Kapu 128

Yezu Kele na Moyo!

NTANGU bankento mekuta mazyamu ya Yezu ya mpamba, Maria Magdala mekwenda ntinu sambu na kutubila Piere ti Yoane. Kansi, na ntembe ve, bankento ya nkaka mebikala na mazyamu. Ntama ve, wanzyo mosi memonana mpi mebingisa bau na kati.

Awa bankento memona dyaka wanzyo ya nkaka, mpi mosi na kati ya bawanzyo metubila bau nde: “Beno kuwa boma ve, sambu mono zaba nde beno ke sosa Yezu yina ya bo tulaka na zulu ya [nti, NW]. Yandi kele awa ve, Nzambi me tedimisa yandi na lufwa mutindu yandi tubaka. Beno kwisa kutala kisika ya yandi vandaka ya kulala. Beno kwenda kuzabisa balonguki na yandi nde: ‘Nzambi me tedimisa yandi na lufwa.’ ” Yau yina, ti kubanga mpi kyese ya mingi, bankento yai mpi mekwenda ntinu.

Na ntangu yau yina, Maria mekutana ti Piere mpi Yoane, ye yandi metubila bau nde: “Bo me katula Mfumu Yezu na maziamu, ebuna beto zaba ve kana bo me kwenda kutula yandi wapi.” Na mbala mosi bantumwa yonso zole mebaka ntinu. Yoane melutila ntinu​—⁠na ntembe ve sambu yandi kele leke​—⁠mpi yandi mekuma muntu ya ntete na mazyamu. Na ntangu yina bankento mekatuka, ebuna ata muntu mosi ve kele na nzyunga. Na kunyekaka, Yoane ketala mbotembote na kati ya mazyamu mpi yandi memona bitembe, kansi yandi mevanda na nganda.

Ntangu Piere mekuma, yandi medyengisa ve mbundu kansi mekota na kati kibeni. Yandi memona bitembe mevanda kisika yango ti lele ya bau sadilaka sambu na kukanga Yezu na ntu. Yau kele ya kukangisa na kisika mosi. Ntangu yai, Yoane mpi mekota na kati ya mazyamu, mpi yandi mekwikila mambu ya Maria kutubaka. Kansi, Piere ti Yoane kebakisa ve nde Yezu metelama, ata nkutu yandi kutubilaka bau mbala mingi nde yandi tatelama. Na ngituka yonso, bau zole mevutuka na nzo, kansi Maria, yina kwisaka kuvutuka dyaka na mazyamu, mebikala.

Na ntangu yina, bankento yina ya nkaka kekwenda ntinu sambu na kutubila balongoki nde Yezu mefutumuka, mutindu bawanzyo kutumaka bau na kusala. Na ntangu ya bau kebaka ntinu ya ngolo kibeni, Yezu mekutana ti bau mpi metuba nde: “Mbote na beno!” Bau mebwa na makulu na yandi, bau mekembisa yandi. Na nima Yezu metuba nde: “Beno kuwa boma ve. Beno kwenda kuzabisa bampangi na mono nde bo kwenda na Galilea; bo ta mona mono kuna.”

Na ntwala, ntangu ndikunu ya ntoto kusalamaka mpi bawanzyo kumonanaka, basoda yina vandaka kukengila kubangaka kibeni mpi bau kumaka bonso bantu ya kufwa. Ntangu bau kuwaka mbote, bau kwendaka mbala mosi na mbanza mpi bau tubilaka bambuta ya banganga-Nzambi mambu yina kusalamaka. Na nima ya kuwakana ti “bambuta-bantu” ya Bayuda, lukanu kubakamaka sambu na kubumba mambu na kupesaka basoda avoka. Bau kutumaka bau nde: “Beno fweti tuba nde: ‘Balonguki na yandi bantu me kwisa kuyiba mvumbi na yandi na kati ya mpimpa, ntangu beto vandaka me lala.’ ”

Sambu basoda ya Roma bau lenda kufwa bau sambu bau kulalaka na kisalu na bau, banganga-Nzambi mesila bau nde: “Kana guvernere kuwa mambu yai [mambu yina metala kulala na beno], beto ta tendudila yandi mbote-mbote; mpidina beno ta mona mpasi ve.” Sambu avoka kuvandaka kibeni mingi, basoda kusalaka mutindu bau kusongaka bau. Yau yina, nsangu ya luvunu na yina metala kuyibama ya nitu ya Yezu kuyalumukaka na kati ya Bayuda.

Maria Magdala, yina kubikalaka na nima na mazyamu, mawa mesimba yandi mingi. Yezu lenda kuvanda na wapi? Na kunyekaka na ntwala sambu na kutala na kati ya mazyamu, yandi memona bawanzyo zole na bilele ya mpembe, bayina ya kumonanaka dyaka! Mosi mevanda na ntu mpi ya nkaka na makulu kisika ya nitu ya Yezu vandaka ya kulala. Bau meyufula nde: “Mama yai, sambu na nki nge ke dila?”

Maria mevutula nde: “Bo me katula Mfumu na mono, ebuna mono zaba ve, kana bo me kwenda kutula yandi wapi.” Na nima, yandi mebaluka mpi yandi memona muntu mosi ya mevutukila ngyufula yango nde: “Mama yai, sambu na nki nge ke dila?” Mpi muntu yai meyufula dyaka nde: “Nge ke sosa nani?”

Na kuyindulaka nde muntu yai lenda kuvanda muntu yina kesalaka na masamba yina kisika mazyamu kele, yandi metubila yandi nde: “[Mfumu], kana nge muntu katulaka yandi, songa mono kisika ya nge tulaka yandi, ebuna mono kwenda kubaka yandi.”

Muntu yango metuba nde: “Maria!” Mpi na mbala mosi Maria mezaba, na mpila ya yandi meyikanaka na kutubila yandi, nde yina kele Yezu. Yandi metuba nde: “Rabuni!” (disongidila “Longi!”) Mpi ti kyese ya mingi kibeni, yandi mekwenda kusimba yandi. Kansi Yezu metuba nde: “Kusimba mono ve, sambu mono me tombuka na Tata ntete ve. Kansi kwenda na bampangi na mono, tubila bo nde mono ke tombuka na Tata na mono, yina kele mpi Tata na beno; mono ke tombuka na Nzambi na mono, yina kele mpi Nzambi na beno.”

Ntangu yai Maria mekwenda ntinu kisika bantumwa ti balandi kuvandaka ya kuvukana. Yandi meyika disolo na yandi na yina ya bankento yina ya nkaka kuyitaka kuta na yina metala lufutumuku ya Yezu. Kansi, babakala yai, ya kukondaka kukwikila ntete bankento ya ntete, yau kemonana nde bau mekwikila mpi ve Maria. Matayo 28:​3-15; Marko 16:​5-8; Luka 24:​4-12; Yoane 20:​2-18.

▪ Na nima ya kukuta mazyamu ya mpamba, inki Maria Magdala mesala, mpi inki mambu bankento yina ya nkaka memona?

▪ Inki Piere ti Yoane mesala ntangu bau mekuta mazyamu ya mpamba?

▪ Inki mambu bankento yina ya nkaka mekutana na yau na nzila ya bau vandaka kwenda sambu na kuta lufutumuku ya Yezu na balongoki?

▪ Inki mambu kukuminaka basoda yina vandaka kukengila, mpi inki mvutu bau mebaka ntangu bau meta mambu yina na banganga-Nzambi?

▪ Inki mambu mesalama ntangu Maria Magdala kele yandi mosi na mazyamu, mpi inki mvutu balongoki mepesa na masolo ya bankento yina?