Kapu 117

Mawa na Kati ya Masamba

NTANGU Yezu memanisa na kusamba, yandi ti bantumwa na yandi 11 ya kwikama meyimbila Yehowa bankunga ya lukembilu. Na nima, bau mekatuka na suku ya etaze sambu na kukulumuka, bau mebasika na mpimpa na madidi mpi mesabuka Muwanda ya Sedroni na ndambu ya Betania. Kansi na nzila, bau metelama na kisika ya mbote, masamba ya Getsemane. Yau kele na Ngumba ya Baolive to mfinama na yau. Yezu ti bantumwa na yandi kekutanaka mbala na mbala awa na banti ya baolive.

Yandi mebikisa bantumwa nana​—⁠mbala ya nkaka penepene na kukota na masamba​—⁠yandi metuma bau nde: “Beno vanda awa, mono me kwenda kuna kusamba Nzambi.” Na nima, yandi mebaka bankaka tatu​—⁠Piere, Yakobo, ti Yoane​—⁠mpi bau mekota na kati ya masamba. Yezu mekuma mawamawa mpi mewa mpasi mingi na ntima. Yandi metubila bau nde: “[Moyo, NW] na mono me fuluka na ntantu; [tii na lufwa, NW]. Beno bikala awa; beno kulala ve, sambu mono mpi ke lala ve.”

Na kupusanaka mwa ndambu na ntwala, Yezu mebwa na ntoto mpi ilungi na ntoto, yandi meyantika na kusamba ngolo kibeni nde: “Tata na mono, kana nge zola, katula mono [dikopa, NW] yai. Kansi kulanda luzolo na mono ve, kansi luzolo na nge.” Inki yandi kezola kutuba? Sambu na inki yandi “mefuluka na ntantu tii na lufwa”? Keti yandi kekatula lukanu na yandi ya kufwa mpi ya kupesa nkudulu?

Ata fyoti ve! Yezu kelomba ve nde yandi kutaninama na kufwa. Ata nkutu ngindu ya kubuya lufwa ya kuditambika, mutindu Piere kupesaka yau, kele kima mosi ya yandi kezola ve. Kansi, yandi kele na mawa sambu yandi kebanga nde mutindu yandi mefinama na kufwa​—⁠bonso ngondi ya ngolo​—⁠tafingisa zina ya Tata na yandi. Ntangu yai, yandi kekudiwa nde mebika bangunga fyoti bau tatula yandi na zulu ya nti bonso muntu mosi ya kuluta mbi​—⁠muvwenzi-Nzambi ya ngolo! Yau yai kima kepesa yandi kibeni mpasi na ntima.

Na nima ya kisambu na yandi ya nda, Yezu mevutuka mpi mekuta bantumwa na yandi yina tatu ya kulala. Na kutubilaka Piere, yandi ketuba nde: “Mpidina beno lenda vanda ya kutelama ve ata lere mosi ti mono? Beno lala ve. Beno samba Nzambi sambu beno kubwa ve.” Kansi na kubakisaka nde bau kuwaka boma mingi mpi nde ntangu meluta, yandi metuba nde: “Ya kyeleka, mpeve kele ngolo, kansi nsuni kele ngolo ve.” (NW)

Na nima, Yezu mekwenda na mbala ya zole mpi melomba nde Nzambi kukatudila yandi “dikopa yai,” disongidila, dikabu ya Nzambi kubikilaka yandi, to luzolo ya Nzambi sambu na yandi. Ntangu yandi mevutuka, yandi mekuta dyaka bau yonso tatu melala na kisika ya kusamba sambu bau kubwa ve na mpukumuna. Ntangu Yezu metubila bau, bau kemona ve kima ya kutuba.

Nsukansuka, na mbala ya tatu, Yezu mekwenda na kitamina ya muntu lenda kulosa ditadi, mpi ya kufukama, na kudilaka ti mansanga, yandi kesamba nde: “Tata, kana nge zola, katudila mono dikopa yai.” (NW) Yezu kele na mpasi mingi na ntima sambu na nsoni yina lufwa na yandi bonso ngondi talosa na zulu ya zina ya Tata na yandi. Mutindu bau tazengila yandi nkanu ya muntu ya mbi​—⁠ya kefingaka Nzambi​—⁠kele kibeni mpasi na kuvibidila!

Ata mpila yina, Yezu kelanda na kusamba nde: “Kulanda luzolo na mono ve, kansi luzolo na nge.” Yezu kendima luzolo ya Nzambi na bulemfu yonso. Na ntangu yango yina, wanzio mekatuka na zulu mekwisa kumonana mpi mesyamisa yandi ti mwa bangogo ya kusyamisa. Ngatu yandi mesonga yandi nde yandi mendimama na Tata na yandi.

Kansi, kizitu ya inki mutindu kele na mapeka ya Yezu! Luzingu ya mvula na mvula ya yandi mosi ti ya bantu yonso kele na kumekama. Kutungisama na mabanza kele ya mingi. Yau yina Yezu kelanda na kusamba dyaka mingi na kikesa yonso, mpi mutoki na yandi mekuma mbwaki bonso menga kebwa na ntoto. Journal de l’Association des médecins américains, ketuba nde: “Ata nkutu yau kuvanda kima mosi ya kesalamaka mingi ve, yau lenda kusalama nde mutoki ya muntu kubasisa menga . . . kana mawa kele ya ngolo.”

Na nima, Yezu mevutuka na mbala ya tatu na bantumwa na yandi mpi yandi mekuta bau dyaka ya kulala. Bau kele ya kulemba sambu na ntantu. Yandi ketuba nde: “Ebwe, beno me lala kaka? Beno ke pema? Mambu ve. Ntangu mpi me lunga. Me bika fioti bo ke pesa Mwana-muntu na maboko ya bantu ya masumu. Beno telama, beto kwendeno! Tala, muntu yina me teka mono yandi yai me kuma penepene.”

Ntangu yandi memanisa ntete ve na kutuba, Yudasi Iskariote mepusana, ti bantu mingi ti batorshe mpi bamwinda ye binwaninu ya bau kele na kunata. Matayo 26:​30, 36-47; 16:​21-23; Marko 14:​26, 32-43; Luka 22:​39-47; Yoane 18:​1-3; Baebreo 5:⁠7.

▪ Na nima ya kukatuka na suku ya etaze, na wapi Yezu ti bantumwa mekwenda, mpi inki yandi mesala kuna?

▪ Na ntangu Yezu kele na kusamba, inki bantumwa kele na kusala?

▪ Sambu na inki Yezu kele na mawa, mpi inki kima yandi kelomba na Nzambi?

▪ Kubasika ya mutoki ya Yezu bonso menga kesonga inki?