Bademo Ke Siamisaka Bantu na Kukolama na Nzambi

Kansi sambu na inki Satana ti bademo na yandi ke salaka ngolo sambu na kukusa bantu? Sambu bo ke zolaka nde beto landa bo na kukolama na bo. Bo ke zolaka nde beto sambila bo. Bo ke zolaka nde beto ndima luvunu na bo mpi nde beto sala mambu yina Yehowa ke zolaka ve. Na kati ya mambu yina, beto lenda tanga mambu ya bantu ke salaka kana muntu me fwa.

Kana muntu yina beto vandaka kuzola me fwa, yo ke salaka beto mpasi mingi. Yo me fwana nde beto wa mpasi. Yo kele mbi ve. Ntangu Lazare nduku ya Yezu fwaka, Yezu “basisaka mansanga.”​—Yoane 11:35.

Mambu mingi ke vandaka ti kuwakana ti bafwa, mpi mambu yango ke salamaka ve mutindu mosi na ntoto ya mvimba. Mingi na kati ya mambu yango ke fwaka ve minsiku ya Biblia. Kansi mambu ya nkaka bantu ke salaka yo sambu bo ke yindulaka nde bantu ke fwaka ve kimakulu mpi nde bafwa lenda mona bantu ya kele na luzingu. Bantu ke lalaka na mafwa, bo ke lutisaka ndilu na kusala mafwa mpi bo ke salaka bafeti ya nene sambu na muntu ya me fwa sambu bo ke waka boma nde kana bo sala ve mpidina, bo ta pesa bampeve ya bafwa makasi. Kansi bafwa “ke zabaka kima ve,” bantu ya ke salaka mambu yina ke pesaka maboko na luvunu ya Satana.​—Longi 9:5.

Bantu ke salaka mambu ya nkaka to bankinsi ya nkaka sambu bo ke ndimaka nde, bafwa ke vandaka ti mfunu ya lusadisu ya bantu yina ke zinga mpi nde bo lenda sala bo mbi kana bo lembika ve ntima ya bafwa. Na bansi ya nkaka, bo ke salaka feti mpi bo ke pesaka bimenga bilumbu 40 to mvula mosi na nima ya lufwa ya muntu. Bo ke salaka buna sambu bo ke tubaka nde mambu yina ke sadisaka muntu ya me fwa ‘na kukwenda’ na insi ya bampeve. Kima ya nkaka ya bantu ke salaka mingi kele kupesa bafwa madia mpi masa.

Kusala mambu yina yonso kele mbi sambu yo ke pesaka maboko na luvunu ya Satana na yina me tala bafwa. Keti Yehowa lenda ndima nde beto vukana na mambu ya mutindu yina ya ke katukaka na malongi ya bademo? Ata fioti ve.​—2 Bakorinto 6:14-18.

Bansadi ya Nzambi ya kieleka ke vukanaka ve na mambu yonso yina ke pesaka maboko na luvunu ya Satana. Kansi, bo ke kudipesaka na kusadisa bantu ya kele na luzingu mpi kupesa bo kikesa. Bo ke salaka yo na zola. Bo me zaba nde kana muntu me fwa, Yehowa mpamba muntu lenda futumuna yandi.​—Yobi 14:14, 15.

Nzambi Ke Buyisaka Bisalu ya Bampeve ya Mbi

Bantu ya nkaka ke solulaka ti bademo mbala mosi to na nzila ya banganga-nkisi. Bo ke bingaka yo bisalu ya bampeve ya mbi. Kusadila banzambi to bangolo yina ke monanaka ve (vaudou), kindoki, mazi, kinganga-ngombo mpi kusolula ti bafwa kele bisalu ya bampeve ya mbi.

Biblia ke buyisaka mambu yina. Yo ke tubaka nde: “Bo fwete mona ve na kati na beno muntu . . . yina ke zabisaka na ntwala mambu yina ta bwa, muntu yina ke salaka mazi, muntu yina ke sosaka bidimbu ya mambu yina ke kwisa, nganga-nkisi, muntu yina ke kangaka bankaka na bankisi, muntu yina ke kwendaka kutala muntu ya ke solulaka ti bampeve ya bafwa, muntu yina ke zabisaka bantu mambu yina ta kumina bo, to muntu yina ke yulaka mambu na bafwa. Konso muntu yina ke sala mambu yai kele nzanzi na meso ya Yehowa.”​—Kulonga 18:10-12.

Sambu na inki Yehowa ke buyisa bantu kibeni mambu yina?

Yehowa ke buyisaka beto mitindu yonso ya bisalu ya bampeve ya mbi sambu na mambote na beto. Yandi ke zolaka bantu mpi yandi ke tudilaka bo dikebi. Yandi me zaba mpi nde bantu yina ke kudikotisaka na mambu ya bademo ke kudinatilaka bampasi.

Nilda ke zingaka na Brésil. Yandi me kutakanaka ti mambu yai. Yandi kele nganga-nkisi. Bademo bebisaka luzingu na yandi. Yandi ke tuba nde: “Mono vandaka . . . na maboko ya bampeve, bo vandaka kupesa mono bansiku. Bantangu ya nkaka mono vandaka kuzaba mambu, kansi bantangu ya nkaka, mono vandaka ve kuzaba mambu, mono kotaka lupitalu sambu na maladi ya ntu. Bademo niokulaka mono mingi tii kuna mono belaka. Mono yantikaka kunwa bankisi mpi malafu kukonda kuyambula. Yo salaka bamvula mingi.”

Na nima, Yehowa mpi Bambangi ya Yehowa sadisaka Nilda. Yandi katukaka na nsi ya kiyeka ya bademo. Bubu yai, yandi me kumaka ti luzingu ya mbote mpi ya kiese. Yandi ke tuba nde: “Mono ke pesa bantu yonso ndongisila nde beno meka ve kudikotisa na mambu ya bampeve [ya mbi] ata sambu na ntangu fioti mpamba.”