Kapu 93

Ntangu Mwana ya Muntu Tasongama

NTANGU Yezu kele kaka na nordi (na Samaria to na Galilea), Bafarize keyufula yandi sambu na yina metala kukwisa ya Kimfumu. Bau kekwikilaka nde yau takwisa ti nkembo ya nene mpi nkinsi, kansi Yezu ketuba nde: “Ke na kima ve ya bantu lenda mona na meso yina ta songa bo nde Kimfumu ya Nzambi ke kwisa. Muntu ta tuba ve nde: ‘Beno tala, Kimfumu ya Nzambi kele kwaku!’ to: ‘Yo kele kuna!’ Sambu beno fweti zaba nde Kimfumu ya Nzambi kele na [katikati] na beno.”

Bangogo ya Yezu “na katikati na beno” kebalulamaka mbala ya nkaka “na kati na beno.” Yau yina bantu ya nkaka kuyindulaka nde Yezu vandaka kutuba nde Kimfumu ya Nzambi kele na kuyala na bantima ya bansadi ya Nzambi. Kansi, ya kyeleka, Kimfumu ya Nzambi kele ve na kati ya bantima ya Bafarize yai ya kukonda lukwikilu ya Yezu ketubila. Kansi, yau kele na katikati na bau, sambu Ntotila ya Kimfumu ya Nzambi ya kusolamaka, Yezu Kristu, kele kibeni na kati na bau.

Yau lenda kuvanda nde Yezu kulandaka na kutuba mingi ti balongoki na yandi mambu yina metala Kimfumu ya takwisa na nima ya kukatuka ya Bafarize. Mingimingi, yandi keyindula kumonana na yandi ya makwisa na ngolo ya Kimfumu ntangu yandi kekebisa nde: “Bantu ta tubila beno nde: ‘Yandi yina kuna!’ to: ‘Yandi yai kwaku!’ Kansi beno kwenda kusosa yandi ve [na nima ya Bamesia ya luvunu]. Kilumbu yina ya Mwana-muntu ta kwisa kumonika, yo ta vanda bonso ntangu ya nzasi ke bwaka; nsemo na yo ke kwendaka na ndambu yonso ya nsi-ntoto ya mvimba.” Yau yina, Yezu kemonisa nde kaka mutindu nsemo ya nzasi kemonanaka na bandambu yonso, nzikisa ya kumonana na yandi na ngolo ya Kimfumu tamonana mbotembote na bayina yonso tazola kutala yau.

Na nima Yezu mefwanisa mambu ya ntama sambu na kumonisa inki nkadilu bantu tavanda na yau na ntangu ya kumonana na yandi ya makwisa. Yandi ketendula nde: “Mambu yina bwaka na ntangu ya Noa, yo ta bwa mpi mutindu mosi na ntangu ya Mwana-muntu . . . Yo ta vanda mutindu mosi bonso na ntangu ya Loti: bantu vandaka kudia, kunwa, kusumba bima, kuteka bima, kukuna bilanga ti kutunga banzo. Kansi kilumbu yina ya Loti katukaka na bwala Sodome, Nzambi nokisaka tiya ya ngolo bonso mvula; yo kwisaka kufwa bantu ya bwala yina yonso. Kilumbu yina ya Nzambi ta songa Mwana-muntu na meso ya bantu yo ta vanda mutindu mosi.”

Yezu ketuba ve nde bantu ya bilumbu ya Noa ti ya bilumbu ya Loti kufwaka kaka sambu bau landaka mambu ya luzingu bonso kudya, kunwa, kusumba, kuteka, kukuna ti kutunga. Ata Noa ti Loti mpi mabuta na bau kusalaka mambu yai. Kansi bantu ya nkaka kusalaka mambu yai ya luzingu nkatu kutula dikebi na luzolo ya Nzambi, mpi bau kufwaka sambu na kikuma yai. Bantu tafwa ntangu Kristu tasongama na mpasi ya nene na ngidika ya bima yai, kaka sambu na kikuma yina.

Na kutubilaka mingi mfunu ya kundima nswalu nzikisa ya kumonana na yandi ya makwisa na ngolo ya Kimfumu, Yezu keyika nde: “Na kilumbu yina, muntu yina ta vanda na ludi ya nzo, kana yandi kwisa kutuluka, yandi kukota ve na nzo sambu na kubaka bima yina kele muna. Mutindu mosi mpi, muntu yina ta vanda na bilanga, yandi kuvutuka ve na nzo na yandi. Beno yindula fioti mambu yina bwilaka nkento ya Loti.”

Ntangu nzikisa ya kumonana ya Kristu tamonana, bantu lenda ve kukangama na bima na bau ya kinsuni nde yau kukanga bau na kusala kima na mbala mosi. Na ntangu yandi vandaka kubasika na Sodome, yau kemonana nde nkento ya Loti kutalaka na nima na ntima mosi ya kuyindula na mpusa yonso bima ya yandi kubikisaka na nima, mpi yandi kukumaka ditadi ya mungwa.

Na kulandaka ntendula na yandi ya mvwandilu yina tavanda na ntangu ya kumonana na yandi ya makwisa, Yezu ketubila balongoki na yandi nde: “Mono ke tubila beno nde na mpimpa yina babakala zole ta vanda na mbeto mosi: [bo] ta baka mosi, ebuna bo ta bikisa mpi mosi. Bankento zole ta vanda ke tuta fufu kisika mosi: [bo] ta baka mosi, ebuna bo ta bikisa mpi mosi.”

Kubakama kewakana ti kukota ya Noa mpi dibuta na yandi na kati ya maswa mpi mutindu bawanzyo kubasisaka Loti ti dibuta na yandi na nganda ya Sodome. Yau ketendula luguluku. Na ndambu ya nkaka, kuyambulama ketendula kufwa.

Na kisika yai, balongoki keyufula nde: “Mambu yina ta bwa wapi?”

Yezu kevutula nde: “[Bango ya zulu, NW] ke kutakanaka na kisika yina ya mvumbi kele.” Bayina “kebakama” sambu na luguluku kele bonso bango ya zulu yina kemonaka na ntama na mpila nde bau kevukana kumosi na “mvumbi.” Mvumbi ketendula Kristu ya kyeleka na kumonana na yandi ya kukonda kumona na ngolo ya Kimfumu mpi na nkinsi ya kimpeve ya Yehowa kepesa. Luka 17:​20-37; Kuyantika 19:⁠26.

▪ Inki mutindu kimfumu kuvandaka na katikati ya Bafarize?

▪ Na inki mutindu kumonana ya Kristu kele bonso nzasi?

▪ Sambu na inki bantu tafwa sambu na bisalu na bau na ntangu ya kumonana ya Kristu?

▪ Kubakama mpi kuyambulama ketendula inki?