Dilongi Ya 12

Kumonisa Luzitu Sambu na Luzingu mpi Menga

Inki mutindu beto fwete kutadila luzingu? (1) kubasisa divumu? (1)

Inki mutindu Bakristu kemonisaka nde bau kezabaka mfunu ya kutanina? (2)

Keti kufwa bambisi kele mbi? (3)

Wapi mwa bisalu yina kekonda kumonisa luzitu sambu na luzingu? (4) Nsiku ya Nzambi na yina ketadila menga kele inki? (5)

Keti yau ketadila mpi kuvutula menga? (6)

1. Yehowa kele nto ya luzingu. Luzingu ya bigangwa ya moyo yonso mekatukaka na Nzambi. (Nkunga 36:⁠9) Luzingu kele ya santu na meso ya Nzambi. Ata luzingu ya mwana yina mebutuka ntete ve yina kele na kati ya mama na yandi kele mfunu mingi na meso ya Yehowa. Kufwa na luzolo yonso mwana ya mutindu yina ya keyela kele mbi na meso ya Nzambi.​—⁠Kubasika 21:​22, 23; Nkunga 127:⁠3.

2. Bakristu ya kyeleka kesungiminaka lutaninu mingi. Bau kesosaka kuzaba mbotembote kibeni kana mitumambila ti banzo na bau kele na lutaninu. (Kulonga 22:⁠8) Bansadi ya Nzambi ketulaka ve myoyo na bau na kigonsa kaka sambu na luyangalalu to byese ya kuluta. Yau yina, bau kevukanaka ve na bansaka ya kingolongolo yina ketindaka na kunyokula bantu ya nkaka na nku yonso. Bau kebuyaka baluyangidilu yina kesyamisaka mubulu.​—⁠Nkunga 11:5; Yoane 13:⁠35.

3. Luzingu ya bambisi mpi kele ya santu na meso ya Ngangi. Mukristu lenda kufwa bambisi sambu na kuzwa madya mpi bilele to sambu na kuditanina na maladi ti na kigonsa. (Kuyantika 3:21; 9:3; Kubasika 21:28) Kansi yau kele mbi na kunyokula bambisi to na kufwa yau kaka sambu na nsaka to na luyangidilu.​—⁠Bingana 12:⁠10.

4. Kunwa makaya, kutafuna minkanzi ya betele, mpi kunwa dyamba sambu ya kyese kele ve sambu na Bakristu. Bisalu yai kele mbi sambu: (1) yau kekumisaka beto bampika na yau, (2) yau kebebisaka nitu na beto, mpi (3) yau kele mvindu. (Roma 6:19; 12:1; 2 Korinto 7:⁠1) Yau lenda kuvanda mpenza mpasi na kuyambula bikalulu yai. Kansi beto fwete kusala mpila yina sambu na kuyangidika Yehowa.

5. Menga mpi kele ya santu na meso ya Nzambi. Nzambi ketuba nde moyo, to luzingu, kele na menga. Yau yina, yau kele mbi na kudya menga. Yau kele mpi mbi na kudya musuni ya mbisi yina mebasisama menga mbotembote ve. Kana mbisi mefwa na kunyongaka yau nkingu to na mutambu, yau fwete kudyama ve. Kana yau mefwa na tolotolo to na masasi, yau fwete kuzengama nkingu nswalunswalu kana yau fwete kudyama.​—⁠Kuyantika 9:​3, 4; Levi 17:​13, 14; Bisalu 15:​28, 29.

6. Keti yau kele mbi na kundima kuvutula menga? Yibuka nde, Yehowa kelomba beto na kubuya menga. Yau kesongidila nde beto lenda ve kubaka menga na banitu na beto ata na inki mutindu, yau kuvanda ya muntu ya nkaka to nkutu ya beto mosi yina melundama sambu na kuvutulama na nitu na beto. (Bisalu 21:25) Yau yina, Bakristu ya kyeleka kendimaka ve kuvutula menga. Bau tandima mitindu ya nkaka ya nkisi ya munganga, mu mbandu kutula bankisi yina ya kukonda menga. Bau kezolaka kuzinga, kansi bau tameka ve kugulusa luzingu na bau na kukululaka nsiku ya Nzambi.​—⁠Matayo 16:⁠25.

[Bifwanisu ya kele na lutiti 25]

Sambu na kuyangidika Nzambi, beto fwete kubuya kuvutula menga, bikalulu ya mbi, mpi bigonsa ya kukonda mfunu