Dilongi Ya 15

Sadisa Bankaka na Kusala Luzolo ya Nzambi

Sambu na inki kusonga bantu ya nkaka mambu yina ya nge kelonguka? (1)

Ti nani nge lenda kukabula nsangu ya mbote? (2)

Inki bupusi nkadilu na nge lenda kuvanda na yau na zulu ya bankaka? (2)

Inki ntangu nge lenda kusamuna kumosi ti dibundu? (3)

1. Ntangu yai, nge melonguka mambu mingi ya mbote na Biblia. Nzayilu yai lenda kunata nge na kulwata bumuntu ya Bukristu. (Efezo 4:​22-24) Nzayilu ya mutindu yina kele mfunu sambu na nge na kubaka luzingu ya mvula na mvula. (Yoane 17:⁠3) Kansi, bantu ya nkaka mpi kele na mfunu ya kuwa nsangu ya mbote na mpila nde bau lenda kuguluka. Bakristu yonso ya kyeleka fwete kupesa kimbangi na bankaka. Yau kele ntuma ya Nzambi.​—⁠Roma 10:10; 1 Korinto 9:16; 1 Timoteo 4:⁠16.

2. Nge lenda kuyantika na kukabulaka mambu ya mbote ya nge kelonguka kumosi ti bantu yina kele mfinama na nge. Songa yau na dibuta na nge, na banduku na nge, na bankundi na nge ya nzo-nkanda, mpi na bankundi na nge ya kisalu. Na ntangu nge kesala yau, vanda na ntima ya mbote mpi na nzizidi. (2 Timoteo 2:​24, 25) Mpi yibuka nde bantu ketalaka mingi nkadilu ya muntu kuluta kuwa mambu yina ya yandi ketubaka. Yau yina, nkadilu na nge ya mbote lenda kubenda bankaka na kuwa nsangu ya nge ketubila bau.​—⁠Matayo 5:16; 1 Piere 3:​1, 2, 16.

3. Na nima, nge lenda kulungisa malombu sambu na kuyantika kusamuna kumosi ti dibundu ya Bambangi ya Yehowa yina kele na bwala na nge. Yai kele kitambi ya mfunu na kuyela na nge. (Matayo 24:14) Kyese ya inki mutindu yau tavanda kana nge kuka kusadisa muntu ya nkaka na kukuma nsadi ya Yehowa mpi kubaka luzingu ya mvula na mvula!​—⁠1 Tesalonika 2:​19, 20.