Kapu 105
Luyantiku ya Kilumbu ya Mfunu
NTANGU Yezu mekatuka na Yeruzalemi na Kintete na nkokila, yandi mevutuka na Betania yina kele na nkulumuka ya ndambu ya esti ya Ngumba ya Baolive. Bilumbu zole ya kisalu na yandi ya nsuka na Yeruzalemi memana. Na ntembe ve, Yezu melala dyaka ti nduku na yandi Lazare. Kubanda bau kukatukaka na Yeriko na Kitanu, yai kele mpimpa ya iya ya yandi melungisa na Betania.
Ntangu yai, na suka ya Kizole, Nisani 11, yandi ti balongoki na yandi mebaka dyaka nzila. Yai kemonana nde yau kele kilumbu ya kuluta mfunu ya kisalu ya Yezu, ya kisalu mingi mpenza kubanda yandi kuyantikaka kisalu na yandi. Yau kele kilumbu ya nsuka ya yandi kemonana na tempelo. Mpi yau kele kilumbu ya nsuka ya yandi kelonga na meso ya bantu yonso na ntwala ya mfundusu ti lufwa na yandi.
Yezu ti balongoki na yandi mebaka kaka nzila yina ya zulu ya Ngumba ya Baolive sambu na kwenda na Yeruzalemi. Na lweka ya nzila yina kekatukaka na Betania, Piere memona nti yina ya Yezu kusingaka mazono na nima ya midi. Yandi metuba nde: “Longi, tala! Nti ya bafige ya nge singaka yo me yuma.”
Kansi sambu na inki Yezu mefwa nti yina? Yandi kemonisa kikuma ntangu yandi kelanda na kutuba nde: “Mono ke tubila beno mambu ya kieleka: Kana beno ke kwikila kukonda ntima zole, beno lenda sala mutindu mono me sala nti ya bafige, kansi beno lenda tuba na ngumba yai [Ngumba ya Baolive yina bau kele ya kutelama] nde: ‘Katuka pana, kwenda kubwa na nzadi-mungwa,’ ebuna mambu yina ta salama kaka. Konso kima yina ya beno ta lomba na bisambu na beno, kana beno ke tula ntima nde beno ta baka yo, beno ta baka yo kaka.”
Yau yina, na kuyumisaka nti, Yezu kele na kumonisa na balongoki na yandi nde bau fwete kuvanda ti lukwikilu na Nzambi. Mutindu yandi ketuba nde: “Konso kima ya beno ta lomba na bisambu na beno, beno fweti tula ntima nde beno me baka yo, ebuna Nzambi ta pesa beno yo.” Dilongi ya mfunu ya inki mutindu bau fwete kubaka, mingimingi, na yina metala minyokudi yina mebika fyoti na kukwisa! Kansi, kele ti kima ya nkaka ya kewakana ti kuyuma ya nti ya bafige mpi nkadulu ya lukwikilu.
Dikanda ya Izraele, bonso nti yai ya bafige, kele ya luvunu na kutala na meso. Ata nkutu dikanda yango kele na ngwakana ti Nzambi mpi lenda kumonana na meso nde yau kelandaka bansiku na yandi, yau memonisaka nde yau kele ve ti lukwikilu, yau mebutaka ve bambuma ya mbote. Sambu na kukonda ya lukwikilu, yau kesosa mpi kubuya Mwana ya yandi mosi Nzambi! Yau yina, na kuyumisaka nti ya bafige ya kebutaka ve mbuma, Yezu kele na kumonisa na nsonga ya kyeleka, inki tavanda nsuka ya dibuta yai ya kekondaka kubuta mbuma mpi ya kukonda lukwikilu.
Na nima ya ntangu fyoti, Yezu ti balongoki na yandi mekota na Yeruzalemi, mpi mutindu bau meyikanaka, bau mekwenda na tempelo, kisika Yezu meyantika na kulonga. Na ntembe ve, bambuta ya banganga-Nzambi ti bambuta-bantu, na kuyibukaka dyambu yina ya yandi kusalaka mazono sambu na bansobisi ya mbongo, bau mesosila yandi nde: “Na nki kiyeka nge ke salaka mambu yai? Nani pesaka nge kiyeka yango?”
Yezu mevutula nde: “Mono mpi ke yula beno kaka mambu mosi; ebuna kana beno pesa mono mvutu, mono ta tubila beno na nki kiyeka mono ke salaka mambu yai. Nani tindaka Yoane na kubotika bantu, Nzambi to bantu?”
Banganga-Nzambi ti bambuta-bantu meyantika na kuyulana bau na bau sambu na kuzaba inki mutindu bau tapesa mvutu. “Kana beto vutula nde: ‘Nzambi muntu tindaka yandi,’ yandi ta yula [beto] nde: ‘Sambu na nki beno kwikilaka mambu ya Yoane ve?’ Kansi kana beto vutula nde: ‘Bantu tindaka yandi,’ beto ke tina bantu boma, sambu bantu yonso ke zabaka nde Yoane vandaka profete ya Nzambi.”
Bamfumu kemona ve inki mvutu bau fwete kupesa. Ebuna bau mevutudila Yezu nde: “Beto zaba ve.”
Na nima, Yezu metuba nde: “Mono mpi, mono ke tubila beno ve na nki kiyeka mono ke salaka mambu yai.” Matayo 21:19-27; Marko 11:19-33; Luka 20:1-8.
▪ Nki kima ya kuswaswana kilumbu ya Kizole, Nisani 11 kele na yau?
▪ Inki malongi Yezu kepesa ntangu yandi meyumisa nti ya bafige?
▪ Inki mutindu Yezu mevutudila bayina meyufula kana na kiyeka ya nani yandi kesala mambu?