Mitindu ya bo kesadilaka sambu na kusamuna Nsangu ya Mbote

BAKRISTU kubakaka ntuma ya ‘kukumisa bantu ya makanda yonso balongoki,’ ata mpidina, yo ketendula ve nde bo kele na nswa ya kusadila kingolongolo to kutindika bantu na kubalula ntima na ngolo. Kisalu ya Yezu vandaka ya “kunata nsangu ya mbote na bansukami,” “kutala bayina ke tula diaka ntima ve,” mpi “kukatula mawa na bantu yina ke na mafwa.” (Matayo 28:19; Yezaya 61:​1, 2; Luka 4:​18, 19) Bambangi ya Yehowa kesosaka kusala mambu yai na ntangu bo kesamunaka nsangu ya mbote yina kele na Biblia. Bonso mbikudi Ezekiele, bubu yai Bambangi ya Yehowa ketulaka ngolo na kukutana ti bantu yina “ke mona mpasi ti kudila sambu na mambu yonso ya nsoni yina ke luta.”​—⁠Ezekiele 9:⁠4.

Mutindu ya mezabanaka mbote yina bo kesadilaka sambu na kukutana ti bantu yina kemona mpasi sambu na mambu yina keluta bilumbu yai kele kukwenda nzo na nzo. Na mutindu yina, bo ketula ngolo sambu na kukutana ti bantu yonso, kaka mutindu Yezu vandaka kusala ntangu [yandi] “kwendaka kutambula na babwala ya nene ti na babwala ya fioti. Yandi vandaka kulonga Nsangu ya Mbote ya Kimfumu ya Nzambi.” Balongoki na yandi ya ntete kusalaka mutindu mosi. (Luka 8:1; 9:​1-6; 10:​1-9) Bubu yai, na bisika yina mpila kemonanaka, Bambangi ya Yehowa kesalaka ngolo na kuluta konso mvula mbala mingi na konso nzo, sambu na kusosa mpila ya kusolula mwa ntangu fyoti ti bantu mwa masolo ya mfunu to ya bantu keyindula mingi yina keluta na bwala na bo to na inza ya mvimba. Bo lenda tanga verse mosi to zole ya Biblia, mpi kana muwi memonisa mpusa, Mbangi yina kesolula ti yandi lenda wakana ti muntu yango sambu na kuvutukila yandi na ntangu yina mebonga na yandi na mpila nde bo landa disolo. Beto kenataka Biblia ti mikanda yina ketendulaka Biblia, ebuna, kana muntu mesepela na yo, beto kelongukaka Biblia ya ofele ti muntu yango. Beto kesadisaka bamilio ya bantu ya mutindu yai na inza ya mvimba yina beto kelongukaka na bo Biblia mbala na mbala na nzo, yandi vanda yandi mosi to dibuta ya mvimba.

Balukutakanu yina beto kesalaka na Banzo ya Kimfumu kele mutindu yankaka dyaka ya kuzabisa bantu “nsangu ya mbote ya Kimfumu.” Bambangi ketwadisaka balukutakanu kuna konso mposo. Mosi na kati ya balukutakanu yango kele disolo ya bantu yonso yina ketendulaka dikambu mosi ya mfunu ya kewakana ti bilumbu na beto, na nima na yo, beto kelongukaka disolo mosi ya beto kebakaka na banimero ya Nzozulu ya Nkengi. Yo ketendulaka masolo ya Biblia to bambikudulu. Lukutakanu yankaka kele nzo-nkanda yina kelongaka Bambangi na kuvanda bansamuni ya nsangu ya mbote ya kufwana mpenza, na nima na yo, beto kesalaka kitini ya masolo yina ketubilaka kisalu ya kuta kimbangi na teritware yina ya bo mepesaka beto. Mbala mosi na mposo, Bambangi kevukanaka dyaka na banzo ya bampangi yankaka, na bibuka ya fyoti, sambu na kulonguka Biblia.

Muntu yonso lenda kwenda na balukutakanu yai yonso. Kuna bo kekongulaka ve mbongo. Balukutakanu yina kele mpenza na mfunu sambu na bantu yonso. Biblia ketuba nde: “Beto banzila bantu ya nkaka na kati na beto na kupesa bo kikesa ya kuzola bampangi ya nkaka kuluta diaka mbote ti kusadila bo mambu ya mbote. Konso ntangu beto fweti kutana kaka na [balukutakanu na beto, NW]; beto vanda ve bonso bantu ya nkaka ke kwendaka diaka ve na [balukutakanu, NW]. Kansi beto fweti pesa kikesa na bampangi ya nkaka na kati na beto, sambu beto ke mona nde kilumbu yina [mefinama].” Kulonguka ya beto mosi ti kusala bansosa kele mfunu, kansi kukutana ti bankaka kele kima kepesaka kikesa: “Muntu ke pesaka mayele na muntu ya nkaka mutindu bibende ke pesaka makasi na bibende ya nkaka.”​—⁠Baebreo 10:​24, 25; Bingana 27:⁠17.

Bambangi kesadilaka mpi baokazio yonso sambu na kutubila mambu yina metala nsangu ya mbote ntangu bo kekutana ti bantu yankaka na luzingu na bo ya konso kilumbu. Yo lenda vanda mwa disolo ya fyoti ti mfinangani to ti muntu yina beto kesala ti yandi nzyetelo na bisi to na avio, disolo ya nda ti nduku mosi to mpangi ya dibuta, to disolo ti nduku mosi ya kisalu na ntangu ya madya ya midi. Ntangu Yezu vandaka na zulu ya ntoto, yandi taka kimbangi mingi ya mutindu yai, mu mbandu, ntangu yandi vandaka kutambula na lweka ya nzadi, na ntangu yandi vandaka kumata fyoti na ngumba, ntangu yandi vandaka kudya na nzo ya muntu mosi, ntangu yandi vandaka na feti ya makwela, to ntangu yandi salaka nzyetelo na maswa ya kuloba na Nzadi ya Galilea. Yandi longaka na kati ya basinagoga mpi na tempelo ya Yeruzalemi. Konso kisika yina yandi vandaka, yandi zwaka baokazio ya kutuba mambu yina metala Kimfumu ya Nzambi. Bambangi ya Yehowa kesalaka ngolo na kulanda mpi bitambi na yandi na mambu yai.​—⁠1 Piere 2:⁠21.

KUSAMUNA NA MBANDU

Mosi ve kati na mitindu yai ya bo sadilaka sambu na kuzabisa nge nsangu ya mbote zolaka kusadisa nge kana muntu yina kutubilaka nge yo vandaka kusadila ve yandi mosi malongi yina yandi vandaka kulonga nge. Kana muntu ketuba dyambu mosi kansi yandi kesala yankaka, yandi kele muntu ya luvunu, mpi luvunu ya mabundu mesalaka nde bantu mingi kubuya Biblia. Bo kele na kikuma ve ya kumona Biblia mbi. Balongi ya bansiku ti bafarize kuvandaka na Masonuku ya Baebreo, kansi Yezu kutungululaka bo nde bo vandaka bantu ya luvunu. Yandi tubaka nde bo ketangaka Nsiku ya Moize, kansi na nima, yandi zabisaka balongoki na yandi nde: “Beno fweti lemfuka na bo ti kulanda mambu yonso ya bo ke tubilaka beno. Kansi beno landa bikalulu na bo ve, sambu bo ke salaka ve mambu yina ya bo ke longaka bantu ya nkaka na kusala.” (Matayo 23:⁠3) Bikalulu ya mbote ya Mukristu yina kemonanaka na luzingu na yandi kesadisaka bantu na kundima mingi kuluta badiskure ya nda-nda. Yo yai mambu bo songaka Bakristu ya bankento yina kuvandaka na babakala ya mimpani: “Kana babakala na beno ya nkaka ke ndimaka ve nsangu ya Nzambi, bo ta baka lukwikilu sambu na bikalulu na beno ya mbote. Mfunu ta vanda diaka ve beno na kutubila bo diaka ata kima mosi, sambu bo ta mona nde bikalulu na beno kele ya kinzambi ti ya luzitu.”​—⁠1 Piere 3:​1, 2.

Yau yina, Bambangi ya Yehowa kemekaka na kusala ngolo sambu na kulonga nsangu ya mbote na bankaka na mutindu yai dyaka: bo mosi kesongaka mbandu na kumonisa bikalulu ya Bukristu yina bo kelongaka bantu yankaka. Bo kesalaka kikesa sambu na ‘kusadila bantu yankaka mambu yonso yina ya bo kezolaka nde bo sadila bo.’ (Matayo 7:12) Bo kesalaka kikesa sambu na kusala mpidina na bantu yonso, bo kesukaka kaka ve na bampangi na bo Bambangi, banduku, bamfinangani, to na bantu ya dibuta na bo. Mutindu bo kele bantu ya kukonda kukuka, bo kenungaka ve ntangu yonso na kusala mambu yonso. Ata mpidina, na ntima na bo, bo kevandaka na mpusa ya kusala mambote na bantu yonso. Bo kesukaka ve kaka na kulonga bo nsangu ya mbote ya Kimfumu, kansi bo kesadisaka bo mpi na mambu ya kinsuni kana mpila kele.​—⁠Yakobo 2:​14-17.

[Kifwanisu ya kele na lutiti 19]

Hawaii

[Kifwanisu ya kele na lutiti 19]

Venezuela

[Kifwanisu ya kele na lutiti 19]

Yougoslavie

[Bifwanisu ya kele na lutiti 20]

Banzo ya Kimfumu, ya bo metunga na mutindu mosi ya mbote, kele bisika ya kusadila masolo ya Biblia

[Bifwanisu ya kele na lutiti 21]

Na luzingu na bo ya dibuta mpi na bangwisani na bo ti bankaka, Bambangi kesalaka kikesa sambu na kusadila na masonga yonso mambu yina bo kelongaka