Kapu 125

Mpasi na Zulu ya Nti

KUMOSI ti Yezu, bamiyibi zole mebasisama sambu na kugondama. Ntama ve ti mbanza, bantu metelama na kisika ya bau kebingaka Golgota, to Kisika ya Mukwa ya Ntu.

Bau mekatula bantu ya boloko bilele ya zulu. Na nima bau mepesa bau vinu ya kuvukisa na masa ya ndudi. Yau kemonana nde bankento ya Yeruzalemi bantu melamba yau, mpi bantu ya Roma kebuyaka ve na kupesa malafu yai ya kelembikaka mpasi na bayina ketulamaka na nti. Kansi, ntangu Yezu melola yau, yandi mebuya na kunwa. Sambu na inki? Ya kyeleka, yandi kezola kununga mumekamu yai ya ngolo ya lukwikilu na yandi ti bingangu na yandi yonso.

Ntangu yai, bau metanda Yezu na zulu ya nti mpi maboko na yandi bau metula yau na zulu ya ntu na yandi. Na nima, Basoda mebula bansonso ya nene na kati ya maboko na yandi ti makulu na yandi. Yandi kewa kibeni mpasi ntangu bansonso kekota na nsuni ti na misisa. Ntangu bau metedimisa nti na zulu, mpasi melutana kibeni, sambu kilo ya nitu kepasula bamputa na bansonso. Kansi, na kisika ya kunwana, Yezu mesamba sambu na basoda ya Roma nde: “Tata, lolula bo, sambu bo ke zaba ve mambu yina ya bo ke sala.”

Pilate metula na zulu ya nti dibaya mosi ya kusonika nde “Yezu muntu ya Nazareti, mfumu ya Bayuda.” Yau kemonana nde, yandi mesonika dyambu yai kaka ve sambu yandi kezitisa Yezu, kansi sambu na kuvwenza banganga-Nzambi ya Bayuda sambu bau nataka yandi na kingolongolo na kuzenga nkanu ya lufwa ya Yezu. Sambu bantu yonso kutanga nsonama yango, Pilate, mesonika yau na bandinga tatu​—⁠Na Kiebreo, na Kilatini, ti na Kigreki ya bantu yonso ketubaka.

Bambuta ya banganga-Nzambi, ti Kaifa mpi Ana, mewa mpasi na ntima. Ntela ya mbote ya metulama na zulu ya nti mebebisa ndungunu na bau. Yau yina, bau mebuya nde: “Nge lenda ve kubikisa bisono yina mpidina nde: ‘Ntotila ya Bayuda,’ kansi nge fweti sonika nde: ‘Muntu yai tubaka nde mono kele ntotila ya Bayuda.’ ” Na makasi sambu banganga-Nzambi mekumisa yandi bonso kima ya kusekinina, Pilate mevutula ti luvwenzo kibeni nde: “Mambu yina ya mono me sonika, mono me sonika imene.”

Banganga-Nzambi, kumosi ti kibuka ya nene, mevukana ntangu yai na kisika ya kugonda, mpi banganga-Nzambi mebuya kimbangi ya nsonama. Bau kevutukila kimbangi ya luvunu ya bau kutaka na ntwala na ntangu ya kusambisa ya Sanedreni. Yau yina, mpila ya kuyituka kele ve nde bantu yina keluta meyantika na kutuba mambu ya mbi sambu na Yezu, na kunikisaka ntu na bau mpi na kutubaka nde: “Si nge muntu vandaka kutuba nde nge ta fwa [tempelo, NW] ebuna nge ta tunga yo diaka na bilumbu tatu! Gulusa moyo na nge kana nge kele Mwana-nzambi! Katuka na [nti, NW] ya mpasi, kwisa kutuluka!”

Banganga-Nzambi ti bankundi ya dibundu mevukana na kuseka nde: “Yandi vandaka kugulusa bantu ya nkaka, kansi yandi lenda kudigulusa ve! Keti yandi kele ntotila ya Israele? Yandi katuka sesepi yai na zulu ya [nti, NW], mpidina beto ta ndima yandi. Yandi tulaka ntima na Nzambi, yandi tubaka mpi nde yandi kele Mwana-Nzambi. Ebuna, Nzambi kugulusa yandi ntangu yai kana yandi ke zolaka yandi!”

Ya kuyalama na mpeve yango yina, basoda mpi meyantika kuseka Yezu. Bau kevwenza yandi na kupesaka yandi vinu ya ndudi, yau kemonana bonso nde bau kepesila yandi yau kaka na bikobo na yandi ya kuyuma mpenza. Bau kesaula nde: “Kana nge kele ntotila ya Bayuda, nge kudigulusa nge mosi.” Ata nkutu bamiyibi​—⁠mosi kutulamaka na nti na diboko ya kibakala ya Yezu, ya nkaka na diboko na yandi ya kinkento​—⁠kevwenza yandi. Yindula ntete! Muntu ya kuluta nene ya ntangu yonso, ee, yina ya kuvukanaka na kuganga bima yonso ti Yehowa Nzambi, mendima na kumona mambu yai yonso!

Basoda mebaka bilele ya zulu ya Yezu mpi mekabula yau na bandambu iya. Bau mebudila yau zeke sambu na kumona kana yau takuma ya nani. Kansi lele ya kati ya mbalu, kele kibeni ya kukonda kutunga. Ebuna, Basoda ketuba bau na bau nde: “Beto pasula lele yai ve, kansi kuluta mbote beto budila yo zeke, sambu na kuzaba kana nani muntu ta baka yo.” Yau yina, nkatu kuzaba, bau kelungisa mvese yina ketuba nde: “Bo kabisaka bilele na mono, bo budilaka yo zeke.”

Ntama ve, mosi na kati ya bamiyibi yango mendima nde Yezu fwete kuvanda kibeni ntotila. Yau yina, na kunganinaka nkundi na yandi, yandi ketuba nde: “Nge ke tina Nzambi boma ve? Si nge me baka ndola mosi ti yandi! Sambu na beto, ndola yai ya beto me baka yo kele ya kieleka, sambu beto me zwa mambu yina ya beto vandaka kusosa. Kansi muntu yai salaka ata mambu mosi ya mbi ve.” Na nima, yandi metubila Yezu ti kudodokila yonso nde: “Yindula mono tangu nge ta [kota na kimfumu na nge, NW].”

Yezu mevutula nde: “Mono ketubila nge mambu ya kieleka bubu yai nde: Nge tavanda ti mono na kati ya Paladisu.” (NW) Lusilu yai talungana ntangu Yezu tayala bonso Ntotila na zulu mpi tafutumuna nsadi ya mambi yai ya mebalula ntima sambu na kuzinga na Paladisu ya ntoto yina baguluki ya Armagedoni ti bankundi na bau tavanda na dibaku ya kubongisa. Matayo 27:​33-44; Marko 15:​22-32; Luka 23:​27, 32-43; Yoane 19:​17-24.

▪ Sambu na inki Yezu mebuya na kunwa vinu yina ya kuvukisa ti mire?

▪ Yau kemonana nde sambu na inki nsonama metulama na zulu ya nti ya Yezu, mpi inki ntubu yau mebasisa na kati ya Pilate ti bambuta ya banganga-Nzambi?

▪ Inki luvwenzo ya nkaka Yezu mebaka na zulu ya nti, mpi inki mebasisa yau kibeni?

▪ Inki mutindu mbikudulu melungana na mambu yina mesalama na bilele ya Yezu?

▪ Inki nsoba mosi na kati ya bamiyibi mesala, mpi inki mutindu Yezu talungisa ndomba na yandi?