Kapu 75

Nto ya Kyese

NA NTANGU ya kisalu na yandi na Galilea, Yezu kusalaka bimangu, mpi ntangu yai yandi kevutukila yau na Yudea. Mu mbandu, yandi mebasisa muntu mosi mpeve ya mbi yina kukangisa yandi kutuba. Bantu keyituka, kansi bambeni ya nkaka mebasisa ntembe mutindu yau kubasikaka na Galilea. Bau ketuba nde: “Satana Belezebule, mfumu ya bampeve ya mbi, muntu ke pesaka yandi ngolo ya kubasisa bampeve ya mbi.” Bankaka kezola Yezu kupesa nzikisa ya kuluta nene sambu na yina yandi kele, mpi bau memeka yandi na kulombaka kidimbu ya zulu.

Na kuzabaka mabanza na bau, Yezu mevutudila bambeni na yandi ya Yudea kaka mvutu yina ya yandi pesaka bayina na Galilea. Yandi ketuba nde konso kimfumu yina kele ya kukabana tabwa. Yau yina, yandi keyufula nde: “Ebuna kana Satana [kukabana, NW] ti bantu na yandi mosi, nki mutindu kimfumu na yandi ta zinga diaka?” Yandi kemonisa pozisio ya kigonsa ya batelamini na yandi na kutubaka nde: “Kana mono ke basisaka bampeve ya mbi na [musapi, NW] ya Nzambi, yo ke songa nde Kimfumu ya Nzambi me kuma na kati na beno.”

Bayina ketala bimangu ya Yezu fwete kundima yau mutindu bantu ya nkaka kusalaka bamvukama mingi na ntwala ntangu bau monaka Moize kesala kimangu. Bau kutubaka nde: “Yau kele musapi ya Nzambi!” Kuvandaka mpi “musapi ya Nzambi” kusonikaka Bansiku Kumi na zulu ya matadi. Mpi “musapi ya Nzambi”​—⁠mpeve santu na yandi, to ngolo ya kisalu​—⁠kele yau yina kesadisaka Yezu na kubasisa bampeve ya mbi mpi na kubelula bantu ya maladi. Ebuna Kimfumu ya Nzambi mekuma kibeni na katikati ya bambeni na yandi, sambu Yezu, Ntotila ya Kimfumu ya meponamaka, kele kibeni pana na katikati na bau.

Ebuna Yezu meta kingana sambu na kumonisa nde kingangu na yandi ya kubasisa bampeve ya mbi kele nzikisa yina kemonisa nde yandi meluta Satana na ngolo, kaka mutindu muntu mosi ya kuluta yina ya nkaka na ngolo kekwisaka kubotula munkwa nzo bima yonso ata nkutu yandi kele ti binwaninu. Yandi mevutukila mpi kingana ya yandi kutubaka na Galilea na yina metala mpeve ya mbi. Mpeve yango mebasika na kati ya muntu yina, kansi ntangu muntu yango kefulusa ve mpwasa ti mambu ya mbote, mpeve yango mevutuka ti bampeve ya nkaka nsambwadi, mpi nkadilu ya muntu yango mekuma mbi kuluta na mbala ya ntete.

Na kuwidikilaka na malongi yai, nkento mosi ya kele na kati ya bantu mepusama na kutuba na ndinga ya ngolo nde: “Kiese na nkento yina vandaka kunata nge na kati ya divumu na yandi ti kunwisa nge mabele!” Sambu mpusa ya konso nkento ya Muyuda kele ya kuvanda mama ya mbikudi mpi mingimingi ya Mesia, beto lenda kubakisa nde nkento yai kutuba dyambu yai. Yau kemonana nde yandi vandaka kuyindula nde Maria lendaka kuvanda na kyese sambu yandi kele mama ya Yezu.

Kansi, Yezu mesungika nkento yango nswalu na yina metala nto ya kyeleka ya kyese. Yandi mevutula nde: “Ve, kiese na bantu yina ke waka nsangu ya Nzambi ti ke landaka yo!” Yezu kutubaka ve ata mbala mosi nde mama na yandi, Maria, fwete kubaka nkembo ya sipesiali. Kansi, yandi kumonisaka nde kyese ya kyeleka kezwamaka na kuvanda nsadi ya kwikama ya Nzambi, kele ve na konso bimpangi yina ya kinsuni to bisalu.

Mpila yandi kusalaka na Galilea, Yezu menganina dyaka bantu ya Yudea sambu bau kelomba kidimbu ya zulu. Yandi metubila bau nde ata kidimbu mosi ve tapesama na bau katula kidimbu ya Yonasi. Yonasi kukumaka kidimbu na bilumbu na yandi tatu na kati ya mbisi ya masa mpi na kisalu na yandi ya kusamuna na kikesa yonso, yina kupusaka bantu ya Ninive na kubalula ntima. Yezu ketuba nde: “Kansi awa ke na muntu mosi me luta Yonasi!” Mutindu mosi, ntotila-nkento ya Saba kuyitukaka sambu na mayele ya Salomo. Yezu ketuba dyaka nde: “Kansi awa ke na muntu mosi me luta Salomo!”

Yezu ketendula nde ntangu muntu kepedisaka mwinda, yandi ketulaka yau ve na kantini to na nsi ya kitunga kansi na zulu ya mesa ya mwinda na mpila nde bantu lenda kumona nsemo. Mbala ya nkaka yandi kezola kutuba nde kulonga to kusala bimangu na ntwala ya bawi na yandi yai ya ntu-ngolo kefwanana na kubumba nsemo ya mwinda. Meso ya batadi ya mutindu yina kele ya petepete ve, to ya mbote, na mpila nde lukanu ya bimangu na yandi kelungana ve.

Yezu mekatuka na kubasisa mpeve ya mbi mpi na kuvutula ndinga ya baba. Dyambu yai fwete kupusa bantu yina kele ti meso ya petepete to ya mbote na kukembisa bisalu yai ya kuyituka mpi na kusamuna nsangu ya mbote! Kansi bambeni yai kesala yau ve. Ebuna Yezu kesukisa nde: “Nge fweti tala mbote-mbote nde mwini yina kele na nge yo kukuma mpimpa ve. Ebuna kana nitu na nge yonso kele na mwini, ata ndambu mosi ve kele na mpimpa, nitu na nge ya mvimba ta vanda na mwini, mutindu mwinda ke pesaka nge nsemo na yo.” Luka 11:​14-36; Kubasika 8:​18, 19; 31:​18, NW; Matayo 12:​22, 28.

▪ Inki bantu mesala ntangu Yezu mebelula muntu mosi?

▪ “Musapi ya Nzambi” kele inki, mpi inki mutindu Kimfumu ya Nzambi mekuma na katikati ya bawi ya Yezu?

▪ Inki kele nto ya kyese ya kyeleka?

▪ Inki mutindu muntu lenda kuvanda na disu ya petepete?