Kapu 126

“Ya Kieleka, Muntu Yai Vandaka Mwana-Nzambi”

YEZU mekinga mingi ve na zulu ya nti ntangu, na midi, tombe ya kuyituka ya bantangu tatu mebwa. Kufikama ya ntangu na ngonda ve mesala mambu yai, sambu yau kesalamaka kaka na ntangu yina ngonda kevandaka ya mpa, mpi ngonda kele ya mvimba na ntangu ya Paki. Dyaka, kufikama ya ntangu na ngonda kesalaka baminuta fyoti. Na yau, tombe yango mekatuka na Nzambi! Ngatu dyambu yai ya kuyitukisa mepesa bayina keseka Yezu ntangu ya kuyindula, nkutu yau memanisa maseka na bau.

Kana tombe yango mesalama na ntwala nsadi ya mambi kunganina nkundi na yandi mpi kulomba nde Yezu kuyindula yandi, yau lenda kuvanda kikuma ya kubalula na yandi ya ntima. Mbala ya nkaka, yau kele na nsi ya tombe, ntangu bankento iya, mama ya Yezu ti mpangi na yandi ya nkento Salome, Maria Magdala, ti Maria mama ya ntumwa Yakobo ya Leki, mefinama na nti ya mpasi. Yoane, ntumwa ya zolwa ya Yezu, kele ti bau.

Mpasi ya inki mutindu fwete ‘kutobula’ ntima ya mama ya Yezu ntangu yandi ke mona mwana na yandi ya yandi kunwisaka mabele mpi ya yandi kusansaka kemona mpasi na zulu ya nti! Kansi, Yezu keyindula, mpasi na yandi mosi ve, kansi mambote ya mama na yandi. Na kingolongolo, yandi mebaluka na lweka ya Yoane mpi metubila mama na yandi nde: “Mama yai, tala mwana na nge!” Na nima, na kubalulaka ntu na lweka ya Maria, yandi metubila Yoane nde: “Tala mama na nge!”

Mpila yai, Yezu mepesa lusungiminu ya mama na yandi, yina kele na ntembe ve fwola ntangu yai, na ntumwa na yandi ya yandi kezolaka mingi. Yandi mesala mpila yina, sambu bana ya nkaka ya Maria memonisa ntete ve lukwikilu na yandi. Yau yina, yandi mebikisa mbandu ya mbote ya kusalaka ngidika sambu na bampusa ya kinsuni ya mama na yandi kaka ve kansi mpi sambu na bampusa na yandi ya kimpeve.

Na kiteso ya ngunga ya tatu na nima ya midi, Yezu metuba nde: “Mono ke na nzala ya masa.” Yezu kekudiwa bonso nde Tata na yandi mekatula lutaninu na yandi na mpila nde kwikama na yandi kumekama kibeni. Yau yina yandi mebinga na ndinga ya ngolo nde: “Nzambi na mono, Nzambi na mono, sambu na nki nge me bikisa mono?” Ntangu bau mewa mpila yina, bantu ya nkaka yina kuvandaka ya kutelama na mfinama metuba nde: “Beno wa, yandi ke binga Elia!” Na mbala mosi soda mosi mebaka ntinu mpi, metula eponge ya yandi tulaka na vinu ya ngani na nsongi ya nti ya nda, yandi mepesa yandi sambu na kunwa. Kansi bantu ya nkaka metuba nde: “Beto tala kana Elia ta kwisa kukatula yandi na [nti, NW].”

Ntangu Yezu mebaka vinu yina ya ngani, yandi meboka nde: “Yau melungana!” (NW) Ee, yandi memanisa mambu yonso ya Tata na yandi kutindaka yandi na kusala na zulu ya ntoto. Na nsukansuka, yandi metuba nde: “Tata, mono ke pesa [mpeve, NW] na mono na maboko na nge.” Na kutubaka mpila yina, Yezu kepesa Nzambi ngolo na yandi ya luzingu na kutulaka ntima nde Nzambi tavutudila yandi yau dyaka. Na nima yandi menyekisa ntu na yandi mpi mefwa.

Ntangu Yezu mepema mbala ya nsuka, ndikunu ya ngolo ya ntoto mesalama, na kupasulaka matadi. Ndikunu kele ya ngolo kibeni na mpila nde bamazyamu ya mbambukilu ya kele na nganda ya Yeruzalemi mepasuka mpi banitu mebasika na nganda. Bantu yina keluta kemona banitu ya kufwa ya kebasika kekota na kati ya mbanza mpi bau keta nsangu na yau.

Dyaka, na ntangu ya Yezu mefwa, rido ya nene, ya kegambulaka Kisika ya Santu, ti ya Kuluta Santu na tempelo ya Nzambi, mepasuka na bipesi zole, kubanda na zulu tii na nsi. Rido yai ya kitoko kemonana nde yau fwete kuvanda kiteso ya bametere 18 na nda mpi yau kele kilo mingi! Kimangu ya kuyitukisa kemonisa ve kaka makasi ya Nzambi sambu na bantu yina mefwa Mwana na Yandi, kansi yau ketendula mpi nde nzila ya kukotila na Kisika ya Kuluta Santu, yau mosi zulu, kekanguka ntangu yai na nsadisa ya lufwa ya Yezu.

Ee, ntangu bantu mewa ndikunu ya ntoto mpi memona mambu yina mesalama, bau mewa boma mingi kibeni. Polisi ya minkangu ya kubakaka mukumba ya kuvanda na kisika ya kugonda mepesa Nzambi lukumu. Yandi ke tuba nde: “Ya kieleka, muntu yai vandaka Mwana-Nzambi.” Ngatu yandi kuvandaka pana ntangu bau kutubilaka mambu ya Yezu kutubaka nde yandi kele Mwana ya Nzambi na ntangu ya kusambisama na ntwala ya Pilate. Mpi ntangu yai, yandi mendima nde Yezu kele Mwana ya Nzambi, ee, nde yandi kele mpenza muntu ya kuluta nene ya ntangu yonso.

Bantu ya nkaka mpi keyituka mingi sambu na mambu yai ya kuyituka, mpi bau meyantika na kuvutuka na banzo na kudibulaka na ntulu bonso kidimbu ya mawa ti nsoni na bau ya mingi. Balongoki ya Yezu mingi ya bankento, metelama na ntama na kutalaka ti kubanga yonso mambu yai ya kuyituka. Ntumwa Yoane kele mpi pana. Matayo 27:​45-56; Marko 15:​33-41; Luka 23:​44-49; 2:​34, 35; Yoane 19:​25-30.

▪ Sambu na inki kufikama ya ntangu na ngonda lenda kuvanda ve na kisina ya tombe yai ya bantangu tatu?

▪ Mwa ntangu fyoti na ntwala ya lufwa na yandi, inki mbandu Yezu mepesa sambu na bayina kele na bibuti ya menuna?

▪ Tanga bantela iya ya Yezu metuba na ntwala yandi kufwa?

▪ Inki kima ndikunu ya ntoto mesala, mpi inki kele ntendula ya kupasuka ya rido ya tempelo na bipesi zole?

▪ Inki bupusi bimangu yina mesalama mepesa na polisi ya minkangu yina ya kubakaka mukumba ya kutala kugondama?