Nsangu ya Kimfumu No. 35

Keti Kele ti Kilumbu Bantu Yonso Tazolana?

Zola ya Mpangi Mekuma Madidi

BANTU mingi kekudiwa ya kuyambulama mpi na mpasi, bau kele ve ti kisika ya kwenda kubaka lusadisu. Nkento mosi ya meyambulaka kisalu ya mumbongo tubaka nde: ‘Kilumbu mosi na nkokila, mufwidi mosi ya nkento yina kezingaka na nzo na mono ya etazi kokulaka na kyelo na mono mpi tubaka nde yandi vandaka kudiwa yandi mosi. Mono tubilaka yandi na luzitu yonso kansi mbala mosi nde mono vandaka ti kisalu. Yandi lombaka ndolula sambu yandi yangisaka mono mpi yandi kwendaka.’

Mawa mingi, kaka na mpimpa yina mosi, nkento yina ya mufwidi kudifwaka. Na nima, nkento yina ya mumbongo tubaka nde yandi bakaka “dilongi mosi ya nene.”

Kukonda ya zola ya mpangi kevandaka mbala mingi kima mosi ya mawa mingi. Na ntangu ya mavwanga ya bikanda na Bosnie ti na Herzégovine, yina vandaka ntete bansi ya Yougoslavie, bau basisaka na ngolo bantu kuluta fuku mosi na banzo na bau mpi bamingi bau fwaka bau. Na banani? Mwana ya nkento mosi yina bau kulaka na bwala na yandi dilaka nde: “Na bampangi na beto. Beto vandaka kuzaba bau.”

Na Rwanda bantu bankama ya mafunda gondamaka, mbala mingi na bampangi na bau mosi. Zulunalu The New York Times tubaka nde: “Bahutu ti Batutsi [vandaka kuzinga] kumosi, bau vandaka kukwelana, nkatu mayindula to nkutu kuzaba nani vandaka Muhutu, nani vandaka Mututsi. Na nima dyambu mosi kotisaka nsoba na mbala mosi,” mpi “kugondana yantikaka.”

Mutindu mosi, Bayuda ti Baarabe na Israël kezingaka kumosi na mambu yonso, kansi bamingi kemenganaka. Mambu yango kele kiteso mosi na bantu mingi ya Katolika ti ya Misioni yina kezingaka na Irlande, ti na bantu yankaka mingi na bansi yankaka. Ata mbala mosi ve na nkenda, inza mekondaka zola mutindu yai.

Sambu na Inki Zola ya Mpangi Mekumaka Madidi?

Ngangi na beto kepesa mvutu. Ndinga na yandi, Biblia, kebinga bilumbu ya beto kezinga nde “bilumbu ya nsuka.” Yai kele nsungi mosi yina, mbikudulu ya Biblia ketuba nde bantu tavanda ve ti “zola ya kyeleka.” Sambu na yina metala “bantangu ya mpasi” yai, yina Masonuku kebinga mpi “nsuka ya ngidika ya bima,” (New World Translation) Yezu Kristu yitaka kutuba nde “kuzolana na kati ya bantu mingi ta yantika kumana [“takuma madidi,” “NW”].”​—⁠2 Timoteo 3:​1-5, NW; Matayo 24:​3, 12.

Bubu, kukonda ya zola kele na kati ya banzikisa yina kemonisa nde beto kezinga na bilumbu ya nsuka ya inza yai. Kyese mingi, yau ketendula mpi nde kubika fyoti, inza yai ya bantu ya kukonda bunzambi tayingisama na inza mosi ya mpa mpi ya lunungu, yina tafuluka na zola.​—⁠Matayo 24:​3-14; 2 Piere 2:5; 3:​7, 13.

Kansi, keti ya kyeleka beto kele ti kikuma ya kukwikila nde nsoba ya mutindu yina lenda salama​—⁠nde bantu yonso lenda longuka na kuzolana mpi na kuzinga kisika mosi na ngemba?

ZOLA YA MPANGI​—⁠DYAMBU YA KYELEKA

MUNTU mosi ya bansiku ya mvu-nkama ya ntete yulaka Yezu nde: “Nani mpangi na mono yina?” Ntembe kele ve nde yandi tulaka ntima nde Yezu kutuba, ‘Bankundi na nge Bayuda.’ Kansi na disolo mosi ya muntu ya Samaria ya ntima ya mbote, Yezu monisaka nde bantu ya bansi yankaka mpi kele bampangi na beto.​—⁠Luka 10:​29-37; Yoane 4:​7-9.

Yezu bendaka dikebi nde, na zulu ya zola ya Nzambi, zola ya mpangi fwete yala luzingu na beto. (Matayo 22:​34-40) Keti ata kibuka mosi ve ya bantu mesongaka ntete zola ya kyeleka sambu na bampangi na bau? Bakristu ya ntete songaka yau! Bau vandaka kuzabana sambu na zola yina bau vandaka na yau sambu na bampangi na bau.​—⁠Yoane 13:​34, 35.

Ebuna bubu? Keti kele ve ti bantu yina kesongaka zola bonso yina ya Kristu? Encyclopedia Canadiana ketuba nde: “Kisalu ya Bambangi ya Yehowa mefutumunaka mpi mevutulaka Bukristu ya ntete yina Yezu ti balongoki na yandi songaka . . . Bau yonso kele bampangi.”

Inki yau ketendula? Yau ketendula nde Bambangi ya Yehowa kepesaka ve nzila ata na kima mosi​—⁠yau vanda mpusu ya nitu, insi, to kisina ya kikanda​—⁠nde yau pusa bau na kuyina bampangi na bau. Bau tazola mpi ve kufwa muntu yankaka, sambu na mutindu mosi ya kifwani, bau mekumisaka bambele na bau bansengo ya kudimina mpi makonga na bau, bau mekumisaka yau bapusu. (Yezaya 2:⁠4) Ya kyeleka, Bambangi mezabanaka sambu bau kebakaka ngindu ya kuyantika kusadisa bampangi na bau.​—⁠Galatia 6:⁠10.

Mpila ya kuyituka kele ve nde zulunalu mosi ya Californie (Sacramento Union) tubaka nde: “Yau mefwana na kutuba nde kana inza ya mvimba vandaka kulanda balukwikilu ya Bambangi ya Yehowa, nga kupanza menga ti kimbeni mesukaka, ebuna zola zolaka kuyala mpenza.” Nsoniki mosi na zulunalu mosi (Ring) ya Hongrie tubaka nde: “Mono mesukisaka nde kana Bambangi ya Yehowa mpamba bantu vandaka kuzinga na zulu ya ntoto, nga bamvita memanaka, ebuna bisalu ya basoda zolaka kuvanda kaka ya kutala bakaminio ti kukabula mikanda ya kutambudila.”

Kansi beto fwete ndima nde, nsoba ya nene tavanda na inza ya mvimba kana bantu yonso kezola kuzolana. Inki mutindu nsoba yango takwisa? (Kana nge mezola, tala na nima ya lutiti.)

NTANGU BANTU YONSO TAZOLANA

KISAMBU mosi ya Yezu Kristu longaka kesonga nde nsoba ya nene kele penepene. Na Disolo na yandi ya nene na zulu ya Ngumba, Yezu longaka beto na kusamba: “Kimfumu na nge kwisa, luzolo na nge kusalama awa na ntoto, bonso na zulu.”​—⁠Matayo 6:⁠10.

Kimfumu ya Nzambi kele inki? Yau kele luyalu ya kyeleka, yina keyalaka tuka na zulu. Yau yina bau kebinga yau “kimfumu ya zulu.” Yezu Kristu, “Mfumu ya Ngemba,” Tata na yandi meponaka yandi sambu na kuvanda Mfumu ya kimfumu yango.​—⁠Matayo 10:​7, NW; Yezaya 9:​5, 6 (6, 7, NW); Nkunga 72:​1-8.

Ntangu Kimfumu ya Nzambi takwisa, inki tabwila ntoto yai ya kufuluka na kimbeni? “Kimfumu,” ta “bwisa mpi tasukisa” baluyalu yonso ya kubeba ya inza yai. (Daniele 2:​44, NW) Biblia ketendula nde: “Inza kele na kuluta . . . , kansi muntu yina kesala luzolo ya Nzambi kebikala kimakulu.”​—⁠1 Yoane 2:​17, NW.

Na yina metala inza ya mpa ya Nzambi, Biblia ketuba nde: “Bantu ya lunungu tabaka ntoto mpi na zulu na yau, bau tazinga kimakulu.” (Nkunga 37:​9-11, 29, NW; Bingana 2:​21, 22) Yau tavanda ntangu ya nkembo kibeni! “Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Kusonga 21:⁠4) Ata bafwa tazinga dyaka, mpi ntoto ya mvimba takituka paladisu ya kyeleka.​—⁠Yezaya 11:​6-9; 35:​1, 2; Luka 23:43; Bisalu 24:⁠15.

Sambu na kuzinga na inza ya mpa ya Nzambi, beto fwete zolana, kaka mutindu Nzambi kelonga beto na kusala yau. (1 Tesalonika 4:⁠9) Longoki mosi ya Biblia ya ndambu ya Esti tubaka nde: “Mono kevingila ntangu yina, mutindu Biblia kesila, bantu yonso talonguka kuzolana.” Mpi beto lenda ndima nde Nzambi talungisa balusilu na yandi! Yandi ketuba nde: “Makambu yai mono me tuba yo, mono ta lungisa yo.”​—⁠Yezaya 46:⁠11.

Kansi, sambu na kubaka balusakumunu yina tavanda na Kimfumu ya Nzambi, nge fwete longuka sambu na kubaka nzayilu ya Biblia, mutindu mafuku ya bantu ya ntima ya mansonga kesala yau na inza ya mvimba. (Yoane 17:​3, NW) Kamukanda yai ya balutiti 32: Inki Nzambi Kelombaka na Beto? tasadisa nge. Nge tabaka nsononono mosi na kufulusaka kitini ya papie yina mepesama na lutiti yina meyita mpi tinda yau na adresi yina kele penepene na kisika yina nge kezingaka.