Kubika Fyoti Bampasi Yonso Kumana!

Ntembe kele ve nde nge mekudiyulaka bantangu yankaka na luzingu na nge nde, ‘Sambu na nki bampasi ke mingi mpidyai?’ Tuka bamvula mingi, bantu kemonaka bampasi mingi mpenza sambu na bitumba, kinsukami, bisumbula, nku, kukonda lunungu, maladi, mpi lufwa. Na mvu-nkama ya mekatuka kuluta, bantu memona bampasi mingi mpenza kuluta na ntangu ya ntama. Keti kele ti kilumbu bampasi yai yonso tamana?

Mvutu ya kepesa kikesa kele nde ee, kubika fyoti mpenza yo mana! Biblia yina kele Ndinga ya Nzambi ketuba nde: “Bantu ya mbi ta vila . . . kansi bantu yina ke kudikulumusaka, bo ta zinga mbote na ngemba mpenza na ntoto.” Sambu na bantangu ikwa? “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”​—Nkunga 37:10, 11, 29.

Ntangu Nzambi takatula mambi ti bampasi, ntoto takituka paladisu. Na nima, bantu tazinga mvula na mvula na mavimpi ya kukuka mpi na kyese. Ndinga ya Nzambi metubaka dezia nde: “[Nzambi] ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.”​—Kusonga 21:4.

Na inza yina ya mpa, ata bafwa tavutuka dyaka na luzingu sambu na kubaka mambote yango. “Lufutumuku ya bantu ya lunungu ti ya bantu ya kukonda lunungu tavanda.” (Bisalu 24:15, NW) Yo yina kima kupusaka Yezu Kristu na kutubila muntu ya mbi yina kubalulaka ntima mpi kutulaka lukwikilu na yandi nde: ‘Nge ta vanda ti mono na Paladisu.’​—Luka 23:43.

Sambu na Nki Bampasi Kubasikaka?

Sambu lukanu ya Nzambi kuvandaka nde bantu kuvanda ti luzingu ya mbote mpenza na bilumbu kekwisa, sambu na nki yandi pesaka nzila nde bampasi kubasika? Sambu na nki yandi mebikisaka nde yo baka ntangu mingi?

Ntangu Nzambi kugangaka Adami ti Eva, Yandi salaka bo ti nitu mpi mabanza ya kukuka. Yandi tulaka bo na kilanga mosi ya kuvandaka paladisu mpi yandi pesaka bo kisalu mosi ya vandaka kupesa bo kyese. Biblia ketuba nde: “Nzambi monaka nde mambu yonso ya yandi salaka yo kele mbote mpenza.” (Kuyantika 1:31) Kana bo lemfukilaka Nzambi, bo zolaka kubuta bana ya kukuka, mpi ntoto ya mvimba zolaka kukuma paladisu, kisika bantu zolaka kuzinga mvula na mvula na ngemba mpi na kyese.

Ntangu Nzambi kugangaka Adami ti Eva, yandi pesaka bo dikabu ya kitoko ya kimpwanza ya kupona. Bo zolaka kuvanda ve bonso barobo ya kukonda mayele ya kuyindudila. Kansi, sambu na kulanda kuvanda na kyese, yo lombaka nde bo sadila kimpwanza na bo ya kupona na mutindu mosi ya mbote, disongidila, kulemfukila bansiku ya Nzambi. Nzambi ketuba nde: “Mono Mfumu Nzambi na nge, mono muntu ke longa nge sambu na mambote na nge, mono muntu ke nata nge na nzila ya nge fweti landa.” (Yezaya 48:17) Kukonda kusadila mbote kimpwanza ya kupona zolaka kunata lufwa, sambu Nzambi kugangaka ve bantu ti kiyeka ya kudiyala mbote kukonda lutwadisu na yandi. Biblia ketuba nde: “Ke na muntu ve lenda sola nzila na yandi mosi, ke na muntu ve lenda songa nzila na makulu na yandi ntangu yandi ke tambula.”​—Yeremia 10:23.

Yo kele mawa mingi na kumona nde, bibuti na beto ya ntete kuyindulaka nde bo lendaka kudiyala mbote kukonda lutwadisu ya Nzambi. Kansi, na ntangu bo pesaka luyalu ya Nzambi mukongo, yandi vandaka kusadisa bo dyaka ve mpi bo kumaka bantu ya kukonda kukuka. Ebuna, nitu na bo kumaka kubeba fyoti-fyoti tii kuna nsukansuka, bo nunaka mpi bo fwaka. Sambu beto kele bana na bo, beto kebutukaka bantu ya kukonda kukuka mpi beto kefwaka.​—Roma 5:12.

Ntembe ya Nene ya Metala Kimfumu

Sambu na nki Nzambi kufwaka ve Adami ti Eva na mpila nde yandi kuganga bakala ti nkento yankaka? Sambu bo tulaka ntembe nde Nzambi kele ve mfumu ya inza ya mvimba, disongidila, bo tulaka ntembe na nswa ya kuyala yina yandi kele na yo. Ngyufula kuvandaka ya kuzaba kana Nani kele ti nswa ya kuyala, mpi luyalu ya nani kele ya mbote? Na kutuba yankaka, Keti bantu zolaka kuzinga mbote kukonda luyalu ya Nzambi? Mutindu Nzambi mepesaka bantu ntangu ya kufwana sambu bo mosi kumona kana bo lenda kuka kudiyala kukonda luyalu ya Nzambi, yo mesadisaka yandi na kumonisa kimakulu kana bantu lenda zinga mbote na ntangu bo kelemfukila luyalu na yandi to na ntangu bo mosi kekudiyala. Yo lombaka nde ntangu ya Nzambi kubikilaka bantu kuvanda ya kufwana mpenza na mpila nde bo meka mitindu yonso ya luyalu ya politiki, ya luzingu, ya ekonomi, mpi ya mabundu, kukonda lutwadisu na yandi.

Keti bikesa na bo menungaka? Tuka bamvula mingi, luzingu ya bantu memonisa nde bampasi kelanda kaka na kukuma mingi. Na mvu-nkama ya mekatuka kuluta, bantu memonaka bampasi ya kuluta ngolo. Luyalu ya Nazi mefwaka bamilio ya bantu. Bantu kuluta bamilio 100 mefwaka na bamvita. Nku ti mubulu ke na kukuma mingi. Bantu mingi mpenza na inza mekumaka kunwa bima ya kelausaka. Maladi yina kesambukilaka na kuvukisa nitu kelanda kaka na kupanzana. Konso mvula, bamilio ya bantu kefwa na nzala ti na maladi. Luzingu ya dibuta mpi bikalulu ya mbote mebeba mpenza na bisika yonso. Ata luyalu mosi ve ya bantu lenda manisa bampasi yai. Ata mosi mpi ve na kati na yo menungaka na kumanisa kimununu, maladi, ti lufwa.

Luzingu ya bantu kemonisa mpenza nde mambu yina Biblia kutubaka sambu na bilumbu na beto kelungana na ntangu na beto. Ndinga ya Nzambi kebinga nsungi ya beto kezinga nde “bilumbu ya nsuka” ya ngidika yai ya bima yina “ta vanda mpasi mingi.” Ebuna, kaka mutindu Biblia kutubaka, “bantu ya mbi ti bantu ya luvunu, mbi na bo ta kwisa mingi.”​—2 Timoteo 3:1-5, 13.

Kubika Fyoti Bampasi Kumana

Mambu yonso ya keluta na inza kemonisa nde kubika fyoti bikesa ya menataka bampasi yina bantu mesalaka sambu na kudiyala bo mosi kukonda lutwadisu ya Nzambi kumana. Yo memonisaka pwelele nde bantu lenda nunga ve ata fyoti na kudiyala bo mosi kukonda lutwadisu ya Nzambi. Kaka luyalu ya Nzambi lenda nata ngemba, kyese, mavimpi ya kukuka, mpi luzingu ya mvula na mvula. Yo yina beto ketuba nde nswa ya Yehowa kupesaka nde mambi ti bampasi kulanda na kusalama mekuma na nsuka. Kubika fyoti, Nzambi takota na makambu ya bantu na ntangu yandi tafwa ngidika ya bima yai yonso ya mekuka ve kulungisa bampusa ya bantu.

Mbikudulu ya Biblia ketuba nde: “Na bilumbu ya bantotila yina [baluyalu ya bantu yina keyala na ntangu yai], Nzambi ya zulu tatula kimfumu mosi [na zulu] yina bo tabedisa ve. . . . Yo tafwa mpi tasukisa bimfumu yai yonso [baluyalu ya ntangu yai], mpi yo tayala mvula na mvula.” (Daniele 2:44, NW) Kusantisama ya kimfumu ya Yehowa, to nswa ya kuyala ya yandi kele na yo, na nzila ya Kimfumu na yandi ya zulu kele dilongi ya ntetentete ya Biblia. Na ntangu yandi tubilaka kitini mosi ya mfunu ya kidimbu ya “bilumbu ya nsuka,” Yezu kutubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—Matayo 24:14.

Nani taguluka na ntangu nsuka takwisa? Biblia kepesa mvutu nde: “Bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto.” (Bingana 2:21, 22) Bantu ya mbote kele bayina kelongukaka luzolo ya Yehowa mpi kesalaka yo. Yezu Kristu kutubaka nde: “Kana bo [longuka na kuzaba, NW] nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Ee, ‘nsi-ntoto keluta, kansi muntu yina kesalaka mambu yina ya Nzambi kezolaka, yandi tazinga mvula na mvula.’​—1 Yoane 2:17.

Mikapu ya Biblia mekatuka na Bible na Kituba, 1990; yankaka beto mebalula yo na kulandaka Les Saintes Écritures — Traduction du monde nouveau — avec notes et références ya Kingelesi ya bilumbu yai (NW).