Mutindu ya Kutomisa Mayele ya Kusolula ti Bantu

KETI mbala mingi nge kemonaka ve mpasi na kusolula ti bantu yankaka? Sambu na bantu mingi, ngindu ya kusolula ti muntu yankaka, mingi-mingi ti muntu yina yandi mezaba ve, kepesaka bo mpasi na ntima. Bantu ya mutindu yai lenda vanda nsoninsoni. Bo lenda kudiyula nde: ‘Inki mu tatuba? Inki mutindu mu tayantika disolo? Inki mutindu mu talanda disolo yango?’ Kansi bantu ya kekuditudilaka ntima mpi ya kewaka ve nsoni na kusolula ti bantu yankaka lenda vanda ti kikalulu ya kutuba mingi kuluta bankaka. Sambu na bo, yo lenda vanda mpasi na kubikila bankaka ntangu ya kutuba mpi na kulonguka na kuwidikila mambu ya bo ketuba. Yo yina, beto vanda bantu ya nsoninsoni to bantu ya kewaka ve nsoni na kusolula ti bankaka, beto fwete landa na kukuna kikalulu ya kusolula.

Yantika Kusala Yo na Nzo

Sambu na nki ve kuyantika na nzo sambu na kutomisa mayele na nge ya kusolula ti bantu? Masolo ya kepesa kikesa lenda sala nde dibuta kuvanda na kyese.

Dyambu ya kuluta mfunu na masolo ya mutindu yai kele kutula dikebi ya mingi na bantu yankaka. (Kul. 6:6, 7; Bing. 4:1-4) Kana beto ketula dikebi, beto tasolula, mpi tawidikila ntangu muntu yankaka kezola kutuba kima. Dyambu yankaka ya mfunu kele kuvanda ti kima mosi ya mbote ya kutuba. Kana beto kele ti programe ya kutanga mpi kulonguka Biblia beto mosi mbala na mbala, beto tavanda ti mambu mingi ya kutuba. Kusadila mbote kamukanda Beto Fimpa Masonuku Konso Kilumbu lenda sadisa beto na kuyantika masolo. Na mwini, beto lenda kutana ti eksperiansi mosi ya kitoko na kisalu ya bilanga. Beto lenda tanga kima mosi yina kelonga to kesekisa beto. Beto fwete kuna kikalulu ya kutubilaka bima yai na ntangu beto kesolula na dibuta. Yo tasadisa beto mpi na kusolula ti bantu na nganda ya dibuta.

Kusolula ti Munzenza

Bantu mingi kezolaka ve kuyantika disolo ti muntu ya bo mezaba ve. Kansi sambu bo kezolaka Nzambi mpi bampangi na bo, Bambangi ya Yehowa kesalaka kikesa ya ngolo na kulonguka mutindu ya kusolula sambu na kuzabisa bantu yankaka bakyeleka ya Biblia. Inki lenda sadisa nge na kutomisa dyambu yai?

Munsiku yina kele na Filipi 2:4 kele mfunu mingi. Bo kesyamisa beto na kusosa “mambote ya bantu ya nkaka kansi mambote na [beto] mosi mpamba ve.” Tala mutindu nge lenda sadila munsiku yai: Kana nge mekutanaka ntete ve ti muntu mosi, yandi kemona nge bonso munzenza. Inki nge lenda sala sambu yandi kudiwa mbote? Kuseka ya kyese mpi kupesa yandi mbote ya kinduku tasadisa. Kansi mambu yankaka ya kutadila kele.

Ziku nge zengaka bangindu na yandi. Kana nge kesosa kusolula ti yandi mambu yina kele na mabanza na nge kukonda kutula dikebi na mambu yina kele na mabanza na yandi, keti beno tasolula mbote? Inki Yezu kusalaka ntangu yandi kutanaka ti nkento mosi na dibulu ya masa na Samaria? Mabanza na yandi vandaka na kubaka masa. Yezu kusadilaka dyambu yina sambu na kuyantika disolo na yandi ti nkento yina, kansi ntama mingi ve, yandi balulaka yo na disolo mosi ya kitoko ya kimpeve.​—Yoa. 4:7-26.

Kana nge mezaba kutala mbote, nge mpi lenda bakisa mambu yina bantu keyindula. Keti muntu yango kele na kyese to na mawa? Keti yandi kele mununu, mbala yankaka ti kimbefu? Keti kele ti mambu ya kendimisa nge nde bana kezingaka na nzo yina? Keti muntu yango kele ti bima mingi ya kinsuni to yandi kemonaka mpasi na kuzwa bima ya mfunu ya luzingu? Keti bifwanisu yina kele na nzo to bima ya makutu mpi mayaka ya yandi melwata kesonga nde yandi kesambilaka? Kana nge tadila bima yai ntangu nge kepesa muntu yina mbote, yandi lenda mona nde beno kele ti mambu yina kevukisa beno.

Kana nge kutana ve ti muntu yina, kansi mbala yankaka nge kewa kaka ndinga na yandi na kyelo ya kukanga, inki nge lenda yindula? Mbala yankaka yandi kezingaka na boma. Keti nge lenda sadila dyambu yina sambu na kuyantika disolo ata kyelo kele ya kukanga?

Na bisika yankaka, nge lenda yantika kusolula ti muntu kana nge tubila yandi dyambu mosi ya ketadila nge: kisika ya nge yelaka, kikuma ya nge mekwisila na nzo na yandi, sambu na nki nge kekwikilaka na Nzambi, sambu na nki nge yantikaka kulonguka Biblia, mpi nki mutindu Biblia kusadisaka nge. (Bis. 26:4-23) Kansi, nge fwete sala yo ti mayele mpi ti lukanu ya pwelele na mabanza. Dyambu yai lenda nata muntu yina na kutubila nge kima mosi ya metadila yandi mpi mutindu yandi kemonaka mambu.

Na bisika yankaka, bantu kevandaka ti kikalulu ya kuyamba banzenza. Bantu lenda lomba nge kukonda mpasi na kukota mpi na kuvanda. Ntangu nge mevanda imene, kana nge yula ti luzitu yonso kana dibuta kele mbote mpi nge widikila mvutu na dikebi yonso, muntu yina tatula mpi dikebi na mambu ya nge tatuba. Bantu yankaka kemonisaka nkutu dikebi mingi na banzenza, yo yina na nima ya kupesa mbote ya luyantiku, disolo kelandaka mwa ntangu mingi. Ntangu beno kesolula, bo lenda mona nde nge mpi kezolaka bima ya bo kezolaka. Yo lenda nata beno na kusolula mambu ya mbote ya kimpeve.

Inki nge lenda sala kana na kisika ya nge kezingaka bantu mingi ketubaka bandinga ya banzenza? Inki mutindu nge lenda solula ti bantu yai? Kana nge longuka ata mutindu bo kepesaka mbote na mwa bandinga yango, bantu yina tabakisa nde nge ketudilaka bo dikebi. Yo lenda sadisa beno na kusolula dyaka na mbala ya nima.

Mutindu ya Kulanda Disolo

Sambu na kulanda disolo, tula dikebi na bangindu ya muntu yina nge kesolula ti yandi. Syamisa yandi na kutuba kana yandi kezola kusala yo. Bangyufula ya kupona mbote lenda sadisa nge. Bangyufula ya kelombaka muntu na kupesa ngindu na yandi kele mbote mingi sambu yo kepusaka muntu na kusuka ve kaka na kutuba ee to ve. Mu mbandu, na nima ya kutubila dyambu mosi ya keyangisa bantu na kisika ya beno kezinga, nge lenda yula nde: “Na ngindu na nge nki kele na kisina ya dyambu yai?” to “Na ngindu na nge, inki lenda manisa yo?”

Kana nge yula ngyufula, widikila mvutu mbotembote. Tuba ngogo mosi, nikisa ntu, to sala kidimbu mosi sambu na kumonisa nde nge kelanda yandi na dikebi yonso. Kuzenga yandi ve. Yindulaka mambu ya muntu yina ketuba ti ngindu ya mbote. “Vanda nswalu na yina metala kuwidikila, malembe na yina metala kutuba.” (Yak. 1:19, NW) Na ntangu nge kepesa mvutu, monisa nde nge vandaka kuwidikila mpenza mambu ya yandi vandaka kutuba.

Kansi, zaba nde bantu yonso ve tapesa mvutu na bangyufula na nge. Sambu na bankaka, mvutu lenda vanda kaka kutedimisa nsuki ya meso to kuseka. Bankaka lenda tuba kaka nde ee to ve. Kulemba nitu ve. Kanga ntima. Kusosa ve kusolula ti muntu na kingolo-ngolo. Kana muntu yango kendima na kuwa nge, sadila dibaku yina sambu na kusonga yandi bangindu ya Masonuku yina lenda pesa yandi kikesa. Na nima ya bilumbu, muntu yango lenda yantika kubaka nge bonso nduku na yandi. Na ntangu yina, yandi tayantika mbala yankaka kusonga nge bangindu na yandi kukonda mpasi.

Ntangu nge kesolula ti bantu, kuvila ve na kutubila mambu ya beno tasolula na mbala ya nima. Kana muntu mosi meyula bangyufula mingi, pesa mvutu na bangyufula yankaka, kansi bika ngyufula mosi to zole sambu na mbala ya nima ya beno tasolula. Songa yandi nde nge kezola kwenda kusosa-sosa mambu yankaka, mpi nde nge takwisa kusolula ti yandi mambu ya nge tazwa. Kana yandi meyula ve bangyufula, nge lenda manisa disolo ti ngyufula mosi ya nge keyindula nde yo tasepedisa yandi. Songa yandi nde beno tatadila yo ntangu nge takwisa kutala yandi na mbala ya nima. Nge lenda zwa bangindu ya mfunu na mukanda Comment raisonner à partir des Écritures, na kamukanda Inki Nzambi Kelombaka na Beto?, mpi na banimero ya mpa ya Nzozulu ya Nkengi mpi ya Réveillez-vous !

Kusolula ti Bakristu Yankaka

Kana nge mekutana ti Mbangi ya Yehowa mosi na mbala ya ntete, keti nge keyantikaka na kusosa kuzaba yandi? To keti nge kevandaka kaka pima? Zola sambu na bampangi na beto fwete pusa beto na kusosa kuzaba bo. (Yoa. 13:35) Inki mutindu nge lenda yantika? Nge lenda songa yandi zina na nge mpi kuyula yandi zina na yandi. Mbala mingi, beno tayantika disolo ya kitoko kana nge yula yandi nki mutindu yandi yambaka kyeleka mpi yo tasadisa beno na kuzabana. Ata nge kekangama-kangama na ntangu nge ketuba, kikesa ya nge kesala kesonga mpangi yina nde nge ketudila yandi dikebi, mpi yo yai dyambu ya mfunu.

Inki lenda sadisa nge na kusala disolo mosi ya kitoko ti mpangi mosi ya dibundu na nge? Monisa dikebi ya masonga sambu na mpangi yina mpi dibuta na yandi. Keti lukutakanu mekatuka kumana? Tubila bangindu ya nge monaka mfunu. Bangindu yai lenda sadisa beno. Nge lenda tubila ngindu mosi ya kitoko yina kele na nimero mosi ya mpa ya Nzozulu ya Nkengi to Réveillez-vous ! Nge fwete sala yo ve sambu na kudisonga to sambu na kumeka nzayilu ya muntu ya nge kesolula na yandi. Sala yo sambu na kutubila kima yina kusepidisaka nge mingi. Nge lenda tubila devware yina mosi na kati na beno kele na yo na Nzo-Nkanda ya Kisalu ya Teokrasi mpi kupesana bangindu na mutindu yandi lenda sala yo. Beno lenda tubila mpi baeksperiansi ya beno kutanaka na yo na kisalu ya bilanga.

Ya kyeleka, dikebi ya beto ketudilaka bankaka kenataka beto na kusolula mambu yina ketadila bo, disongidila mambu ya bo ketubaka mpi ya bo kesalaka. Beto lenda tubila mpi mambu yina kesekisaka beto. Keti mambu ya beto tatuba tapesa bantu ya beto kesolula na bo kikesa? Kana beto simba na ntima bandongisila ya Ndinga ya Nzambi mpi kana zola ya Nzambi kepusa beto, mambu ya beto tatuba tapesa kibeni bankaka kikesa.​—Bing. 16:27, 28; Ef. 4:25, 29; 5:3, 4; Yak. 1:26.

Beto kekudibongisaka na ntwala ya kukwenda na kisalu ya bilanga. Sambu na nki ve kubongisa disolo mosi ya kitoko ya nge tasolula ti banduku na nge? Ntangu nge ketanga to kewa mambu yina lenda sepedisa bankaka, sonika mambu ya nge kezola kusolula ti bankaka. Na nima ya bilumbu, nge takuma ti mambu mingi ya nge lenda pona. Kusala mutindu yai tasadisa nge na kusuka ve kaka na kutubila mambu ya konso kilumbu ya luzingu. Kuluta dyaka, bika nde masolo na nge kumonisa nde Ndinga ya Nzambi kele mfunu mingi sambu na nge!​—Nk. 139:17.