Kapu 98

Balongoki Keswana Ntangu Lufwa ya Yezu Mefinama

YEZU ti balongoki na yandi kele mfinama na Nzadi ya Yordani, kisika bau kesabukaka na kukatuka na distrike ya Perea sambu na kukota na Yudea. Bantu ya nkaka mingi kele na kukwenda ti bau na Paki ya mvu 33 T.B., yina mebikala kaka kiteso ya mposo mosi sambu na kusalama.

Yezu kele na kutambula na ntwala ya balongoki, mpi bau keyituka na lukanu na yandi ya kikesa. Yibuka nde mwa bamposo na ntwala, ntangu Lazare kufwaka mpi Yezu kufinamaka na kukatuka na Perea sambu na kukwenda na Yudea, Toma kusyamisaka bankaka nde: “Beto mpi, beto kwenda kufwa kuna kisika mosi ti Longi.” Yibuka mpi nde na nima ya lufutumuku ya Lazare, bantu ya Sanedreni kusalaka pula ya kufwa Yezu. Mpila ya kuyituka kele ve nde boma mesimba balongoki ntangu bau kekota dyaka ntangu yai na Yudea.

Sambu na kubongisa bau na mambu yina kele na ntwala, Yezu menata balongoki 12 na kingenga mpi yandi metubila bau nde: “Beno wa mbote, beto ke kwenda na Yeruzalemi. Kuna, bo ta pesa Mwana-muntu na maboko ya bambuta ya banganga-Nzambi ti ya balongi ya Bansiku. Bo ta zengila yandi nde yandi fweti fwa. Bo ta pesa yandi na bamimpani. Bo ta seka yandi, bo ta bula yandi fimbu, bo ta tula yandi na zulu ya [nti, NW] sambu yandi fwa; ebuna, na kilumbu ya tatu, Nzambi ta tedimisa yandi na lufwa.”

Yai kele mbala ya tatu na bangonda ya mekatuka kuluta ya Yezu ketubila balongoki na yandi mambu yina metala lufwa ti lufutumuku na yandi. Mpi ata nkutu bau kewidikila yandi, bau kebakisa ve. Mbala ya nkaka yau kele sambu bau kekwikilaka nde kimfumu ya Izraele tavutulama na zulu ya ntoto, mpi bau kevingila na kuyangalala na nkembo ti lukumu na kimfumu ya ntoto ti Kristu.

Salome, mama ya bantumwa Yakobo ti Yoane, kele na kati ya bantu yina kesala nzyetolo sambu na kwenda na Paki. Yezu kubingaka bantu yai “Bana ya Ndumu ya Zulu,” (NW) na ntembe ve yau kuvandaka sambu na nkadilu na bau ya tiyatiya. Yantika mwa ntama, bau zole kevandaka na ngindu ya kuvanda na kisika mosi ya lukumu na Kimfumu ya Kristu, mpi bau kuzabisaka mpusa na bau na mama na bau. Ntangu yai, yandi mepusana na Yezu sambu na kutubila bau, yandi mefukama na ntwala na yandi, mpi melomba lemvo.

Yezu meyufula nde: “Nki nge ke zola?”

Yandi mevutula nde: “Tuba nde ntangu nge ta vanda mfumu ya nene, bana na mono yai zole bo vanda mwana mosi na diboko na nge ya kibakala, mwana mosi na diboko na nge ya kinkento.”

Na ntangu yandi mebakisa kisina ya ndomba yango, Yezu metubila Yakobo ti Yoane nde: “Beno zaba ve kana nki beno ke lomba. Keti beno lenda nwa dikopa . . . ya mono ta nwa?”

Bau mevutula nde: “E, beto lenda.” Ata nkutu Yezu mekatuka kutubila bau nde yandi tamona mpasi mpi na nsukansuka yandi tagondama, yau kemonana nde bau kebakisa ve nde yau yai kima ya yandi kezola kutuba na ntangu yandi ketubila “dikopa” ya yandi mefinama na kunwa.

Ata mpila yina, Yezu metubila bau nde: “Beno ta nwa dikopa . . . ya mono ta nwa; kansi mono ke na nswa ve ya kusola muntu yina ta vanda na diboko na mono ya kibakala to na diboko na mono ya kinkento. Tata na mono ta pesa bisika yina na bantu yina ya yandi me yidikilaka bo yo.”

Na nima, balongoki yina ya nkaka kumi mebakisa kima ya Yakobo ti Yoane mekatuka kulomba, mpi bau mewa makasi. Mbala ya nkaka Yakobo ti Yoane kutubaka mingi ntangu balongoki kutubanaka na ntwala na yina metala muntu yina meluta nene na kati na bau. Ndomba na bau ya ntangu yai kemonisa nde bau kusadilaka ve ndongisila ya Yezu kupesaka bau sambu na dyambu yai. Mawa mingi, mpusa na bau sambu na lukumu kele kaka ngolo.

Yau yina, sambu na kumanisa ntembe ya mekatuka kubasika mpi na kulembika kimbeni ya yau zolaka kunata, Yezu mebinga bau yonso 12 kisika mosi. Na kulongisilaka bau na zola yonso, yandi metuba nde: “Beno zaba nde bamfumu ke yalaka bantu na kingolo-ngolo. Beno zaba mpi nde bantu ya nene ke songaka bo nde bo ke na kiyeka. Kansi yo ta vanda mpidina ve na kati na beno. Kana muntu mosi na kati na beno zola vanda mbuta, yandi fweti sadila bantu ya nkaka. Ebuna kana muntu mosi na kati na beno zola vanda [muntu ya ntete, NW], yandi fweti vanda mpika ya bantu ya nkaka.”

Yezu mebikisa mbandu ya bau fwete kulanda, mutindu yandi ketendula nde: “Mutindu mosi bonso Mwana-muntu; yandi kwisaka ve sambu bantu kusadila yandi, kansi yandi kwisaka sambu na kusadila bantu ti kupesa bo moyo na yandi bonso [nkudulu sambu na kusumba bantu mingi, NW].” Yezu mesadila bantu ya nkaka kaka ve, kansi mpi yandi tafwa sambu na bantu yonso! Balongoki kele na mfunu ya mpeve ya mutindu mosi ya kufwanana na yina ya Kristu ya kuzola kusadila kansi ya kuzola ve nde bantu ya nkaka kusadila bau, mpi ya kuzola kuvanda na nsi kansi na pozisyo ya lukumu ve. Matayo 20:​17-28; Marko 3:17; 9:​33-37; 10:​32-45; Luka 18:​31-34; Yoane 11:⁠16.

▪ Sambu na inki boma mesimba balongoki ntangu yai?

▪ Inki mutindu Yezu mebongisa balongoki na yandi sambu na mambu yina kele na ntwala?

▪ Inki kima bau melomba Yezu, mpi inki mutindu yau mepesa bantumwa ya nkaka mpasi na ntima?

▪ Inki mutindu Yezu mesala sambu na kumanisa dikambu yango na kati ya bantumwa na yandi?