Kapu 99

Yezu Kelonga na Yeriko

NTAMA ve Yezu ti bibuka yina kekwenda ti yandi mekuma na Yeriko, yina kele mbanza mosi ya kelombaka nzyetolo ya kiteso ya kilumbu mosi katuka na Yeruzalemi. Yau kemonana nde Yeriko kele mbanza mosi ya kele ti bitini zole, mbanza ya ntama ya Bayuda kele na kiteso ya kilometere mosi na ndambu ti mbanza ya mpa ya Roma. Ntangu bibuka kele na kubasika na mbanza ya ntama mpi kepusana na yina ya mpa, balombi zole ya bifwa meso mewa makelele. Mosi na kati na bau zina na yandi Bartimeo.

Na ntangu bau mezaba nde kele Yezu muntu kele na kuluta, Bartimeo ti nkundi na yandi meyantika na kuboka nde: “Mfumu, Mwana ya Davidi, wila beto mawa!” Ntangu kibuka metubila bau na makasi yonso nde bau kuvanda pima, bau meboka nkutu kuluta ngolo mpi na bandinga ya ngolo nde: “Mfumu, Mwana ya Davidi, wila beto mawa!”

Ntangu yandi mewa kuyangisa yina, Yezu metelama. Yandi melomba na bayina kele ti yandi na kubinga bantu yina kesala makelele yina yonso. Bau mekwenda na bifwa-meso yina ya balombi mpi bau metubila mosi na bau nde: “Vanda na kikesa, telama, yandi ke binga nge.” Ya kufuluka na kyese, kifwa-meso yango melosa lele na yandi ya zulu, metelama na mbala mosi mpi mekwenda na Yezu.

Yezu meyufula nde: “Beno zola nde mono sala beno nki?”

Bifwa-meso yonso zole mebondila nde: “Mfumu, beto zola nde beto kumona diaka!”

Ya kupusama na mawa, Yezu mesimba meso na bau. Na kutadila disolo ya Marko, Yezu kutubilaka mosi na kati na bau nde: “Kwenda, lukwikilu na nge me belula nge.” Na mbala mosi bifwa-meso ya balombi meyantika kumona, mpi na ntembe ve bau zole meyantika na kukembila Nzambi. Ntangu bantu yonso memona mambu yina mesalama, bau mpi mekembila Nzambi. Nkatu kuvingila, Bartimeo ti nkundi na yandi meyantika na kulanda Yezu.

Ntangu Yezu kele na kuluta na Yeriko, bibuka ya nene mezyunga yandi. Konso muntu kezola kumona muntu yina mebelula bifwa-meso. Bantu keyangisa Yezu na bandambu yonso, na mpila nde, bantu ya nkaka nkutu lenda kumona yandi ve. Na kati ya bantu yai Zasheo, mfumu ya bakalaki ya mpaku ya Yeriko ti babwala ya nzyunga kele pana. Yandi kele nkufi kibeni na mpila nde yandi lenda kumona ve mambu yina keluta.

Ebuna, Zasheo mekwenda ntinu na ntwala mpi memata na nti ya bafige ya kele na lweka ya nzila yina ya Yezu kele na kulutila. Mpila yandi kele na nti yai, yandi lenda kumona mbote mambu yonso ya keluta. Ntangu bibuka kepusana, Yezu metombula meso na nti, mpi mebinga nde: “Zasheo, sasuka, kwisa kutuluka, sambu mono fweti kwenda kulala na nzo na nge bubu yai.” Zasheo metuluka ti kyese yonso mpi mekwenda nswalu na nzo na yandi sambu na kubongisila nzenza na yandi ya kuluta mfunu bima.

Kansi, ntangu bantu memona mambu yina kesalama, bau yonso meyantika na kubokuta. Bau kemona yau mbi nde Yezu kuvanda nzenza ya muntu ya mutindu yai. Zaba nde, Zasheo kukumaka mvwama na kuyibaka na kukonda masonga yonso mbongo na kisalu na yandi ya kikalaki ya mpaku.

Bantu mingi melanda, ebuna ntangu Yezu mekota na kati ya nzo ya Zasheo, bau kebokuta nde: “Yandi me kwenda kulala na nzo ya muntu ya masumu!” Kansi, Yezu memona na kati ya Zasheo mwa ngindu ya kubalula ntima. Mpi Yezu mebaka ve nsoni, sambu Zasheo metelama mpi metuba nde: “Mfumu, tala, bima yonso ya mono ke na yo mono ta kabisa yo na ndambu zole, ebuna ndambu mosi mono ta pesa na bansukami. Kana mono bakaka mbongo ya muntu na nzila ya luvunu, mono ta vutu[di]la yandi yo mbala iya.”

Zasheo memonisa nde kubalula na yandi ya ntima kele ya kyeleka na kupesaka kikatikati ya bima na yandi na bansukami mpi na kusadilaka kikatikati yina ya nkaka sambu na kuvutudila bayina ya yandi kuyibaka. Yau kemonana nde yandi lenda kusala ntalu ya bakarti na yandi sambu na kuzaba ntalu ikwa yandi fwete kupesa na bantu yai. Ebuna yandi kedya ndefi nde yandi tavutula yau mbala iya, na kulandaka nsiku ya Nzambi yina ketuba nde: ‘Kana muntu kuyiba . . . dimeme . . . na dimeme yandi fweti futa mameme iya.’

Yezu meyangalala na mpila Zasheo mesila na kupesa bima na yandi, sambu Yandi ketuba nde: “Fami yai me guluka bubu yai, sambu muntu yai mpi kele mwana ya Abrahami. Sambu Mwana-muntu kwisaka kusosa ti kugulusa bantu yina me vilaka.”

Ntama mingi ve, Yezu kutaka kingana sambu na kutendula dyambu ya ‘bantu yina mevilaka’ na kingana na yandi ya metadila mwana ya kuvilaka. Ntangu yai beto kele ti mbandu ya kyeleka ya luzingu, ya bantu ya mevilaka yina memonana. Ata nkutu bamfumu ya mabundu ti bayina kelanda bau kekudiyangisa mpi kebokuta na yina metala dikebi ya Yezu kepesa bantu bonso Zasheo, Yezu kelanda na kusosa mpi na kuvutula bana ya Abrahami yina mevilaka. Matayo 20:​29-34; Marko 10:​46-52; Luka 18:35–19:10; Kubasika 22:⁠1.

▪ Yau kemonana nde na inki kisika Yezu mekutana ti bifwa-meso ya balombi, mpi inki yandi mesala sambu na bau?

▪ Zasheo kele nani, mpi sambu na inki yandi memata na nti?

▪ Inki mutindu Zasheo memonisa kubalula ntima?

▪ Inki dilongi beto lenda kubaka na mutindu ya Yezu mebaka Zasheo?