Kapu 86

Nkenda ya Mwana Yina Kuvilaka

YEZU mekatuka kumanisa kutela Bafarize bingana yina metala dimeme ti kibende ya drakami ya kuvilaka, yandi kelanda ntangu yai ti kingana ya nkaka. Yai ketadila tata mosi ya zola mpi mutindu na yandi ya kusala na ntwala ya bana na yandi ya babakala zole, bau yonso mesala bifu ya ngolo.

Ntete, kele mwana ya bakala ya leke, muntu ya bau ketubila mingi na kingana yango. Na ntembe ve, yandi mebaka dikabu ya difwa yina tata na yandi kupesaka yandi. Yandi mekatuka na nzo mpi mekudikotisa kibeni na luzingu ya mansoni. Kansi widikila mutindu Yezu keta nkenda yango, mpi tala kana nge lenda kuzaba kana konso muntu kele kifwani ya nani.

Yezu keyantika nde: “Kuvandaka na muntu mosi, yandi vandaka na bana zole ya babakala. Kilumbu mosi mwana yina ya leki tubilaka tata na yandi nde: ‘Tata, pesa mono dikabu na mono ya bima yina ya mono fweti baka na kimvwama na nge.’ Ebuna Tata kabilaka bo bima na yandi.” Inki mwana yai ya leki tasala ti bima yina ya yandi mebaka?

Yezu ketendula nde: “Na nima ya bilumbu fioti, leki tekaka bima yonso yina ya yandi bakaka na tata na yandi, ebuna yandi kwendaka na nsi mosi ya ntama. Kuna yandi bebisaka mbongo na yandi na mubulu.” Na kutuba ya masonga, yandi mebebisa mbongo na yandi na kuzingaka ti bandumba. Na nima, bantangu ya mpasi mekwisa, mpila Yezu kelanda na kuta yau nde:

“Ntangu yandi me manisa mbongo na yandi yonso, nzala ya ngolo kwisaka na nsi yina, ebuna yandi yantikaka kumona mpasi. Yo yina yandi kwendaka kusosa kisalu na muntu mosi ya nsi yina, ebuna muntu yina bakaka yandi. Yandi tindaka yandi na bilanga na yandi sambu na kutala bangulu na yandi. Yandi vandaka kuzola kudia bambuma yina ya bangulu ke diaka, sambu yandi dia, yandi fuluka, kansi ata muntu mosi ve vandaka kupesa yandi yo.”

Nsoni ya inki mutindu na kupusama na kukituka kapita ya bangulu, sambu bambisi yai kuvandaka ya kukonda kugedila na kutadila Nsiku! Kansi kima kupesaka mwana mpasi ya kuluta mingi kuvandaka nzala ya kulutana mingi na mpila nde yandi kumaka kuzola madya ya bau vandaka kudisa bangulu. Sambu na mpasi ya ngolo, Yezu ketuba nde: “Yandi yantikaka kuyindula luzingu na yandi.”

Na kulandaka disolo na yandi, Yezu ketendula nde: “Yandi tubaka na ntima na yandi nde: ‘Bantu mingi ke salaka na nzo ya tata na mono, kansi bo ke na madia ya kuluta mingi yina ya bo lenda manisa mpi ve na kudia. Kansi tala mono yandi yai ke fwa na nzala awa. Mono ke vutuka na tata na mono, ebuna mono ta tubila yandi nde: “Tata, mono salaka masumu na Nzambi ti na nge. Mono me fwana diaka ve na kuvanda mwana na nge. Baka mono bonso muntu mosi na kati ya bantu na nge ya kisalu.” ’ Ntangu yai, yandi bikisaka nsi yina, yandi vutukaka na tata na yandi.”

Kima ya kuyindulula yau yai: Ntangu yandi kukatukaka na nzo, kana tata na yandi kunganinaka yandi, ngatu mwana zolaka ve kuzaba ata fyoti nkadilu ya mbote ya kuvanda na yau. Ziku yandi zolaka kubaka lukanu ya kuvutuka mpi kumeka na kuzwa kisalu kisika ya nkaka na nsi na yandi na mpila nde yandi kukutana ve ti tata na yandi. Kansi, ngindu ya mutindu yina kuvandaka ve na mabanza na yandi. Yandi vandaka na nzala ya kuvanda na nzo na bau!

Yau kemonana pwelele nde, tata ya kingana ya Yezu kele Yehowa Nzambi, Tata na beto ya zulu ya kufuluka na zola mpi na kikalulu ya kulolula. Mpi mbala ya nkaka nge kendima nde mwana ya kuvilaka, kele kifwani ya bansumuki ya mezabanaka. Bafarize, yina Yezu kele na kutubila, kutongaka ntete Yezu sambu yandi kudyaka ti bantu yango yai. Kansi mwana yina ya mbuta kele kifwani ya nani?

Ntangu Mwana ya Kuvilaka Memonana

Ntangu mwana yina kuvilaka ya kingana ya Yezu mevutuka na nzo ya tata na yandi, inki mutindu yandi meyambama? Widikila mutindu Yezu ketendula yau:

“Ntangu mwana yango vandaka kaka na nzila, mwa-ntama na nzo na bo, tata na yandi monaka yandi, ebuna yandi wilaka yandi mawa. Ntangu yai, yandi kwendaka ntinu na kukutana ti mwana na nzila, yandi yamba yandi, ebuna yandi pesa yandi beze.” Tata ya nkenda mpi ya ntima ya tiyatiya ya inki mutindu yai, yina kefwanisa mbotembote Tata na beto ya zulu, Yehowa!

Ngatu tata kuwaka nsangu ya luzingu ya mansoni ya mwana na yandi. Kansi yandi meyamba yandi nkatu kuvingila ntendula ya nda-nda. Yezu kele mpi ti mpeve ya kuyamba ya mutindu yina, na kusalaka kitambi ya ntete na kufinama na bansumuki ti bakalaki ya mpaku, yina kemonisama na kingana bonso mwana ya kuvilaka.

Ya kyeleka, tata ya ntonina ya kingana ya Yezu, kele mpenza na mwa ngindu na yina metala kubalula ntima ya mwana na yandi na kutalaka luse na yandi ya mawa, mpi ya kulemba ntangu yandi kekwisa kuvutuka. Kansi ngindu ya tata ya kufuluka na zola mekumisa mambu petepete sambu mwana kufunguna masumu na yandi, mutindu Yezu keta nde: “Kansi mwana tubilaka yandi nde: ‘Tata, mono salaka masumu na Nzambi ti na nge. Mono me fwana diaka ve na kuvanda mwana na nge. [Kumisa mono bonso mosi na kati ya bantu na nge ya kisalu, NW].’ ”

Kansi, bangogo yai memana ntete ve na munoko ya mwana ntangu tata metuma na mbala mosi bampika na yandi nde: “Beno kwisa kunata nswalu mvwela ya kuluta kitoko, ebuna beno kwisa lwatisa yandi yo. Beno lwatisa yandi mpi lupeto na musapi ti basandale na makulu. Beno kwisa kunata mwana-ngombe ya mafuta mingi, beno fwa yo, ebuna beto sala fete. Sambu mwana na mono yai vandaka bonso muntu ya kufwa, kansi yandi me baka diaka moyo; yandi vilaka, kansi yandi me monika diaka.” Ebuna bau meyantika na “kusala fete.”

Na ntangu yina, mwana “na yandi ya mbuta vandaka na bilanga.” Tala kana nge lenda kuzaba kana yandi kele kifwani ya nani na kitini ya nkenda yina mebikala. Yezu ketuba sambu na mwana yina ya mbuta nde: “Ntangu yandi kwisaka kuvutuka, yandi kuma penepene na nzo, yandi wa bantu ke kina miziki. Yandi bingaka boyi mosi, ebuna yandi yulaka yandi nde: ‘Nki mambu me bwa kuna?’ Boyi nde: ‘Leki na nge me kwisa kuvutuka, ebuna tata na nge me fwila yandi mwana-ngombe ya mafuta, sambu yandi me mona yandi me kwisa kuvutuka na nitu ya mbote.’ Ntangu yai, mwana yina ya mbuta waka makasi; yandi buyaka na kukota na nzo. Tata na yandi kwisaka kubasika, ebuna yandi yantikaka kubondila yandi nde: ‘Kwisa kukota na nzo.’ Kansi yandi tubilaka tata na yandi nde: ‘Tala, mono me sadila nge bamvula mingi. Mono me buyaka ndinga na nge ata mbala mosi ve. Ebuna ata mbala mosi ve nge me pesaka mono ata mwana-nkombo sambu mono kusala fete ti banduku na mono. Kansi mwana na nge yai me manisaka mbongo na nge na bankento yina ke salaka kindumba, ntangu yandi me kwisa kuvutuka, nge me fwila yandi mwana-ngombe ya mafuta!’ ”

Nani, bonso mwana ya mbuta, kubokutaka sambu na ndolula mpi dikebi ya kupesamaka na bansumuki? Keti kele ve balongi ya Bansiku ti Bafarize? Sambu kele kutonga ya bau kutongaka Yezu sambu yandi keyambaka bansumuki kubasisaka kingana yai, yau kemonana pwelele nde bau mefwanisama na mwana ya bakala yina ya mbuta.

Yezu kesukisa nkenda na yandi ti bangogo yai ya bupusi ya tata kesonga mwana na yandi: “Mwana na mono, nge ke vandaka awa ti mono bilumbu yonso. Bima na mono yonso kele bima na nge. Yo ke mfunu nde beto sala fete, beto sepela, sambu leki na nge yai vandaka bonso muntu ya kufwa, kansi yandi me baka diaka moyo; yandi vilaka, kansi yandi me monika diaka.”

Yezu kesonga ve kima ya mwana ya mbuta tasala mpenza. Ya kyeleka, na nsukansuka, na nima ya lufwa ti lufutumuku ya Yezu, “banganga-Nzambi mingi mpi ndimaka lukwikilu yina,” ngatu na kati na bau kuvandaka ti bankaka yina kuvandaka na kati ya kalasa ya “mwana ya mbuta” yina ya Yezu ketubila awa.

Kansi, na ntangu na beto banani kele kifwani ya bana yina zole? Yau fwete kuvanda bayina ya kwisaka kuzaba mambu mingi na yina metala balukanu ya Yehowa na kuvanda ti lufulu ya kukotisama na ngwisana ti yandi. Mwana yina ya mbuta kele kifwani ya bamambere ya nkaka ya “kibuka ya fyoti,” to “[dibundu, NW] ya bana ya ntete ya Nzambi . . . bayina ya Nzambi me sonikaka bazina na bo na zulu.” Bau kubakaka nkadilu ya mutindu mosi bonso yina ya mwana ya mbuta. Bau vandaka ve ti mpusa ya kuyamba kalasa ya ntoto, “mameme ya nkaka,” yina na ngindu na bau vandaka kuyiba kisika na bau ya ntete.

Na ndambu ya nkaka, mwana ya kuvilaka, kele kifwani ya bantu ya nkaka ya Nzambi yina kekatuka sambu na kwenda kuyangalala ti bansatu ya inza kepesaka. Kansi, na nima ya mwa ntangu, bantu yango kevutuka na kubalula ntima yonso mpi kekuma dyaka bansadi ya kikesa ya Nzambi. Ya kyeleka, zola ti ntima ya kulolula ya inki mutindu Tata kele na yau sambu na bayina keyibuka mpusa na bau sambu na ndolula mpi kevutuka na yandi! Luka 15:​11-32; Levi 11:7, 8; Bisalu 6:7; Luka 12:32; Baebreo 12:23; Yoane 10:16.

▪ Yezu metela banani kingana to nkenda yai, mpi sambu na inki?

▪ Inki muntu bau ketubila mingi na nkenda yai, mpi inki dyambu mebwila yandi?

▪ Na bilumbu ya Yezu, tata ti mwana ya leke kele kifwani ya nani?

▪ Inki mutindu Yezu melanda mbandu ya tata ya kufuluka na nkenda ya kingana na yandi?

▪ Inki kele mboninu ya mwana ya mbuta sambu na kuyambama ya mpangi na yandi, mpi inki mutindu Bafarize kesalaka bonso mwana yina ya mbuta?

▪ Inki nsadilu kingana ya Yezu kele na yau na bilumbu na beto?