansi, sambu yandi kezola kumeka yandi. Lukanu ya muntu ya Bansiku lenda kuvanda ya kupusa Yezu na kupesa mvutu na mutindu yina tapesa Bayuda makasi. Ebuna, Yezu menata muntu ya Bansiku yango na kudikotisa, na kuyufulaka yandi nde: “Nki mambu bo sonikaka na mikanda ya Bansiku? Ntangu nge ke tangaka yo, nki mutindu nge ke bakisaka yo?”

Sambu na kupesa mvutu, muntu ya Bansiku, na kusadilaka ntonina ya mudindu, metanga nsiku ya Nzambi yina kele na Kulonga 6:5 ti Levi 19:​18, na kutubaka nde: “ ‘Nge fweti zola Mfumu Nzambi na nge, na ntima na nge yonso, na luzolo na nge yonso, na ngolo na nge yonso ti na mabanza na nge yonso’; diaka: ‘Nge fweti zola mpangi na nge bonso nge mosi.’ ”

Yezu mevutula nde: “Nge me tuba mbote, [landa na kusala, NW] mpidina ebuna nge ta vanda na moyo.”

Kansi, muntu ya Bansiku yango meyangalala ve. Sambu na yandi, mvutu ya Yezu kele ve pwelele kibeni. Yandi kezola Yezu kundima nde bamboninu na yandi mosi kele ya kyeleka mpi nde yandi kele muntu ya lunungu na mutindu na yandi ya kutadila bankaka. Yau yina, yandi keyufula nde: “Nani mpangi na mono yina?”

Bayuda kekwikilaka nde ngogo “mpangi” kesadilamaka kaka na bankundi Bayuda, mutindu mambu yina kele na ntwala ti na nima ya Levi 19:18 kemonisa yau. Ya kyeleka, na nima ata nkutu ntumwa Piere kutubaka nde: “Beno mosi zaba nde yo kele nsiku nde, Muyuda lenda vukana ve na muntu yina kele Muyuda ve.” Yau yina, muntu ya Bansiku yango, mbala ya nkaka ti balongoki ya Yezu mpi, kekwikilaka nde bau kele bantu ya lunungu kana bau kemonisa bumbote kaka na Bayuda, sambu, na mboninu na bau, bantu yina kele ve Bayuda kele bampangi na bau ve mpenza.

Nkatu kulwadisa bawi na yandi, inki mutindu Yezu lenda kusongisa mboninu na bau? Yandi meta disolo, ngatu yau ketadila mambu ya kyeleka ya kesalamaka. Yandi ketendula nde: “Muntu mosi [Muyuda] katukaka na bwala Yeruzalemi, yandi vandaka kwenda na bwala Yeriko. Na nzila, bamiyibi simbaka yandi, bo katula yandi bilele, bo bula yandi, ebuna bo kwenda ka bo. Bo bikisa yandi penepene na kufwa.”

Yezu kelanda nde: “Nganga-Nzambi mosi kwisaka kuluta na nzila yina. Ntangu yandi monaka muntu yina na lweka ya nzila, yandi lutaka na lweka ya nkaka ya nzila. Mutindu mosi, muntu mosi ya dikanda ya Levi kwisaka kukuma na kisika yango yina. Ntangu yandi monaka muntu yina, yandi mpi lutaka na lweka ya nkaka ya nzila. Kansi muntu mosi ya ntoto ya Samaria kwisaka kuluta na nzila yina. Yandi kwisaka kukuma na kisika muntu yina vandaka. Ntangu yandi monaka yandi, yandi wilaka yandi mawa.”

Banganga-Nzambi mingi ti bansadisi na bau ya balevi kezingaka na Yeriko, na kitamina ya bakilometere 23 na nzila ya kigonsa yina kekulumukaka na bametere 900 katuka na kisika yina bau kesalaka na tempelo na Yeruzalemi. Bantu ya kutudila ntima nde bau tasadisa nkundi Muyuda yina kele na mpasi kele nganga-Nzambi ti Mulevi. Kansi bau mesala yau ve. Na kisika na bau, muntu ya Samaria mesala yau. Bayuda keyinaka bantu ya Samaria ngolo na mpila nde ntama mingi ve, bau kufingaka Yezu na bangogo ya ngolo kibeni na kubingaka yandi “muntu ya Samaria.”

Inki muntu ya Samaria mesala sambu na kusadisa Muyuda? Yezu ketuba nde: “Yandi kwendaka penepene na muntu yango. Yandi yantikaka kutula yandi mafuta ti vinu na bamputa, ebuna yandi kangaka bamputa yina. Ntangu yai yandi tulaka yandi na zulu ya mpunda na yandi, ebuna yandi nataka yandi na nzo mosi ya banzenza. Yandi sadisaka yandi kuna. Na kilumbu yina kulandaka yandi bakaka ndambu ya mbongo, ebuna yandi pesaka yo na mfumu ya nzo ya banzenza. Yandi tubilaka yandi nde: ‘Sadisa muntu yai. Kana nge lutisa mbongo mingi na kusadisa yandi, mono ta vutudila nge yo ntangu mono ta kwisa kuvutuka.’ ”

Na nima ya kuta disolo, Yezu meyufula muntu ya Bansiku yina nde: “Na mabanza na nge, na kati ya bantu yai yonso tatu nani vandaka mpangi ya muntu yina ya bamiyibi simbaka?”

Ti nsoni na kupesa Musamaria lukumu, muntu ya Bansiku mevutula nde: “Muntu yina wilaka yandi mawa.”

Yezu mesukisa nde: “Nge mpi kwenda kusala mutindu mosi.”

Kana Yezu kutubilaka muntu ya Bansiku na mbala mosi nde muntu yina kele ve Muyuda kele mpi mpangi na yandi, muntu yango zolaka kubuya kaka ve dyambu yai, kansi mpi ngatu bawi mingi zolaka kukota na lweka na yandi na disolo na yandi ti Yezu. Kansi, disolo yai ya mambu ya kyeleka yina kesalamaka na luzingu, kumonisaka yau pwelele na mutindu mosi ya lenda kubuyama ve nde bampangi na beto kele mpi bayina ya beto kele na bau ve mpusu mosi mpi insi mosi. Mutindu ya kulonga ya kitoko ya inki mpila yai! Luka 10:​25-37; Bisalu 10:28; Yoane 4:9; 8:⁠48.

▪ Inki ngyufula muntu ya Bansiku meyufula Yezu, mpi inki kele kibeni lukanu na yandi?

▪ Banani Bayuda keyindulaka nde bau kele bampangi na bau, mpi inki kikuma kele sambu na kuyindula nde ata nkutu balongoki kele na ngindu yai?

▪ Inki mutindu Yezu mepesa mboninu ya mbote na mpila nde muntu ya Bansiku lenda kubuya yau ve?