Inki Mambu Kesalamaka na Lufwa?

Lufwa kele kukonda luzingu. Lufwa kele bonso mpongi ya ngolo. (Yoane 11:11-14) Bafwa lenda wa ve, bo lenda mona ve, bo lenda tuba ve, to kuyindula ata kima mosi. (Longi 9:5, 10) Mabundu ya luvunu kelongaka nde bafwa kekwendaka na inza mosi ya kimpeve sambu na kuzinga kumosi ti bankaka na bo ya mefwaka. Biblia kelongaka mutindu yina ve.

Bantu yina mefwaka lenda sadisa beto ve, bo lenda sala beto mpi mbi ve. Beto kelutaka kumona bantu kesala mambu ya nsiku ya bambuta to kupesa bimenga yina bo keyindulaka nde yo tayangidika bantu yina mefwaka. Mambu yai kepesaka ve Nzambi kyese sambu yo kekatukaka na malongi ya luvunu ya Satana. Yo lenda yangidika ve ata bafwa, sambu bo kevandaka ve na luzingu. Beto fwete banga ve bafwa to kusambila bo. Beto fwete sambila kaka Nzambi.—Matayo 4:10.

Bafwa tazinga dyaka. Yehowa tatedimisa bafwa sambu bo zinga na paladisu ya ntoto. Mambu yai tasalama na bilumbu kekwisa. (Yoane 5:28, 29; Bisalu 24:15) Nzambi lenda tedimisa bantu yina mefwaka kukonda mpasi mutindu nge lenda tedimisa muntu yina ke na mpongi.—Marko 5:22, 23, 41, 42.

Ngindu ya kutuba nde beto kefwaka ve kele luvunu yina Satana Dyabulu meyalumunaka. Satana ti bademo na yandi kenataka bantu na kuyindula nde bampeve ya bafwa kezingaka mpi nde bo kelosilaka bantu maladi ti kumonisa bo bampasi yankaka. Satana kekusaka bantu, bantangu yankaka yandi kekusaka bo na nzila ya bandosi ti bambona-meso. Yehowa kendimaka ve bantu yina kesosaka kusolula ti bafwa.—Kulonga 18:10-12.