Kapu 124

Yandi Mepesama mpi Menatama

NTANGU Pilate, ya mepusama na lukumu ya pima ya Yezu yina kenyokwama, memeka dyaka na kuyambula yandi, bambuta ya banganga-Nzambi mewa nkutu makasi ya kuluta mingi. Bau kekwamina na kukonda kupesa nzila ata na kima mosi nde yau kukakila lukanu na bau ya mbi. Yau yina, bau mevutukila kuboka na bau: “Tula yandi na zulu ya nti! Tula yandi na zulu ya nti!” (NW)

Pilate mevutula nde: “Beno baka yandi beno mosi, beno tula yandi na [nti, NW].” (Ya kuswaswana ti mambu na bau ya bau kutubaka ntete, Bayuda lenda kuvanda na nswa ya kufwa bantu ya mbi yina mesala kifu ya ngolo kibeni na dibundu.) Na nima, na kiteso ya mbala tanu, Pilate metuba nde Yezu kele ve ti makambu, na kutubaka nde: “Mono ke mona ata kisina ya mambu mosi ve ya beno ke funda yandi.”

Bayuda, ntangu bau memona nde balufundu na bau ya politiki menunga ve na kubasisa mbutu, bau mevutukila lufundu na bau ya luvwenzo ya dibundu ya bau kusadilaka bantangu mingi meluta na ntangu ya mfundusu ya Yezu na ntwala ya Sanedreni. Bau ketuba nde: “Beto ke na nsiku mosi, ebuna nsiku yina ke tuba nde yandi fweti fwa, sambu yandi tubaka nde yandi kele Mwana-Nzambi.”

Lufundu yai kele kima ya mpa sambu na Pilate, mpi yau mepesa yandi boma ya kuluta mingi. Ntangu yai yandi mebakisa nde Yezu kele ve muntu ya mpamba, kaka mutindu ndosi ya nkento na yandi ti kikesa ya bumuntu ya Yezu kemonisa yau. Kansi “Mwana-Nzambi”? Pilate kezaba nde Yezu kele muntu ya Galilea. Kansi, keti mbala ya nkaka yandi zingaka na ntwala? Na kuvutulaka yandi dyaka na nzo, Pilate keyufula nde: “Nge kele muntu ya wapi?”

Yezu mevanda pima. Na ntwala, yandi kutubilaka Pilate nde, Kimfumu na yandi kele ya inza yai ve. Ntangu yai, bantendula ya nkaka tavanda na mfunu ve. Kansi, lulendo ya Pilate mebasika sambu yandi mebuya na kupesa mvutu, mpi yandi medasukila Yezu na bangogo yai: “Nge zola tubila mono kima ve? Nge zaba ve nde mono ke na kiyeka ya kubikisa nge, mono mpi ke na kiyeka ya kusonga nde bo tula nge na [nti]?”

Yezu mevutula na bulemfu yonso nde: “Nge ke na kiyeka ya kusala mono ata kima mosi ve, kana Nzambi me pesa nge yo ve.” Yandi ketubila kiyeka ya Nzambi kepesaka na bamfumu ya bantu sambu na kutwadisa mambu ya ntoto. Yezu meyika nde: “Yo yina, muntu yina me kwisa kupesa mono na maboko na nge, yandi me sala [di]sumu ya kuluta [nene].” Ya kyeleka, mfumu ya banganga-Nzambi Kaifa ti bankundi na yandi ye Yudasi Iskariote, bau yonso kele na mukumba ya kuluta Pilate sambu na mambu ya kukonda lunungu ya bau mesadila Yezu.

Ti ngituka ya kuluta mingi sambu na Yezu mpi na kubangaka nde mbala ya nkaka kisina ya Yezu lenda kuvanda Nzambi, Pilate mebaka dyaka kikesa sambu na kuyambula yandi. Kansi, Bayuda mewila ve Pilate. Bau mevutukila lufundu na bau ya politiki, na kutubaka na mayele ya mbi yonso nde: “Kana nge bikisa muntu yai, nge kele nduku ya ntotila [Kaisali] ve. Konso muntu yina ke tubaka nde yandi kele mfumu ya nsi yai, yandi kele mbeni ya [Kaisali].”

Ata nkutu balufundu yina ya ngolo kele, Pilate menata dyaka Yezu na nganda. Yandi metuba dyaka nde: “Tala mfumu na beno yandi yai!”

“Fwa yandi! Fwa yandi! Tula yandi na [nti]!”

Pilate meyufula nkatu kivuvu nde: “Beno zola nde mono tula mfumu na beno na [nti]?”

Bayuda memonaka mpasi na luyalu ya bantu ya Roma. Ya kyeleka, bau kezolaka ve luyalu ya Roma! Kansi, na luvunu yonso, bambuta ya banganga-Nzambi ketuba nde: “Beto ke na mfumu ya nkaka ve, mfumu na beto kele kaka [Kaisali].”

Na kubangaka sambu na pozisio ti lukumu na yandi ya politiki, na nsukansuka, Pilate mendima ndomba ya Bayuda mekangama na yau. Yandi mepesa Yezu. Basoda mekatula Yezu lele ya mpumbu mpi melwatisa yandi bilele na yandi ya zulu. Ntangu bau kenata Yezu sambu na kutula yandi na nti, Yezu fwete kunata yandi mosi nti na yandi ya mpasi.

Ntangu yai, yau kele kikatikati ya ntwala-midi ya Kitanu 14; mbala ya nkaka, midi kezola kulunga. Yezu kele ya kutelama kubanda na Kiya na sukasuka, mpi yandi kemona mpasi na zulu ya mpasi. Mpila kele ya kubakisa nde ngolo na yandi kumana nswalu na ntangu yandi kenata nti ya kilo. Yau yina, muntu mosi ya keluta, zina na yandi Simoni ya Sirene na Afrika, bau mebaka yandi na kisalu ya kunatina yandi yau. Ntangu bau kekwenda, bantu mingi, ti bankento mpi, kelanda, na kumonaka mpasi na ntima sambu na mawa mpi na kudilaka Yezu.

Na kubalukaka na bankento yango, Yezu ketuba nde: “[Bana] bankento ya Yeruzalemi, beno kudila mono ve! Kansi beno dila bana na beno ti beno mosi! Sambu na bilumbu ke kwisa, bo ta tuba nde: ‘Kiese na bankento yina kele bakobo, na bankento yina me butaka ntete ve ti na bankento yina mepesaka ntete bana mabele ve.’ . . . Sambu, kana bo sala mpidina na nti ya mubisu, nki mutindu bo ta sala na nti ya kuyuma?”

Yezu kele na kutubila nti ya dikanda ya Bayuda, yina kele ntete na mwa luzingu ya mubisu na kati na yau sambu yandi kele pana mpi ndambu ya bayina kekwikila na yandi kele na luzingu. Kansi ntangu bau takatula bantu yai na dikanda yango, kaka nti mosi ya kufwa na kimpeve tabikala, ee, kimvuka ya dikanda ya kukauka. Oh, kikuma ya kudila ya inki mutindu tavanda ntangu minkangu ya Roma, yina tasala bonso bantu yina talungisa lukanu ya Nzambi, tabebisa dikanda ya Bayuda! Yoane 19:​6-17; 18:31; Luka 23:​24-31; Matayo 27:​31, 32; Marko 15:​20, 21.

▪ Inki mambu bau mefundila Yezu ntangu bamfumu ya mabundu memona nde balufundu na bau ya politiki mebuta ve ata mbutu?

▪ Sambu na inki Pilate mebanga dyaka mingi?

▪ Banani kele na disumu ya kuluta nene sambu na mambu yina mekumina Yezu?

▪ Na nsukansuka, inki mutindu banganga-Nzambi menunga na kunata Pilate na kupesa Yezu sambu na kugondama?

▪ Inki Yezu metubila bankento yina kedila sambu na yandi, mpi inki yandi kezola kutuba na ntangu yandi ketubila nti bonso yau kele ya “mubisu” mpi na nima ya “kuyuma”?