Dilongi Ya 5

Lukanu ya Nzambi Sambu na Ntoto Kele Inki?

Sambu na inki Yehowa kugangaka ntoto? (1, 2)

Sambu na inki ntangu yai ntoto kele ve paladisu? (3)

Inki takumina bantu ya mbi? (4)

Na makwisa, inki Yezu tasala sambu na bantu ya maladi? baminunu? bafwa? (5, 6)

Sambu na kubaka mambote ya makwisa, inki nge fwete sala? (7)

1. Yehowa kugangaka ntoto yai na mpila nde bantu kuyangalala na kuzinga na zulu na yau kimakulu. Yandi kuzolaka nde bantu ya mbote mpi ya kyese kuzinga na zulu ya ntoto ntangu yonso. (Nkunga 115:16; Yezaya 45:18) Ntoto tabebisama ve ata fyoti; yau tazinga kimakulu.​—⁠Nkunga 104:5; Longi 1:⁠4.

2. Na ntwala ya kusala muntu, Nzambi kuponaka kitini mosi ya fyoti ya ntoto mpi yandi kukumisaka yau paladisu mosi ya kitoko. Yandi kubingaka yau kilanga ya Edeni. Kele kisika yina ya yandi kutulaka bakala mpi nkento ya ntete, Adami ti Eva. Nzambi kupesaka bau mukumba ya kubuta bana mpi kufulusa ntoto ya mvimba. Malembemalembe, bau zolaka kukumisa ntoto ya mvimba paladisu.​—⁠Kuyantika 1:28; 2:​8, 15.

3. Adami ti Eva kusalaka disumu na kukululaka nsiku ya Nzambi na luzolo yonso. Yau yina, Yehowa kubasisaka bau na kilanga ya Edeni. Paladisu kuvidisamaka. (Kuyantika 3:​1-6, 23) Kansi Yehowa mevilaka ve lukanu na yandi sambu na ntoto yai. Yandi kesila na kukumisa yau paladisu, kisika bantu tazinga kimakulu. Inki mutindu yandi tasala yau?​—⁠Nkunga 37:⁠29.

4. Na ntwala nde ntoto yai kukuma paladisu, bantu ya mbi yonso fwete kukatulama. (Nkunga 37:38) Yau tasalama na Armagedoni, yina kele mvita ya Nzambi sambu na kusukisa mambi. Na nima, Satana takangama na boloko bamvula 1000. Yau kesongidila nde ata muntu mosi ve ya mbi tabikala sambu na kubebisa ntoto. Kaka bansadi ya Nzambi taguluka.​—⁠Kusonga 16:​14, 16; 20:​1-3.

5. Na yau, Yezu Kristu tayala bonso Mfumu na zulu ya ntoto yai sambu na bamvula 1000 yango yina. (Kusonga 20:⁠6) Malembemalembe, yandi takatula disumu na mabanza mpi na banitu na beto. Beto takuma bantu ya kukuka kaka bonso Adami ti Eva kuvandaka na ntwala ya kusumuka. Na nsuka, maladi, kinunu ti lufwa tavanda dyaka ve. Bantu ya maladi tabelulama, mpi baminunu takuma dyaka batoko.​—⁠Yobi 33:25; Yezaya 33:24; Kusonga 21:​3, 4.

6. Na ntangu ya Luyalu ya Yezu ya Bamvula Funda, bantu ya kwikama tasala sambu na kubalula ntoto ya mvimba paladisu. (Luka 23:43) Mpi dyaka, mafuku ya bafwa tafutumuka na luzinga ya bumuntu awa na ntoto. (Bisalu 24:15) Kana bau kusala mambu ya Nzambi kelomba na bau, bau talanda kuzinga na zulu ya ntoto kimakulu. Kana ve, bau tafwa kimakulu.​—⁠Yoane 5:​28, 29; Kusonga 20:​11-15.

7. Ebuna, lukanu ya kisina ya Nzambi sambu na ntoto talungana. Keti nge tazola kubaka balusakumunu yai ya makwisa? Kana ee, nge fwete landa kulonguka mambu yina metala Yehowa mpi kulemfuka na malombu na yandi. Kuvukana na balukutakanu na Nzo ya Kimfumu ya Bambangi ya Yehowa tasadisa nge na kulungisa yau.​—⁠Yezaya 11:9; Baebreo 10:​24, 25.

[Kifwanisu ya kele na lutiti 10]

Paladisu yina kuvidisamaka

[Bifwanisu ya kele na lutiti 11]

Na nima ya Armagedoni, ntoto takumisama paladisu