Kukolama na Zulu

Bigangwa yonso ya kimpeve yina Yehowa gangaka vandaka mbote. Na nima, wanzio mosi kumaka muntu ya mbi. Yo kele Satana Diabulu. Satana zolaka nde bantu yonso ya ntoto kusambila yandi na kisika ya kusambila Yehowa. Tala mambu yina salamaka:

Na kilanga ya Edeni, banti yina vandaka kubuta bambuma ya ntomo vandaka mingi. Yehowa songaka Adami mpi nkento na yandi Eva nde, bo lenda dia bambuma yina mutindu bo me zola. Kansi yo vandaka ti mbuma ya nti mosi yina Nzambi buyisaka bo na kudia. Nzambi tubaka nde kana bo dia yo, bo ta fwa.​—Kuyantika 2:9, 16, 17.

Kilumbu mosi Eva vandaka kaka yandi mosi. Ebuna nioka kwisaka kusolula ti yandi. Ya kieleka, nioka kibeni ve muntu solulaka ti yandi; yo vandaka Satana Diabulu. Yandi muntu salaka nde yo monana bonso nde nioka muntu vandaka kutuba. Satana songaka Eva nde kana yandi dia mbuma yina bo buyisaka bo, yandi ta kuma mayele bonso Nzambi. Yandi songaka diaka Eva nde yandi ta fwa ve. Mambu yina yandi tubaka vandaka luvunu. Kansi, Eva ndimilaka Satana mpi yandi diaka mbuma yina. Na nima, yandi pesaka mpi kitini na Adami. Adami mpi diaka yo.​—Kuyantika 3:1-6.

Mambu yai ya salamaka ke longa beto nde Satana kele nkolami mpi muntu ya luvunu. Yandi songaka Eva nde kana yandi lemfukila ve Nzambi, yandi ta fwa ve. Yo vandaka luvunu. Yandi fwaka. Adami mpi fwaka. Satana fwaka ve na ntangu yina, kansi yandi ta fwa na bilumbu ke kwisa sambu yandi salaka disumu. Kansi sesepi, yandi ke zinga mpi yandi ke landa kukusa bantu. Yandi kele muntu ya luvunu tii bubu, mpi yandi ke sala yonso sambu na kupusa bantu na kuzitisa ve bansiku ya Nzambi.​—Yoane 8:44.

Bawanzio ya Nkaka Me Kolama

Na nima, bawanzio ya nkaka kumaka bantu ya mbi. Bawanzio yina monaka bankento ya kitoko awa na ntoto mpi bo zolaka kuvukisa nitu ti bo. Yo yina, bo kwisaka na ntoto mpi bo lwataka nitu ya bantu. Ebuna bo kumisaka bankento yina bankento na bo. Mambu yina wakanaka ve ti lukanu ya Yehowa.​—Kuyantika 6:1, 2; Yude 6.

Mambu ya bo salaka natilaka mpi bantu bampasi mingi. Bankento ya bawanzio yina butaka bana, kansi bo vandaka ve bonso bana yonso ya nkaka. Bana yango kumaka bantu ya nene, ya nda mpi ya nku. Nsuka-nsuka, mubulu kumaka mingi na ntoto. Ebuna Yehowa bakaka lukanu ya kufwa bantu yonso ya mbi na mvula mosi ya ngolo. Bantu ya gulukaka na Mvula yina ya Ngolo vandaka kaka Noa muntu ya lunungu ti dibuta na yandi.​—Kuyantika 6:4, 11; 7:23.

Kansi bawanzio yina ya mbi vutukaka na insi ya bampeve; bo fwaka ve. Kansi Nzambi pesaka bo ndola. Yandi pesaka bo ve nswa ya kuvutuka na dibuta na yandi ya bawanzio yina me kangamaka ti yandi. Diaka, Yehowa bikaka ve nde bo lwata diaka nitu ya kimuntu. Nsuka-nsuka, bo ta fwa na lusambisu ya nene.​—2 Piere 2:4; Yude 6.

Bo Me Kula Satana na Zulu

Na luyantiku ya mvu nkama na beto, bitumba mosi salamaka na zulu. Mukanda ya Kusonga yina kele na Biblia ke tubila mambu yina salamaka mutindu yai: “Ebuna, bitumba basikaka na zulu: Mikaele [Yezu Kristu yina futumukaka] mpi bawanzio na yandi [ya mbote] nwanaka ti dragoni [Satana], mpi dragoni ti bawanzio na yandi [ya mbi] nwanaka kansi bo nungaka ve, mpi kisika vandaka diaka ve sambu na bo na zulu. Ebuna, bo losaka dragoni ya nene na nsi, nioka ya ntama, yina bo ke bingaka Diabulu mpi Satana, yina ke kusaka ntoto ya mvimba; bo losaka yandi na ntoto, mpi bo losaka yandi na nsi ti bawanzio na yandi [ya mbi].”

Inki mbuma yo butaka? Mukanda ya Kusonga ke tuba diaka nde: “Yo yina, zulu mpi beno bantu yina ke zingaka kuna, beno vanda na kiese!” Bawanzio ya mbote lendaka kuvanda ntangu yai na kiese sambu Satana ti bawanzio na yandi ya mbi, to bampeve ya mbi, vandaka diaka ve na zulu. Ebuna bantu ya ntoto? Biblia ke tuba nde: “Mawa na ntoto mpi na nzadi-mungwa, sambu Diabulu me kulumuka kuna na beno, yandi kele ti makasi ya ngolo, sambu yandi me zaba nde yandi kele ti ntangu fioti.”​—Kusonga 12:7-9, 12.

Ee, Satana ti banduku na yandi yina ya mbi ke kusa bantu na ntoto mpi bo ke natila bo mpasi ya mingi. Bo ke bingaka bawanzio yina ya mbi nde bademo. Bo kele bambeni ya Nzambi. Bo yonso bo kele bantu ya mbi.