Nzambi Kele Nduku ya Kuluta Mbote ya Nge Lenda Baka

Kukuma nduku ya Nzambi ke kima ya kuluta mbote ya nge lenda zwa. Nzambi talonga nge nki mutindu nge lenda vanda na kyese mpi na lutaninu; yandi takatula nge na kimpika ya malongi mingi ya luvunu mpi ya bisalu ya kigonsa. Yandi tawaka bisambu na nge. Yandi tasadisaka nge na kuvanda na ngemba na kati ya ntima mpi na kutula ntima. (Nkunga 71:5; 73:28) Nzambi tapesaka nge kikesa na ntangu ya mpasi. (Nkunga 18:18) Nzambi kepesa nge mpi dikabu na yandi ya luzingu ya mvula na mvula.—Roma 6:23.

Kana nge kuma penepene na Nzambi, nge takuma mpi penepene na banduku ya Nzambi. Bo mpi takuma banduku na nge. Na kutuba ya mbote, bo takuma bonso bampangi na nge ya babakala ti ya bankento. Bo tavanda na kyese ya kulonga nge mambu ya Nzambi, bo tasadisa nge mpi tapesa nge kikesa.

Beto kele ve kiteso mosi ti Nzambi. Na ntangu nge kesosa kukuma nduku ya Nzambi, nge fwete bakisa dyambu mosi ya mfunu. Kusala kinduku ti Nzambi kele kiteso mosi ve ti kinduku ya beto kesalaka ti bantu yina beto kele na bo kiteso mosi. Yandi meluta beto ntama kibeni na bamvula ti na mayele. Yandi meluta beto mpi na ngolo. Yandi muntu ke Ntotila ya mefwana na kuyala beto. Yo yina, kana beto kezola kuvanda banduku na yandi, beto fwete wila yandi mpi kusala mambu yina ya yandi kezabisa beto na kusala. Yonso yai tavanda sambu na mambote na beto.—Yezaya 48:18.