Banani Kele Bambeni ya Nzambi?

Mbeni ya nene ya Nzambi kele Satana Dyabulu. Yandi kele kigangwa ya kimpeve yina kukolamaka na Yehowa. Satana kelanda na kunwanisa Nzambi mpi yandi kenyokula bantu ngolo kibeni. Satana kele muntu ya mbi. Yandi kele muntu ya luvunu mpi ya kefwaka bantu.—Yoane 8:44.

Bigangwa yankaka ya kimpeve kulandaka Satana mpi bo kolamaka na Nzambi. Biblia kebinga bo nde bademo. Bademo mpi kele bambeni ya bantu, bonso Satana. Bo kezolaka kupesa bantu mpasi. (Matayo 9:32, 33; 12:22) Yehowa tafwa Satana ti bademo na yandi kimakulu. Bo mebikala kaka ti ntangu fyoti ya kunyokula bantu.—Kusonga 12:12.

Kana nge kezola kuvanda nduku ya Nzambi, nge fwete salaka ve mambu yina Satana kezola nde nge sala. Satana ti bademo kezolaka ve Yehowa. Bo kele bambeni ya Nzambi, mpi bo kezola nde nge mpi kukuma mbeni ya Nzambi. Nge fwete pona Muntu yina nge kezola kupesa kyese: Satana to Yehowa. Kana nge kezola kubaka luzingu ya mvula na mvula, nge fwete pona na kusala luzolo ya Nzambi. Satana kele ti mayele mpi banzila mingi ya mbi ya kukusa bantu. Yandi kekusa bantu mingi yina kele ve mayele.—Kusonga 12:9.