Kapu 115

Kuswana Mebasika

NA LUYANTIKU ya nkokila, Yezu kulongaka dilongi ya kitoko na kisalu ya kudikulumusa na kuyobisaka makulu ya bantumwa na yandi. Na nima, yandi kubasisaka Lusungiminu ya lufwa na yandi yina mefinama. Ntangu yai, mingimingi na kutadila mambu yina mekatuka kuluta, kima mosi ya kuyituka mesalama. Bantumwa na yandi meyantika na kudikotisa na kuswana sambu na kusosa kuzaba nani kele ya kuluta nene! Yau kemonana nde maswana yango meyantika ve bubu yai.

Yibuka nde na nima ya lukituku ya Yezu na zulu ya ngumba, bantumwa kuswanaka sambu na kuzaba nani kuvandaka muntu ya nene na kati na bau. Dyaka, Yakobo ti Yoane kulombaka kisika ya lukumu na Kimfumu, kima ya kunataka ntembe na kati ya bantumwa. Ntangu yai, na mpimpa na yandi ya nsuka, mawa ya inki mutindu Yezu fwete kuvanda na yau na kumona bau keswana dyaka! Inki yandi mesala?

Na kisika ya kunganina bantumwa sambu na kikalulu na bau, Yezu meyindula ti bau na nzizidi yonso nde: “Awa na nsi-ntoto bantotila ke yalaka bantu na bo na kingolo-ngolo; bantu yina ke yalaka bantu, bo ke zolaka nde bantu na bo kubinga bo ‘bantu yina ke salaka mambote.’ Kansi beno, beno fweti sala mpidina ve. . . . Sambu nani me luta nene, keti muntu yina me vanda na mesa to muntu yina ke sadila yandi? Si muntu yina me vanda na mesa muntu me luta nene!” Na nima, na kuyibusaka bau mbandu na yandi, yandi ketuba nde: “Kansi na kati na beno mono kele bonso muntu yina ke sadilaka beno.”

Ata nkutu bau kele ya kukonda kukuka, bantumwa mesikila ti Yezu ntangu yonso na mimekamu na yandi. Yau yina yandi ketuba nde: “Mono kesala ngwakana ti beno, mutindu Tata mesalaka ngwakana ti mono, sambu na kimfumu.” (NW) Ngwakana yai na kati ya Yezu ti balandi na yandi ya kwikama kevukisa bau na yandi sambu na kukabisa luyalu ya kimfumu. Kaka ntalu ya fyoti ya bantu 144000 kebakama na nsukansuka na kati ya ngwakana yai sambu na Kimfumu.

Ata nkutu bantumwa mebaka lusilu yai ya kitoko ya kuvukana ti Kristu na luyalu ya Kimfumu, ntangu yai bau kele ya kulemba na kimpeve. Yezu ketuba nde: “Na mpimpa yai kaka beno yonso ta bikisa mono.” Kansi, na kutubilaka Piere nde Yandi kusambaka sambu na yandi, Yezu kesyamisa nde: “Ntangu nge ta kwisa kuvutuka . . . nge pesa bampangi na nge kikesa.”

Yezu ketendula nde: “Bana [ya fyoti], mono kele ti beno diaka mwa ntangu fioti kaka. Beno ta sosa mono, kansi mono ke tubila beno sesepi yai mambu ya mono tubaka na Bayuda nde: ‘Beno lenda kwisa kukuma ve na kisika ya mono ke kwenda.’ Nsiku mosi ya mpa ya mono ke pesa beno yo yai: Beno zolana beno na beno. Mutindu mono me zolaka beno, beno mpi beno zolana beno na beno. Kana beno ke zolana beno na beno, bantu yonso ta zaba nde beno kele balonguki na mono.”

Piere meyufula nde: “Mfumu, nge ke kwenda wapi?”

Yezu mevutula nde: “Nge lenda landa mono ve sesepi yai na kisika ya mono ke kwenda, kansi nge ta kwisa kulanda mono na nima.”

Piere meyufula nde: “Mfumu, sambu na nki mono lenda ve kulanda nge sesepi yai? Mono me yilama na kufwa sambu na nge.”

Yezu keyufula nde: “Ya kieleka, nge me yilama na kufwa sambu na mono? Mono ke tubila nge mambu ya kieleka: Ntangu nsusu me dila ntete ve, nge ta buya mbala tatu nde nge zaba mono ve.”

Piere mebuya nde: “Ata kufwa mono ta fwa ti nge kisika mosi, mono ta buya ata fioti ve nde mono zaba nge ve!” Mpi ntangu balongoki ya nkaka mevukana na kutuba mutindu mosi, Piere mebula ntulu nde: “Ata bantu ya nkaka yai yonso kubikisa nge, kansi mono ta bikisa nge ve!”

Na kutubilaka ntangu ya yandi tindaka bantumwa na yandi na kusamuna na Galilea yonso, nkatu kunata mbongo to basaki ya bima, Yezu keyufula bau nde: “Keti kima kukondaka beno?”

Bau mevutula nde: “Ve!”

Yandi metuba nde: “Kansi ntangu yai, konso muntu yina ke na kima ya kunatila mbongo, yandi baka yo; konso muntu yina ke na mwa saki, yandi baka yo. Ebuna konso muntu yina ke na mbele ve, yandi teka kazaka na yandi sambu na kwenda kusumba mbele yina. Sambu mono ke tubila beno nde mambu yai ya bo sonikaka na Mukanda ya Nzambi nde: ‘Bo tangaka yandi ndonga mosi ti bantu yina ke salaka mambu ya mbi,’ mambu yina fweti kwisa kulunga[na] na mono.”

Yezu kele na kutubila ntangu ya yandi tatulama na zulu ya nti ti bantu yina kesalaka mambi, to bantu yina kevwenzaka nsiku. Yandi kemonisa mpi nde balandi na yandi takutana ti munyokudi ya ngolo na nima. Bau ketuba nde: “Mfumu, beto ke na bambele zole awa.”

Yandi mevutula nde: “Bika, imene.” Mutindu beto tamona, bambele yina zole ya bau kele na yau, yau tasadisa Yezu na kulonga dilongi ya nkaka ya mfunu. Matayo 26:​31-35; Marko 14:​27-31; Luka 22:​24-38; Yoane 13:​31-38; Kusonga 14:​1-3.

▪ Sambu na inki kuswana ya balongoki keyitukisa kibeni?

▪ Inki mutindu Yezu memanisa kuswana yango?

▪ Inki kima melungana na ngwakana ya Yezu mesala ti balongoki na yandi?

▪ Inki nsiku ya mpa Yezu mepesa, mpi mfunu ya inki mutindu yau kele na yau?

▪ Inki mutindu Piere memonisa nde yandi kelutisa kuditudila ntima, mpi inki Yezu metubila yandi?

▪ Sambu na inki malongi ya Yezu yina metala kunata basaki ya kunatina mbongo ti ya bima ya kudya kele ya kuswaswana ti yina ya yandi kupesaka ntete?